Saturday, July 13, 2024

တောင်ကြီးမြို့ ဘားဆိုင် အတွင်း စစ်ကောင်စီ က လူငယ် ၂ ဦးဖမ်း ပိုက်ဆံဖြင့် ပြန်ရွေးထုတ်ခိုင်း

Must read

သျှမ်းပြည် တောင်ကြီးမြို့တွင် စစ်ကောင်စီတပ်ဖွဲ့မှ လူငယ်များရှိရာ Bar ဆိုင်နှင့် နေအိမ် အတွင်းသို့ ရှောင်တခင် ဧည့်စာရင်း ဝင်ရောက်စစ်ဆေးပြီး လူငယ် ၂ ဦးဖမ်းဆီးခဲ့ကြောင်း စုံစမ်းသိရသည်။

ယမန်နေ့ (ဖေဖော်ဝါရီလ ၁၈ ရက်) ညပိုင်းတွင် စစ်ကောင်စီက တောင်ကြီးမြို့ ဘုရားဖြူရပ်ကွက် အတွင်းသို့ ရှောင်တခင်ဧည့်စာရင်း ဝင်ရောက်စစ်ဆေးရာ 1964 Bar ဆိုင်အတွင်းရှိ လူငယ်အမျိုးသား ၂ ဦးကို ဖမ်းဆီးသွားသည်။

ထိုဖမ်းဆီးခံရသည့် လူငယ် ၂ဦးကို ၎င်းတို့မိသားစုဝင်များက တစ်ဦးလျှင် ပိုက်ဆံကျပ်သိန်း ၂၀ ဖြင့် ညတွင်းချင်းပြန်ရွေးထုတ်ခဲ့ရကြောင်း အမည်မဖော်လို ဒေသခံတစ်ဦးက သျှမ်းသံတော်ဆင့်ကိုပြောသည်။

“မနေ့က ဘုရားဖြူ 1964 Bar ဆိုင်မှာ လူငယ် ၂ ဦးဖမ်းကို စစ်ကောင်စီတပ်က ဖမ်းသွားတယ်။ မိသားစုတွေက တစ်ယောက်ကို ပိုက်ဆံ သိန်း ၂၀ နဲ့ ပြန်ရွေးထုတ်ရတယ်” ဟု ၎င်းက ပြောသည်။

Photo by Sai Moe/ တောင်ကြီးမြို့ အပေါ်မြင်ကွင်း

အလားတူ သစ်တောရပ်ကွက်တွင်လည်း စစ်ကောင်စီတပ်ဖွဲ့မှ ရှောင်တခင် ဧည့်စာရင်း ဝင်ရောက်စစ်ခဲ့သေးကြောင်း တောင်းကြီးမြို့ဒေသခံ အမျိုးသားတစ်ဦးက ဆက်ပြောသည်။

“အခုသူတို့ဧည့်စာရင်းကိစ္စကို ပြန်ပြီးတင်းကြပ်ထားတယ်။ မနေ့ကသစ်တောနဲ့ ဘုရားဖြူဘက်မှာတော့ ရှောင်တခင် ဝင်စစ်နေတယ်။ အခုသူတို့လုပ်နေတာက ပြည်သူလူထုကို ခြိမ်းခြောက်နေတာပဲ”ဟု ၎င်းဒေသခံတစ်ဦးက ပြောသည်။

စစ်ကောင်စီမှ နိုင်ငံသားတိုင်း စစ်မှုထမ်းရန်အတွက် (ဖေဖော်ဝါရီလ ၁၀ ရက်) ကတည်းက ဥပဒေထုတ်ပြန်လာပြီးနောက် တောင်ကြီးမြို့တွင် တကိုယ်လုံး ဓာတ်ပုံနှင့်အတူ မှတ်ပုံတင်မိတ္ထူကို ပူးတွဲ ဧည့်စာရင်းတိုင်ကြားရန် စစ်ကောင်စီက လက်အောက်ခံ အုပ်ချုပ်ရေးမှူးများက ညွှန်းကြားထားခြင်း ဖြစ်သည်။

ယခင်က ဧည့်စာရင်းတိုင်ကြားရာတွင် အမည်၊ မိဘအမည်၊ မှတ်ပုံတင်အမှတ်၊ အလုပ်အကိုင်နှင့် နေရာများပါ ဧည့်စာရင်းစစ်သည့် ဇယားပုံစံကို တင်ပြရသော်လည်း ယခုတစ်ခါတွင် တကိုယ်လုံး ဓာတ်ပုံနှင့်အတူ မှတ်ပုံတင်မိတ္ထူကို ပူးတွဲတင်ပြရကြောင်း တောင်ကြီးမြို့ခံများက ပြောသည်။

ယင်းကဲ့သို့ ရှောင်တခင် ဧည့်စာရင်းဝင်ရောက် စစ်ဆေးမှုနှင့် ပတ်သက်၍ တောင်ကြီးမြို့များက လုံခြုံရေး စိုးရိမ်နေကြသည်။

“အခုစစ်မှုထမ်း ကိစ္စကလည်းရှိနေတော့ ဧည့်စာရင်းမတိုင်ထားရင် သူတို့အတွက်လုပ်စားဂွင် ဝင်သွားမှာ သေချာတယ်။ ဧည့်စာရင်းမတိုင်ရင် စစ်မှုထမ်းဖို့ ခေါ်သွားမှာလား ပြောမရဘူး။ ခေါ်သွားပြီး ပေါ်တာထည့်၊ တရားစွဲ၊ စစ်မှုထမ်း၊ ငွေညစ်အမျိုးစုံ လုပ်နိုင်တယ်” ဟု အသက် ၃၀ ကျော် အမျိုးသားတစ်ဦးက ပြောသည်။

ထို့အပြင် တောင်ကြီးမြို့တွင် စစ်ကောင်စီထံ စစ်မှုထမ်းရန်အတွက် ရပ်ကွက်အုပ်ချုပ်ရေးမှုးမှ ဦးဆောင်ပြီး အိမ်ထောင်စုစာရင်း လိုက်လံကောက်ခံသွားမည်ဖြစ်သကဲ့သို့ ညောင်ရွှေမြို့နယ်နှင့် အောင်ပန်းမြို့နယ်တွင်လည်း ဧည့်စာရင်းတိုင်ကြားရန် စစ်ကောင်စီက အမိန့်ထုတ်ထားသည်။

Leave a Comments

- Advertisement -spot_img

Latest article