Sunday, May 26, 2024

ဆီဆိုင်မြို့ စစ်ဘေးရှောင်များကို အကြောင်းပြုပြီး ငွေလိမ်လည်မှုရှိနေ

Must read

တိုက်ပွဲကြောင့် ဆီဆိုင်မြို့မှ ထွက်ပြေးတိမ်းရှောင်လာသည့် စစ်ဘေးရှောင်ပုံများအား အသုံးပြု၍ လူမှုကွန်ရက် စာမျက်နှာများပေါ်မှတစ်ဆင့် အလှူခံကာ ငွေလိမ်လည်နေလျက်ရှိသည်။

အများပြည်သူဒုက္ခရောက်နေချိန်တွင် အခွင့်ကောင်းယူပြီး အလှူခံကာ ငွေလိမ်လည်နေသဖြင့် သတိပြုရန် လိုအပ်သည်။

ယခုရက်ပိုင်းအတွင်း လှုမှုကွန်ရက်စာမျက်နှာပေါ်တွင် Khain Zar Lwin ဆိုသည့်အကောင့်နာမည်ဖြင့် “ အလှူခံ Post လေးပါ။ စစ်စံထွန်း ဆေးရုံသို့ရောက်ရှိ ဆေးကုသနေ။ လူကိုယ်တိုင်သွားရောက်နိုင်ပါသည်။ K-pay နံပါတ်…” ဟုဆိုကာ ဒဏ်ရာရထားသည့် အမျိုးသမီးဓာတ်ပုံနှင့်အတူ ဖြန့်ဝေထားသည်။

သျှမ်းသံတော်ဆင့် အချက်အလက် စစ်ဆေးသူများအနေဖြင့် အဆိုပါအကြောင်းအရာကို စစ်ဆေးမှု ပြုလုပ်ခဲ့သည်။

ထိုအမျိုးသမီးဓာတ်ပုံဟာ တောတောင်အတွင်း ထွက်ပြေးတိမ်းရှောင်နေစဉ်က မှတ်တမ်းရိုက်ယူထားသည့် ဓာတ်ပုံဖြစ်ပြီး၊ အဆိုပါအမျိုးသမီးက ဒဏ်ရာရရှိထားသဖြင့် ခွဲစိတ်ကုသရန် အကူအညီလို အပ်နေကြောင်း ကာယကံရှင်များက ဖေဖော်ဝါရီလ ၂၇ ရက်၌ အလှူခံပိုစ့်တောင်းခံထားခြင်း ဖြစ်သည်။

ဤသို့အကူညီတောင်းခံခြင်းပုံကို တချို့ကပြန်လည်ကူးယူပြီး ဖော်ပြကာ အလှူခံသလိုဟန်ဆောင်ကာ ငွေလိမ်လည်နေကြောင်း ကာယကံရှင်ဖြစ်သူကဆိုသည်။

အလားတူ ဆီဆိုင်မြို့မှ ထွက်ပြေးတိမ်းရှောင်လာသည့် စစ်ဘေးရှောင် စုစုပေါင်း ၁၇ ဦး ပတ္တမြားဂူအတွင်း ပိတ်မိနေသဖြင့် အကူညီလိုအပ်နေကြောင်း၊ ကလေးငယ်များ စားနပ်ရိက္ခာလိုအပ်နေကြောင်း လူမှုကွန်ရက်စာမျက်နှာပေါ်မှရေးသားထားသည့် သတင်းမှားယွင်းနေသည်။

စစ်ဘေးရှောင်များကိုအကြောင်းပြု၍ ငွေလိမ်လည်နေခြင်းဖြစ်သည်ဟု ကိုယ်တိုင်ကြုံတွေ့ခဲ့သူတစ်ဦးက ပြောသည်။

“စစ်ဘေးရှောင်တွေ စားဖို့သောက်ဖို့မရှိဘူး ကူညီပါဆိုပြီး ပြောလာတယ်။ ပိုက်ဆံတောင်းလာပါတယ်။ ဦးဇင်းက ငွေမလွှဲပေးဘဲ ကိုယ်တိုင်သွားလှူမယ်ဆိုပြီး ဟင်းသီးဟင်းရွက်၊ ပစ္စည်းတွေဝယ်ပြီး သွားတယ်။ ဟိုရောက်တော့ တကယ်လည်း စစ်ဘေးရှောင်တွေ မရှိဘူး” ဟု ၎င်းကပြောသည်။

ယင်းကဲ့သို့ စစ်ဘေးရှောင်အကြောင်းပြုပြီး ငွေလိမ်လည်ခြင်းပြုလုပ်မှုကြောင့် မြေပြင်တွင် ဒုက္ခရောက်နေသည့် စစ်ဘေးရှောင်များထံ အကူညီမရောက်သည့်အပြင် ကူညီသူများအနေဖြင့်လည်း ငွေလိမ်ခံရပြီး စစ်ဘေးရှောင်များကို ထပ်မံကူညီရန် စိတ်ကသိကအောင့်ဖြစ်စေကြောင်း ဆိုသည်။

“အခုချိန်မှာ စစ်ဘေးရှောင်တွေ အမှန်တကယ်အကူညီလိုအပ်နေတာပါ။ စားဖို့သောက်ဖို့ တကယ် ခက်ခဲနေတယ်။ ဒါကိုတချို့က အခွင့်ကောင်းယူပြီး ငွေလိမ်တာက မကောင်းပါဘူး။ မြေပြင်မှာရှိတဲ့ စစ်ဘေးရှောင်တွေထံ အကူညီမရောက်သလို ကူညီတွေသူအနေနဲ့ စေသနာ ပျက်ပြားစေပါတယ်” ဟု ဆီဆိုင်မြို့ ဒေသခံတစ်ဦးက တောင်းဆိုထားသည်။

သျှမ်းသံတော်ဆင့် စာဖတ်ရိတ်သတ်များအနေဖြင့် လူမှုကွန်ရက်စာမျက်နှာပေါ်တွင် ပျံ့နှံ့နေသည့် သတင်းများကို ချက်ချင်းမယုံဘဲ ယုံကြည်ရသည့် သတင်းဌာနများသို့ သွားရောက်ဖတ်ရှု၊ ကြည့်ရှုရန် တိုက်တွန်းပါသည်။

SHANBurmese

Shannews

သျှမ်းသံတော်ဆင့်

ဆီဆိုင်မြို့ #စစ်ဘေးရှောင် #ငွေလိမ်လည်

SHANBurmese

Shannews

သျှမ်းသံတော်ဆင့်

စစ်ကောင်စီ #ပြည်သူ့စစ် #ပျူစောထီး

Leave a Comments

- Advertisement -spot_img

Latest article