သျှမ်းပြည် လားရှိုးမြို့တွင် စစ်ကောင်စီတပ်က အရပ်သားတစ်ဦးကို သေနတ်ဖြင့် အကြောင်းမဲ့ ထပ်မံပစ်သတ်ခဲ့ကြောင်း စုံစမ်းသိရသည်။
ဇန်နဝါရီလ ၂၁ ရက် နေ့လယ် ၁၁ နာရီကျော်ခန့်က လားရှိုးမြို့ ရပ်ကွက်(၅) ရေကန်တောင်လမ်းနှင့် ၄၉ လမ်းထောင့်တွင် လှည့်ကင်းစောင့်နေသည့် စစ်ကောင်စီတပ်သားများက ဆိုင်ကယ်မောင်းနှင်လာသည့် အရပ်သားတစ်ဦးကို သေနတ်ဖြင့် အကြောင်းမဲ့ ပစ်သတ်ခဲ့ကြောင်း လားရှိုးဒေသခံများက ပြောသည်။
“သစ်တောရုံးမှာ ပစ်သတ်ခံရတဲ့တစ်ယောက်ဆိုရင် နားကြပ်တပ်ပြီး ဆိုင်ကယ်စီးလာတာ။ တားတာ မရပ်တဲ့အခါကျတော့ ၄၉ လမ်းထဲကို လှည့်ဝင်တဲ့အချိန် ပစ်သတ်ခံရတာ။ ခေါ်တာမထူးလို့ ဆိုပြီးတော့ သေနတ်နဲ့ပစ်လိုက်တာလို့ပြောတယ်။ နေ့ခင်း ၁၁ နာရီအချိန်ဖြစ်တာ။ အသက်ကတော့ ၄၀ ကျော်အရွယ်ဖြစ်မယ်။ ၂၁ ရက်နေ့က ဖြစ်သွားတာ”ဟု လားရှိုးမြို့မှ ဖြစ်စဉ်သိရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် လားရှိုးမြို့ စစ်ကောင်စီတပ်သည် လမ်းဆုံလမ်းခွများ၌ စစ်သားများကို လှည့်ကင်းအဖြစ် ချထားပြီး ၎င်းတို့က မသင်္ကာသူဟု ယူဆသူများကို ဖုန်းပါမကျန် တင်းတင်းကျပ်ကျပ် ခေါ်ယူစစ်မေးနေကြောင်း လားရှိုးဒေသခံများထံမှ သိရသည်။
“လားရှိုးမှာတော့ စစ်ကောင်စီတပ်က နေ့တိုင်း ဖမ်းတာဆီးတာ ရှိနေတာပဲ။ သူတို့က လမ်းဆုံလမ်းခွနဲ့ လမ်းကြိုလမ်းကြားတွေပါမကျန် ကင်းစောင့်နေတာ အခုက။ ဘာရဲမှ မပါဘူး၊ သူတို့စစ်သားတွေပဲ။ သူတို့ပစ်သတ်လို့ သေသွားရင်လည်း ကားနဲ့တခါတည်း လာတင်သွားတာ။ သေသွားတဲ့လူရဲ့ အိမ်သားတွေပါ ထပ်ကြောက်နေရတယ်”ဟု လားရှိုးမြို့မှ ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။
အလားတူ ဇန်နဝါရီလ ၂၄ ရက် ညအချိန်တွင် လားရှိုးမြို့ စစ်ကောင်စီလက်အောက်ခံ တပ်နှင့်ရဲ ပူးပေါင်းအဖွဲ့များက ရပ်ကွက်(၁၂)ရှိ ပြည်သူနေအိမ်များကို ဧည့်စာရင်း ရှောင်တခင် ဝင်ရောက်စစ်ဆေးပြီး အမျိုးသမီး ၂ ဦးအပါအဝင် လူငယ် ၃ ဦးကို ဖမ်းဆီးခေါ်ဆောင်သွားကြောင်း လားရှိုးဒေသခံများက ပြောသည်။
ထို့အပြင် ဇန်နဝါရီလ ၁၆ ရက်ကလည်း ည ၇ နာရီခန့်တွင် လားရှိုးမြို့နယ် ပန်နားကျေးရွာ အုပ်စု ဝိန်းစုံရွာနေ အမျိုးသားတစ်ဦးသည် မီးသွေးသွားရောင်းပြီး အလောတကြီးအိမ်ပြန်လာစဉ် AD ဂိတ်တွင်ရှိသည့် စစ်ကောင်စီ တပ်သားက သေနတ်ဖြင့်ပစ်ခတ်ခဲ့၍ ထိုနေရာ၌ ပွဲချင်းပြီး သေဆုံးသွားခဲ့ကြောင်း လားရှိုးဒေသခံများထံမှ သိရသည်။
အရှေ့မြောက် တိုင်းစစ်ဌာနချုပ် (ရမခ)မှ လားရှိုးမြို့နယ်တွင် နိုဝင်ဘာလ ၁၅ ရက်က မာရှယ်လော စတင်ထုတ်ပြန်ခဲ့ပြီး ည ၆ နာရီမှ နံနက် ၆ နာရီအတွင်း ညမထွက်ရအမိန့် မလိုက်နာသူများကို ဖမ်းဆီးအရေးယူခဲ့သည့် နှစ်လကျော်အတွင်း လူ ၈ ဦးထက်မနည်းကို စစ်ကောင်စီက ပစ်သတ်ခဲ့ကြောင်း လားရှိုးဒေသခံများက ပြောသည်။
Leave a Comments