မူဆယ်မြို့ တောင်ရပ်ကွက်ရှိ တရုတ်-မြန်မာ ငွေလဲလုပ်ငန်း လုပ်ကိုင်သည့် နေအိမ်သို့ မူဆယ် PDF အယောင်ဆောင်အဖွဲ့ MSPDF က နှစ်ရက်ဆက်တိုက် လက်ပစ်ဗုံး လာရောက်ပစ်ချပြီး Viber မှတဆင့် ငွေညှစ်တောင်းခံစာနှင့် မိသားစုဝင်များကိုလည်း အသက်အန္တရာယ် ခြိမ်းခြောက်ခဲ့ကြောင်း မူဆယ်ဒေသခံများက ပြောသည်။

သျှမ်းပြည် မူဆယ်မြို့တွင် PDF အယောင်ဆောင်အဖွဲ့က ငွေညှစ်တောင်းခံသူထံသို့ ယမန်နေ့ ( မတ် ၉ /မတ်၁၀)ရက်တွင် လက်ပစ်ဗုံး ၂ လုံး ပေးပို့ပြီး အသက်အန္တရာယ် ခြိမ်းခြောက်ခဲ့ကြောင်း စုံစမ်းသိရသည်။

“မနေ့တုန်းက တောင်ရပ်ကွက်မှာ Viber ထဲကနေ စာပို့ခြိမ်းခြောက်ပြီး သိန်း ၅၀၀ တောင်းတာ။ လက်ပစ်ဗုံး ၂ လုံးလည်း ပလတ်စတစ်အိတ်နဲ့ ထုပ်ပြီး အိမ်ခြံဝင်းထဲ လာပစ်သွားတယ်၊ စနက်တံလည်း မဖြုတ်ထားဘူး။ အဲ့လောက်ပိုက်ဆံ မပေးနိုင်ရင် ဒရုန်းဗုံး လာပစ်မယ်လို့ ထပ်ပြီးခြိမ်းခြောက်တယ်၊ အခုက ဘယ်ကိုမှ တိုင်လို့မရတော့ အိမ်ရှင်လည်း ထွက်ပြေးနေရတယ်”ဟု မူဆယ်မြို့မှ ဖြစ်စဉ်သိရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

MSPDF အမည်ဖြင့် မူဆယ် PDF လက်နက်ကိုင်တပ်ဖွဲ့ အယောင်ဆောင်ပြီး ၎င်းတို့ ငွေညှစ်တောင်းခံလိုသူများကို ဓာတ်ပုံနှင့် ဖုန်းနံပါတ်တို့ဖြင့် တစ်ဦးချင်းစီ လိပ်မူပြီး အခွန်ဆောင်ရန် အကြောင်းကြားစာကို Viber မှတဆင့် ပေးပို့ခြိမ်းခြောက်နေကြောင်း မူဆယ်ဒေသခံများက ပြောသည်။

၎င်းငွေညှစ်ခြိမ်းခြောက်စာတွင် ရှောင်ပြေးခြင်း၊ အခွန်ပေးဆောင်ခြင်း မရှိပါက နေအိမ်ပိုင်ဆိုင်မှုကို ဗုံးခွဲတိုက်ခိုက်သွားမည့်အပြင် လူကို နောက်ယောင်ခံလိုက်၍ ချောင်းပစ်ခတ်ခြင်း၊ ပြန်ပြေးဆွဲ၍ မိခဲ့လျှင် အဆ ၅၀ အထက်ဖြင့် ပြန်ရွေးရမည်ဟု ခြိမ်းခြောက်ရေးသားထားသည်။

“Viber ထဲကနေ ပို့လာတာဆိုတော့ သူတို့ Profile ကိုလည်း မတွေ့ရဘူး။ ခြိမ်းခြောက်တဲ့ နည်းကတော့ အတူတူပဲ၊ ဒါပေမယ့် ဘယ်အဖွဲ့လဲဆိုတာ သေချာမသိရဘူး။ သူတို့နဲ့ မညှိနိုင်ရင်တော့ ထွက်ပြေးရုံပဲရှိမှာ။ ဘယ်မှလဲ သွားတိုင်လို့မရဘူး၊ တိုင်စရာ နေရာလည်း မရှိဘူး။ သူတို့ စာပို့လာတဲ့အထဲမှာလည်း စကစဆီကိုပဲ တိုင်တိုင်၊ လက်နက်ကိုင်တပ်ဖွဲ့ဆီပဲ တိုင်တိုင် သူတို့မကြောက်ဘူးလို့ ပြောတာ”ဟု မူဆယ်မြို့မှ ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။

