Thursday, May 30, 2024

တာချီလိတ် အွန်လိုင်းလောင်းကစား လူငယ် (၅၄၀) ဦး ပြန်မလွှတ်သေး

Must read

ထိုင်း-မြန်မာနယ်စပ်ဒေသ တာချီလိတ်မြို့တွင် ဖမ်းဆီးခံထားရသည့် အွန်လိုင်းလောင်းကစားလုပ်ကိုင်သည့် မြန်မာနိုင်ငံသားလူငယ် (၅၄၀) ဦး ရက်သတ္တ ၂ ပတ်ကြာ ပြန်မလွှတ်သေးကြောင်း စုံစမ်းသိရသည်။

တာချီလိတ်မြို့ 1G1 ဟိုတယ်အနီးရှိ အွန်လိုင်းလုပ်ငန်းနေရာကို ဖေဖော်ဝါရီလ ၂၃ ရက် ညပိုင်းက စစ်ကောင်စီတပ်ဖွဲ့မှ ဝင်ရောက်စီးနင်းခဲ့ရာ နိုင်ငံခြားသားအပါအဝင် မြန်မာနိုင်ငံသား လူငယ် စုစုပေါင်း (၆၈၉) ဦး ဖမ်းဆီးခံရခြင်းဖြစ်သည်။

အဆိုပါ ဖမ်းဆီးခံထားသည့် အွန်လိုင်းလောင်းကစား (၆၈၉) ဦးအနက် တရုတ်နိုင်ငံသား ၁ ဦးနှင့် ထိုင်းနိုင်ငံသား ၁၄၇ ဦးကို သက်ဆိုင်ရာ နိုင်ငံသို့ပြန်လွှဲပေးရန် စစ်ကောင်စီက စီစဉ်ထားသော်လည်း မြန်မာနိုင်ငံသားလူငယ် (၅၄၀) ဦးကိုမှု ဆက်လက်ထိန်းသိမ်းထားမည်ဟုသိရသည်။

“မြန်မာနိုင်ငံသား ၅၀၀ ကျော်ကိုတော့ ထိန်းသိမ်းထားတုန်းပဲ။ တချို့မိဘတွေကတော့ အဆောက်အဦးရှေ့မှာ သွားသွားပြီးစောင့်နေတာ။ ဒီနေ့ကို ထောင်ဝင်စာ ၂ ခေါက်သွားပို့ပြီး ဟိုနေ့လွှတ်မလိုလို၊ ဒီနေ့လွှတ်လွတ် မျှော်နေတာပေါ့ဗျာ” ဟု တာချီလိတ်မြို့ အသက် ၃၀ကျော်အရွယ်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် ဖမ်းဆီးထားသည့် လူငယ်များကို တာချီလိတ်မြို့ ဆေးခမ်းရပ်ကွက်အတွင်းရှိ အဆောက် အဦးနေရာတွင်ထားရှိကြောင်း သိရသည်။

အလားတူ တာချီလိတ်မြို့ ပုန်းထွန်ရပ်ကွက်၊ စိမ်းလန်းသောတောင်အနီး တည်ရှိသည့် အွန်လိုင်းငွေလိမ်ဂိုဏ်း (ကျားဖြန့်လုပ်ငန်း) နေရာကို မတ်လ ၅ ရက် ညပိုင်းက စစ်ကောင်စီက ထပ်မံဝင်ရောက်စီးနင်းရာ လူတစ်ရာကျော် ဖမ်းဆီးခံရကြောင်း တာချီလိတ်မြို့ဒေသခံတစ်ဦးကပြောသည်။

“တရုတ် ၆၀ ကျော် ဖမ်းခံရတယ်ကြားတယ်။ လားဟူလူမျိုး သူဌေးပိုင်တဲ့ အဆောက်အဦးမှာ ဝမ်ဖမ်းတာပါ။ အရင်က သူတို့ရဲတွေ၊ စစ်တပ်တွေကို တော်တော်ပိုင်တယ်။ အခုအထက်က ဆင်းဖမ်းတော့မှ သူလည်းဘာမှ မတတ်နိုင်ဘူး” ဟု ၎င်းကပြောသည်။

ပြီးခဲ့သည့် ဇန်နဝါရီလ ၁၂ ရက်က စစ်ကောင်စီ ဥက္ကဋ္ဌနှင့် ထိုင်းတပ်မတော် ကာကွယ်ရေးဦးစီးတို့သည် ထိုင်း-မြန်မာနယ်စပ်တလျောက် အွန်လိုင်းငွေလိမ်ဂိုဏ်း (ကျားဖြန့်လုပ်ငန်း)များကို ပူးပေါင်းနှိမ်နှင်းသွားမည်ဟု သဘောတူညီခဲ့ပြီးနောက် စစ်ကောင်စီဘက်မှ ယခုကဲ့သို့ဖမ်းဆီးမှုများ ဆက်တိုက်လုပ်ဆောင်လာလျက်ရှိသည်။

တရုတ်နိုင်ငံ အစိုးရ၏ ဖိအားပေးမှုကြောင့် စစ်ကောင်စီသည် နယ်စပ်တလျှောက်နှင့် မြန်မာနိုင်ငံအတွင်းရှိ အွန်လိုင်းငွေလိမ်ဂိုဏ်း (ကျားဖြန့်လုပ်ငန်း) များကို လိုက်လံဖမ်းပြီး သက်ဆိုင်ရာနိုင်ငံသို့ ပြန်လည်လွှဲပြောင်းပေးအပ်ခဲ့ရာ ၂၀၂၃ အောက်တိုဘာလ ၅ ရက်မှ ၂၀၂၄ မတ်လ ၅ ရက်အထိ တရုတ်နိုင်ငံသား ၅၀,၇၇၂ ဦးအပါအဝင် နိုင်ငံခြားသား စုစုပေါင်း ၅၂,၈၂၀ ဦးကို လွှဲပြောင်းပေးနိုင်ခဲ့ကြောင်း စစ်ကောင်စီက မတ်လ ၆ ရက်၌ ထုတ်ပြန်ထားသည်။

Leave a Comments

- Advertisement -spot_img

Latest article