သျှမ်းပြည် နိုဝင်ဘာလ အတွင်း ယာဥ်တိုက်မှုကြောင့် လူ ၁၀ ဦးထက်မနည်း သေဆုံးနေကြောင်း သတင်းရရှိသည်။
နိုဝင်ဘာလအတွင်း ဖြစ်ပွားသည့် ယာဉ်တိုက်မှုခင်းသည် တာချီလိတ်မြို့တွင် အများဆုံးဖြစ်ပြီး ယာဉ်တိုက်မှု ၁၁ ကြိမ်နှင့် သေဆုံးသူ ၃ ဦးရှိသည့်အပြင် ခြေ၊ လက် ကျိုး ထိခိုက်ဒဏ်ရာရရှိသူများလည်း ရှိနေကြောင်း သျှမ်းရှေ့ ယာဉ်ထိန်းရဲတပ်ဖွဲ့များ ထံမှ သိရသည်။
“ ယာဉ်တိမ်းမှောက်၊ ယာဉ်တိုက်မှုတွေ ခဏခဏ ဖြစ်ပါတယ်။ တာချီလိတ်မြို့ ပတ်ဝန်းကျင်မှာ တစ်လကို အနည်းဆုံး ၃ ယောက် သေပါတယ်။ ယာဉ်တိုက်ပြီး ခြေ၊ လက် ကျိုးသွားတဲ့သူတွေလည်း ရှိပါတယ် “ ဟု ၎င်း ယာဉ်ထိန်းရဲတစ်ဦးက သျှမ်းသံတော်ဆင့်ကို ပြောသည်။
ယာဉ်တိုက်မှုကြောင့် တာချီလိတ်မြို့မှာ အမျိုးသား ၃ ဦး၊ သိန္နီမြို့တွင် အမျိုးသား ၂ ဦးနှင့် အမျိုးသမီး ၁ ဦး၊ သီပေါမြို့တွင် အမျိုးသား ၂ ဦး၊ အောင်ပန်းမြို့တွင် အမျိုးသား ၁ ဦးနှင့် တန့်ယန်းမြို့တွင် အမျိုးသား ၁ ဦး စသည့်ဖြင့် သေဆုံးမှု များကြောင်း သိရသည်။
“ တာချီလိတ်မှာတော့ ယာဉ်ထိန်းရဲ နေ့တိုင်းစောင့်တယ်။ ဦးထုပ်မဆောင်း၊ ဆိုင်ကယ် နံပါတ်ပြား မတပ်ရင် ဒဏ်ငွေရိုက်တယ်။ ဆိုင်ကယ် နံပါတ်ပြားမပါရင် တစ်ယောက်ကို ငါးသောင်းပေးရတယ် “ ဟု တာချီလိတ်ဒေသခံ အသက် ၃၀ ကျော် အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် မတော်တဆ ယာဉ်တိုက်မှု မဖြစ်ပွားခင်မှာ ကြိုတင်ကာကွယ်ရန် ဆိုင်ကယ်ဦးထုပ်ဆောင်းခြင်း၊ မေးကြိုးတပ်ဆင်ခြင်းနှင့် ကားမောင်းနှင်သူများလည်း ယာဥ်မောင်းစဉ်အတောအတွင်းမှာ အိပ်ငိုက်ပါက ကားကိုလမ်းဘေးထိုးရပ်၍ ခေတ္တအနားယူပြီးမှသာ ဆက်မောင်းသင့်သည်။
Leave a Comments