မူဆယ် PDF အမည်ခံ MSPDF အယောင်ဆောင်အဖွဲ့နှင့် မြို့ပြပျောက်ကြားအဖွဲ့ အမည်များဖြင့် မြို့ပေါ်ရှိ တရုတ်-မြန်မာ ငွေလဲလုပ်ငန်း၊ ဆောက်လုပ်ရေးလုပ်ငန်း၊ ကားပစ္စည်း၊ လျှပ်စစ်ပစ္စည်းဆိုင်၊ ဖုန်းဆိုင် စသည့် အသေးစားနှင့် အလတ်စားလုပ်ငန်းများ အားလုံးကို အွန်လိုင်းမှစာပို့၍ ငွေညှစ်တောင်းခံသည့်အပြင် အသက်အန္တရာယ် ခြိမ်းခြောက်သည်အထိ ဆိုးရွားနေကြောင်း မူဆယ်ဒေသခံများထံမှ သိရသည်။

“ကိုယ့်ကို ဘယ်အချိန် ရန်လာလုပ်မလဲ မသိဘူး။ အပြင်ထွက်ရင် ကိုယ့်ကို ဘယ်အချိန် ဖမ်းသွားမလဲ၊ သေနတ်နဲ့လာပစ်မှာလည်း ဗုံးနဲ့လာပစ်မှာလား ဘယ်အချိန်လာမှာလဲဆိုတာလည်း မှန်းလို့မရဘူး။ တချို့ကတော့ သူတို့ငွေညှစ် ခြိမ်းခြောက်ခံရတာကို တိတ်တိတ်လေး ငြိမ်ခံနေတာ တခြားသူကို မပြောပြတာ အများကြီးရှိတယ်။ မူဆယ်က လုံးဝကို မလုံခြုံတော့ဘူး”ဟု မူဆယ်မြို့မှ ငွေလဲလုပ်ကိုင်သူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

မူဆယ်မြို့သည် မြန်မာ – တရုတ် နယ်စပ်ကုန်သွယ်ရေးမြို့ ဖြစ်သည့်အပြင် လက်နက်ကိုင် အဖွဲ့များ နှင့် တရားမဝင် လုပ်ငန်းများ စုံလင်ပေါများသည့် ဒေသဖြစ်သည့်အလျောက် ယခင်က ဖြစ်ပွားခဲ့သည့် ဓားပြတိုက်မှုနှင့် ပြန်ပေးဆွဲမှုများတွင် ကျူးလွန်သူများကို ပြည်သူများမှ ပြန်လည်ဖမ်းဆီးမိလျှင် စစ်ကောင်စီလက်အောက်ခံ လက်နက်ကိုင်ဆောင်သည့် ပြည်သူ့စစ်များသာ ဖြစ်ကြောင်း မူဆယ်‌ဒေသခံများက ပြောသည်။

“ပိုက်ဆံတောင်းတဲ့နည်းက လက်နက်ကိုင်အဖွဲ့တွေနဲ့ မတူဘူး။ သူတို့ကို ပိုက်ဆံတိုက်ရိုက် ထည့်ပေးရတာ မဟုတ်ဘူးဘဲ KPay နဲ့ Wave Money တို့လို နောက်ပြီး ဘဏ်ထဲကို လွှဲပေးရတာမျိုး လုပ်ရမှာ။ အခု ခြိမ်းခြောက်ငွေညှစ်နေတာတွေက နွေဦးတော်လှန်ရေး နာမည်သုံးပြီးတော့ ပြည်သူ့စစ်နဲ့ စစ်ကောင်စီတပ်တွေ ပေါင်းပြီးလုပ်စားနေတာ။ သူတို့က PDF တွေ နာမည်ပျက်အောင် လုပ်တာလည်း ပါမှာ”ဟု မူဆယ်ဒေသခံ ကုန်သည်တစ်ဦးက သျှမ်းသံတော်ဆင့်ကို ပြောသည်။

လက်ရှိတွင် မူဆယ်မြို့နယ်အတွင်း သွားလာလှုပ်ရှားနေသည့် စစ်ကောင်စီလက်အောက်ခံ ပြည်သူ့စစ်အဖွဲ့များမှာ ကောင်းခါး၊ မြို့မ၊ ပန်းဆေး၊ လုံထန်၊ ပိန်းဆာ၊ မန်ဂျယ်၊ စိန်ကျော့၊ မန်ပြိန်း၊ ရှောက်ဟော်၊ တာမိုးညဲ၊ မုံးပေါ် စသည်ဖြင့် ၁၅ ဖွဲ့ထက်မနည်း ရှိနေသည်။

ညီနောင်မဟာမိတ် ၃ ဖွဲ့သည် တရုတ်နိုင်ငံ၏ ကြားဝင်စေ့စပ်ပေးမှုဖြင့် ကူမင်းမြို့၌ စစ်ကောင်စီနှင့် တွေ့ဆုံဆွေးနွေးပြီးနောက်ပိုင်း မူဆယ်မြို့ကို ဝင်ရောက်တိုက်ခိုက်ခြင်း မရှိသော်လည်း မြို့ပတ်ပတ်လည်တွင် ဝိုင်းရံပိတ်ဆို့ထားကြောင်း မူဆယ်ဒေသခံများထံမှ သိရသည်။