သျှမ်းပြည် မူဆယ်မြို့တွင် MSPDF အယောင်ဆောင်အဖွဲ့က ငွေမပေးသူ၏ နေအိမ်ခြံဝင်းထဲ ဗုံးဖောက်ခွဲခဲ့ကြောင်း စုံစမ်းသိရသည်။
ယနေ့ (မတ်လ ၁၃ ရက်) နံနက် ၃ နာရီကျော်တွင် မူဆယ်မြို့ တောင်ရပ်ကွက်ရှိ မြန်မာ-တရုတ် ငွေလဲလုပ်ငန်း လုပ်ကိုင်သည့် နေအိမ်သို့ မူဆယ် PDF အမည်ခံထားသည့် MSPDF အယောင်ဆောင်အဖွဲ့မှ လက်ပစ်ဗုံး လာရောက်ဖောက်ခွဲခဲ့ကြောင်း မူဆယ်ဒေသခံများက ပြောသည်။
“ဒီနေ့မနက် ၃ နာရီကျော် ၁၀ မိနစ်က ဗုံးပေါက်ကွဲတာ၊ အကျယ်ကြီးကြားတာ။ အသံမိုင်းပဲ၊ အိမ်သားတွေလည်း အိမ်မှာ ရှိသေးတယ်။ ပိုက်ဆံတောင်းလို့ မပေးတာ၊ အရင်ရက်က လာပစ်တဲ့ လက်ပစ်ဗုံးက ရဲတွေလာဖြုတ်သွားတယ်။ အခုက ပိုက်ဆံရှိတဲ့ လူတွေတော့ ပိုသတိထားရတယ်။ တချို့လည်း ထွက်ပြေးကုန်ကြပြီ”ဟု မူဆယ်မြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
မူဆယ်မြို့တွင် လက်ပစ်ဗုံး လာရောက်ဖောက်ခွဲခံရသည့် နေအိမ်သည် မတ်လ ၉ နှင့် ၁၀ ရက်တွင်လည်း မူဆယ် PDF အမည်ခံ MDPDF အယောင်ဆောင်အဖွဲ့မှ စနက်တံ မဖြုတ်ရသေးသည့် လက်ပစ်ဗုံး ၂ လုံးကို ပလတ်စတစ်အိတ်နှင့် ထုပ်ပိုး၍ ပေးပို့ခဲ့ပြီး မိသားစုဝင်များ၏ အသက်အန္တရာယ်ကို ခြိမ်းခြောက်ခဲ့ကြောင်း ငွေညှစ်တောင်းခံရသူနှင့် နီးစပ်သူများထံမှ သိရသည်။
“Viber ထဲကနေ စာပို့ခြိမ်းခြောက်ပြီး သိန်း ၅၀၀ တောင်းတာ MDPDF နာမည်နဲ့။ ဘယ်မှလဲ သွားတိုင်လို့မရဘူး၊ တိုင်စရာ နေရာလည်း မရှိဘူး။ သူတို့ စာပို့လာတဲ့အထဲမှာလည်း စကစဆီကိုပဲ တိုင်တိုင်၊ လက်နက်ကိုင်တပ်ဖွဲ့ဆီပဲ တိုင်တိုင် သူတို့မကြောက်ဘူးလို့ ပြောတာ။ လုံးဝကို မလုံခြုံတော့ဘူး”ဟု မူဆယ်မြို့မှ ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။
မူဆယ်မြို့ရှိ ငွေလွှဲလုပ်ငန်း လုပ်ကိုင်သူများထံ ပေးပို့သည့် MDPDF အဖွဲ့၏ ငွေညှစ်ခြိမ်းခြောက်စာတွင် ရှောင်ပြေးခြင်း၊ အခွန်ပေးဆောင်ခြင်း မရှိပါက နေအိမ်ပိုင်ဆိုင်မှုကို ဗုံးခွဲတိုက်ခိုက်သွားမည့်အပြင် လူကို နောက်ယောင်ခံလိုက်၍ ချောင်းပစ်ခတ်ခြင်း၊ ပြန်ပြေးဆွဲ၍ မိခဲ့လျှင် အဆ ၅၀ အထက်ဖြင့် ပြန်ရွေးရမည်ဟု ခြိမ်းခြောက်ရေးသားထားသည်။
မူဆယ် PDF အမည်ခံ MSPDF အယောင်ဆောင်အဖွဲ့နှင့် မြို့ပြပျောက်ကြားအဖွဲ့ အမည်များဖြင့် မြို့ပေါ်ရှိ တရုတ်-မြန်မာ ငွေလဲလုပ်ငန်း၊ ဆောက်လုပ်ရေးလုပ်ငန်း၊ ကားပစ္စည်း၊ လျှပ်စစ်ပစ္စည်းဆိုင်၊ ဖုန်းဆိုင် စသည့် အသေးစားနှင့် အလတ်စားလုပ်ငန်းများ အားလုံးကို အွန်လိုင်းမှစာပို့၍ ငွေညှစ်တောင်းခံသည့်အပြင် အသက်အန္တရာယ် ခြိမ်းခြောက်သည်အထိ ဆိုးရွားနေကြောင်း မူဆယ်ဒေသခံများထံမှ သိရသည်။
မူဆယ်မြို့သည် မြန်မာ – တရုတ် နယ်စပ်ကုန်သွယ်ရေးမြို့ ဖြစ်သည့်အပြင် လက်နက်ကိုင် အဖွဲ့များ နှင့် တရားမဝင် လုပ်ငန်းများ စုံလင်ပေါများသည့် ဒေသဖြစ်သည့်အလျောက် ယခင်က ဖြစ်ပွားခဲ့သည့် ဓားပြတိုက်မှုနှင့် ပြန်ပေးဆွဲမှုများတွင် ကျူးလွန်သူများကို ပြည်သူများမှ ပြန်လည်ဖမ်းဆီးမိလျှင် စစ်ကောင်စီလက်အောက်ခံ လက်နက်ကိုင်ဆောင်သည့် ပြည်သူ့စစ်များသာ ဖြစ်ကြောင်း မူဆယ်ဒေသခံများထံမှ သိသည်။
လက်ရှိတွင် မူဆယ်မြို့နယ်အတွင်း သွားလာလှုပ်ရှားနေသည့် စစ်ကောင်စီလက်အောက်ခံ ပြည်သူ့စစ်အဖွဲ့များမှာ ကောင်းခါး၊ မြို့မ၊ ပန်းဆေး၊ လုံထန်၊ ပိန်းဆာ၊ မန်ဂျယ်၊ စိန်ကျော့၊ မန်ပြိန်း၊ ရှောက်ဟော်၊ တာမိုးညဲ၊ မုံးပေါ် စသည်ဖြင့် ၁၅ ဖွဲ့ထက်မနည်း ရှိနေသည်။
အလားတူ မူဆယ်မြို့နယ်တွင် TNLA ၊ KIA နှင့် SSPP/SSA စသည့် လက်နက်ကိုင် တပ်ဖွဲ့များမှလည်း ပြည်သူလူထုထံ နှစ်စဉ် အခွန်ကောက်ခံသော်လည်း လုံခြုံရေး အာမခံချက် မရှိကြောင်း ဒေသခံများက ပြောသည်။
