သျှမ်းပြည်တောင်ပိုင်း ၂ ရက် အတွင်း ယဉ်တိမ်းမှောက်မှုကြောင့် လူ ၉ ဦး သေဆုံးပြီး၊ ၆ ဦးဒဏ်ရာရရှိခဲ့ကြောင်း စုံစမ်းသိရသည်။
သျှမ်းပြည်တောင်ပိုင်းတွင် မတ်လ ၅ ရက် နေ့လည် ၂ နာရီဝန်းကျင်တွင် ရွာငံ – မန္တလေး ပြည်ထောင်စု လမ်းမကြီးရှိ၊ မြို့ကြီးရွာအနီးတွင် Probox ကားတစ်စီး ချောက်ထဲကျသွားပြီး အမျိုးသား ၂ဦး၊အမျိုးသမီး ၄ ဦးသေဆုံးခဲ့ပြီး ကလေး ၁ ဦးဒဏ်ရာအပြင်းအထန်ရရှိခဲ့သည်။
ထိုသေဆုံးသူနှင့် ဒဏ်ရာရရှိသူများ ကျောက်ဆည်ဆေးရုံသို့ ပို့ဆောင်ထားကြောင်း မြန်မာနိုင်ငံ လူမှုကယ်ဆယ်ရေးအဖွဲ့-ရွာငံမြို့နယ်မှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
“ကားက ပေ ၈၀ လောက်မြင့်တဲ့ တောင်ပေါ် ကနေပြုတ်ကျသွားတာ။၇ ယောက်ပါတာကို ၆ ယောက်ဆုံးပြီး။ ကလေး၁ယောက်ပဲ လွတ်တယ်။သူ့ကိုတော့ ဆေးရုံမှာပို့ထားတာပေါ့။ဖြစ်တဲ့နေရာက မြို့ကြီးရွာနဲ့ စခန်းကြီးရွာကြားမှာဖြစ်သွားတာ။”ဟု ၎င်းက ပြောသည်။
ထိုအပြင် ယမန်နေ့ မတ်လ ၆ ရက် ည ၇ နာရီဝန်းကျင်တွင်လည်း တောင်ကြီး ၄ မိုင် ဂိတ်အနီးတွင် ဝက်များ တင်ဆောင်လာသော ကား လမ်းဘေးမြောင်းထဲသို့ တိမ်းမှောက်ခဲ့ပြီးအမျိုးသား ၃ ဦးသေဆုံးခဲ့ပြီး ၅ ဦးအပြင်ထန်ဒဏ်ရာရရှိခဲ့ကြောင်း သိရသည်။