သျှမ်းပြည် တာချီလိတ်မြို့ရှိ နဂါးနှစ်ကောင်ကျောင်းတိုက် ဦးစီးပဓာနနာယက ဆရာတော် ဒေါက်တာဘဒ္ဒန္တ ဓမ္မသီရိသည် ယနေ့ (ဖေဖော်ဝါရီလ ၈ ရက်) နံနက်ခင်းတွင် ပျံလွန်သွားခဲ့ကြောင်း စုံစမ်းသိရသည်။
တာချီလိတ်မြို့မှ နဂါးနှစ်ကောင်ကျောင်းတိုက် ဆရာတော် ဒေါက်တာဘဒ္ဒန္တ ဓမ္မသီရိသည် သျှမ်းထေရ်ကြီးဝါကြီး ဆရာတော်တစ်ပါးဖြစ်ပြီး သက်တော် ၉၇ နှစ်၊ ဝါတော် ၇၇ ဝါတွင် သက်ကြီးရောဂါဖြင့် ယနေ့ (ဖေဖော်ဝါရီလ ၈ ရက်) နံနက်ခင်းတွင် ဘဝနတ်ထံ ပျံလွန်သွားခဲ့ကြောင်း တာချီလိတ်မြို့ ဒေသခံများက ပြောသည်။
“ကျန်းမာရေး မကောင်းတာကြာပြီ၊ ထိုင်းမှာ ဆေးသွားကုပြီး ပြန်လာကတည်းက အမြဲကြည့်ပေးတဲ့ ဆရာဝန်တစ်ယောက် ထားပေးတယ်။ အသက်ကြီးတာလည်း ဖြစ်မှာပေါ့၊ ခုရက်ပိုင်း အတော်အေးတယ် သမားတော်တွေလည်း အမြဲလာကြည့်ပေးတယ်။ ဒီမနက် သန်းခေါင်ကျော်မှာ ပျံလွန်သွားတယ်”ဟု တာချီလိတ်မြို့မှ နဂါးနှစ်ကောင် ဆရာတော်နှင့် နီးစပ်သည့် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
ဆရာတော်၏ ရုပ်ကလာပ်ကို နဂါးနှစ်ကောင်ကျောင်းတိုက် စံကျောင်းပေါ်တွင် ပင့်ဆောင်ထားပြီး လာမည့် သင်္ကြန်ကာလ ဧပြီလ ၆ ရက်နေ့တွင် အန္တိမအဂ္ဂိဈာပန ကျင်းပသွားမည်ဖြစ်ကြောင်း ဂေါပကအဖွဲ့များထံမှ သိရသည်။
ပြီးခဲ့သည့် ၂၀၂၁ ခုနှစ် စစ်အာဏာသိမ်းခါစတွင် စစ်ကောင်စီခေါင်းဆောင် မင်းအောင်လှိုင် ကိုယ်တိုင် နဂါးနှစ်ကောင်ကျောင်းတိုက် ဆရာတော်ထံသို့ “အဘိဓဇမဟာရဋ္ဌဂုရု”ဘွဲ့တံဆိပ်တော်ကို တာချီလိတ်မြို့အထိ လာရောက်ဆက်ကပ်လှူဒါန်းခဲ့သည်။
