ထိုင်း-မြန်မာနိုင်ငံနယ်စပ်ဒေသ တာချီလိတ်မြို့ 1G1 ဟိုတယ်အနီးတွင် ဖမ်းဆီးခံရသည့် အွန်လိုင်းလောင်းကစား လုပ်ကိုင်သူများထဲမှ အသက်မပြည့်သေးသည့်လူငယ်အချို့ ယနေ့ (မတ်လ ၈ ရက်)တွင် ပြန်လွှတ်ပေးမည်ဟု စုံစမ်းသိရသည်။
ယနေ့ (မတ်လ ၈ ရက်) မွန်းလွဲပိုင်းအချိန်တွင် ဖမ်းဆီးထားသည့် အွန်လိုင်းလောင်းကစားလုပ်ကိုင်သူ လူအင်အား ၁၂၀ ခန့်ကို စစ်ကောင်စီက အချုပ်ကား ၂ စီးဖြင့် ခေါ်ထုတ်လာပြီး တာချီလိတ်မြို့ရှိ တရားရုံးသို့ လာရောက်ချထားခဲ့ကြောင်း တာချီလိတ်မြို့ ဒေသခံအမျိုးသားတစ်ဦးက ပြောသည်။
အဆိုပါ တရားရုံးသို့ ခေါ်ဆောင်လာသည့် လူငယ်များသည် အသက် ၁၈ နှစ်အောက် လူငယ်များဖြစ်ပြီး စစ်ကောင်စီက ပြန်လွတ်ပေးရန် စီစဉ်နေကြောင်းဆိုသည်။
“ဖမ်းထားတဲ့လူတွေ ရမန်ပြည့်လို့ ရုံးထုတ်တာဗျ။ အသက်မပြည့်တဲ့ လူတွေတော့ လွတ်ပေးမယ်ပြောတယ်။ မှတ်ပုံတင် အိမ်ထောင်စုဇယား၊ ထောက်ခံစာတွေနဲ့ တိုက်စစ်နေတာတော့ မြင်တယ်။ ဒဏ်ငွေ ဘယ်လောက်ပေး ရမလဲတော့ လောဆယ်ထိတော့ မချမှတ်သေးဘူး” ဟု အထက်ပါ အမျိုးသားတစ်ဦးက ပြောသည်။
ပြီးခဲ့သည့် ဖေဖော်ဝါရီ ၁၃ ရက်က တာချီလိတ်မြို့ 1G1 ဟိုတယ်အနီးရှိ အွန်လိုင်းလောင်းကစားလုပ်ငန်း နေရာကို စစ်ကောင်စီတပ်ဖွဲ့မှ ဝင်ရောက်စီးနင်းမှုကြောင့် နိုင်ငံခြားသားအပါအဝင် မြန်မာနိုင်ငံသား စုစုပေါင်း (၆၈၉) ဦး ဖမ်းဆီးခံထားရခြင်း ဖြစ်သည်။
လက်ရှိတွင် ဖမ်းဆီးခံထားရသည့် အွန်လိုင်းလောင်းကစားလုပ်ကိုင်သူများထဲမှ အသက် ၁၈ နှစ်အောက် လူငယ်များ မည်မျှပါဝင်နေသည်ကို အသေးစိတ်မသိရသေးပေ။
ထို့အပြင် ဆက်လက်ဖမ်းဆီးခံထားရသည့် အွန်လိုင်းလောင်းကစားလုပ်ကိုင်သူ လူငယ်များကိုလည်း စစ်ကောင်စီက ပြန်လွှတ်ပေးရန် အစီစဉ်ရှိ၊ မရှိ သျှမ်းသံတော်ဆင့်မှ စုံစမ်းမေးမြန်းနေခြင်းပင် ဖြစ်သည်။
စစ်တပ်အာဏာသိမ်းပြီးနောက်ပိုင်း မြန်မာနိုင်ငံတွင် စီးပွားရေး၊ ပညာရေး၊ ကျန်မားရေး စသည့်ဖြင့် အဘက်ဘက်မှ ကျဆင်းလာနေပြီး တစ်ဖက်တွင်အလုပ်အကိုင်အခွင့်အလမ်းများ ရှားပါးလာရာ လူငယ်များသည် ရရာအလုပ်လမ်းကြောင်းများကိုရှာဖွေနေရကြောင်း လူငယ်များထံမှ သိရသည်။
ထို့အတူ တာချီလိတ်မြို့တွင်လည်း အွန်လိုင်းလောင်းကစားလုပ်ငန်း၊ အွန်လိုင်းငွေလိမ်ဂိုဏ်း (ကျားဖြန့်လုပ်ငန်း) ပေါများနေသဖြင့် အလုပ်မရှိသည့် လူငယ်များအတွက် အခွင့်အလမ်းဖြစ်နေကြောင်း အသက် ၄၀ ကျော် ဒေသခံတစ်ဦးက ထပ်လောင်းပြောသည်။
“ဒါကတော့ စစ်တပ်အာဏာသိမ်းပြီးနောက်ပိုင်း နောက်ဆက်တွဲတွေပေါ့။ လူငယ်တွေ ကျောင်းမတက်ရတော့ ရရာအလုပ်တွေ လုပ်ကြတယ်။ တာချီလိတ်မှာက အွန်လိုင်းလောင်းကစားတွေ၊ ကျားဖြန့်လုပ်ငန်းတွေ ပေါတော့ လူငယ်တွေအတွက်လည်း အလုပ်အခွင့်အလမ်းပဲ။ ပြီးတော့ လစာကကောင်းတော့ လုပ်ကြတာပေါ့။ အခုတောင် သျှမ်းမြောက်ကရှုပ်နေလို့ အဲ့ဘက်ကလူငယ်တွေ အလုပ်မဖြစ်လို့ ဒီဘက်ကိုပြေးလာကြပြီ” ဟု၎င်းကပြောသည်။
တရုတ်နိုင်ငံ အစိုးရ၏ ဖိအားပေးမှုကြောင့် စစ်ကောင်စီသည် နယ်စပ်တလျှောက်နှင့် မြန်မာနိုင်ငံအတွင်းရှိ အွန်လိုင်းငွေလိမ်ဂိုဏ်း (ကျားဖြန့်လုပ်ငန်) များကို လိုက်လံဖမ်းဆီးပြီး သက်ဆိုင်ရာ နိုင်ငံသို့ပြန်လည်လွှဲပြောင်း ပေးအပ်ခဲ့ရာမှာ (၂၀၂၃ အောက်တိုဘာလ ၅ ရက်မှ ၂၀၂၄ မတ်လ ၅ ရက်အထိ) တရုတ်နိုင်ငံသား ၅၀,၇၇၂ ဦးအပါအဝင် နိုင်ငံခြားသားစုစုပေါင်း ၅၂,၈၂၀ ဦးကို လွှဲပြောင်းပေးနိုင်ခဲ့ပြီဟု စစ်ကောင်စီကထုတ်ပြန်ထားသည်။
Leave a Comments