သျှမ်းပြည်နယ် တောင်ပိုင်း၊ ပင်လောင်းမြို့နယ်မှာ ဖယ်ခုံမြို့သို့ စစ်ကူလာသည့် စစ်ကောင်စီတပ် ယနေ့ (ဇန်နဝါရီ ၁၆ ရက်၊ နံနက် ၉ နာရီ ၁၅ မိနစ်ခန့်က တိုက်ခိုက်ခံရသဖြင့် ပြန်လည် ဆုတ်ခွာသွားကြောင်း စစ်ရေးသတင်းရင်းမြစ်က ပြောသည်။
အဆိုပါ စစ်တပ် စစ်ကြောင်း ဖယ်ခုံ မီးရထား၀န်း အနီး တိုက်ခိုက်ခံရရာ စစ်သား ၃ ဦး ဒဏ်ရာရရှိခဲ့ပြီးနောက် ဆုတ်ခွာ ထွက်ပြေးသွားသည်ဟု သတင်းရင်းမြစ်က ဆိုသည်။
“၃၅ မိနစ်လောက် တိုက်ပွဲဖြစ်တယ်။ အင်အားမမျှလို့ ပြန်ဆုတ်ခဲ့ရတယ်လို့ သိရပါတယ်” ဟု တပ်တွင်း သတင်းရင်မြစ်က အတည်ပြု ပြောသည်။
လက်ရှိ ဖယ်ခုံမြို့မရဲစခန်း အပါအ၀င် ဌာနဆိုင်ရာရုံး အများစုကို တော်လှန်ရေးတပ်ပေါင်းစုက ထိန်းချုပ်ထားပြီး မြို့တွင်း တိုက်ပွဲများ ဆက်လက်ဖြစ်ပွားနေဆဲ ဖြစ်ကြောင်း သတင်းရင်းမြစ်က ဆိုသည်။
ဖယ်ခုံမြို့တွင် စစ်ကောင်စီတပ်နှင့် တော်လှန်ရေး တပ်ပေါင်းစုတို့ ဇန်နဝါရီလ ၇ ရက်မှစ၍ တိုက်ပွဲများ ပြန်လည် ပြင်းထန်လာပြီး စစ်ကောင်စီမှ လေကြောင်းသုံးကာ တိုက်ခိုက်မှုများ ပြုလုပ်ခဲ့ကြောင်း စစ်ဘေးရှောင် တစ်ဦးက သျှမ်းသံတော်ဆင့်ကို ပြောဆိုထားသည်။
လက်ရှိ ဖယ်ခုံမြို့ကို KNDF၊ ပြည်သူ့ကာကွယ်ရေးတပ်မတော် (PDF) တပ်ရင်းများ အပါအဝင် ကရင်နီ အခြေစိုက် တော်လှန်ရေး အင်အားစုများ ပူးပေါင်း တိုက်ခိုက်နေသည်ဟု သိရသည်။
ဖယ်ခုံမြို့နယ်အတွင်း စစ်ကောင်စီ ခြေမြန်တပ်ရင်းများဖြစ်သည့် အမှတ် (၃၃၆) နှင့် (၄၂၁) တပ်ရင်းများ ရှိနေပြီး အမှတ် (၇) စစ်ဆင်ရေးကွပ်ကဲမှုဌာနချုပ် (စကခ) အခြေစိုက်သည်။
ဖယ်ခုံမြို့နယ်အတွင်းရှိ ရွှေပြည်အေးနှင့် လွယ်ပတာ စခန်းကုန်းများကို ဒီဇင်ဘာလ ၂၃၊ ၂၄ နှင့် ၂၅ ရက် တို့တွင် သိမ်းပိုက်ရရှိခဲ့သည်ဟု တော်လှန်ရေး တပ်ပေါင်းစုက ထုတ်ပြန်ထားသည်။
Leave a Comments