သျှမ်းပြည် ရွာငံမြို့နယ်တွင် တဆင့်ခံ ပွဲစားများက နိုင်ငံရေးမကောင်းမှုကို အခွင့်ကောင်းယူပြီး စျေးနှိမ်ကာ ကော်ဖီစိုက်တောင်သူများဝယ်ယူနေကြောင်း စုံစမ်းသိရှိရပါသည်။
သျှမ်းတောင်၊ ရွာငံမြို့နယ်တွင် ယခုအချိန်အခါသည် ကော်ဖီအမှည့်သီးများ ထွက်သည့် ရာသီဖြစ်သည်။
ကော်ဖီစိုက်တောင်သူများသည် ကော်ဖီစက်ရုံများနှင့် တိုက်ရိုက်အဆက်သွယ်မရှိကြသကဲ့သို့ လမ်းပန်းဆက်သွယ်ရေး အခက်ခဲကြောင့် ကော်ဖီစက်ရုံအထိ သွားရောက် မရောင်းနိုင်ဘဲ ပွဲစားများမှ တဆင့်ခံ ရောင်းရသည့်အတွက် စျေးကောင်းဖြင့် မရောင်းရကြောင်း စုံစမ်းသိရှိရသည်။
ကော်ဖီစက်ရုံတွင် ကော်ဖီသီးမှည့် ပေါက်စျေး တစ်ပြည် ကျပ်ငွေ ၄ထောင်ကျပ်ဖြစ်ပါက ပွဲစားများက လိုက်လံ ဝယ်သူသောအခါတွင် တစ်ပြည်လျှင် (၂၅၀၀)နှုန်းဖြင့်သာ ဝယ်ယူရကြောင်းကို ကော်ဖီသီး လိုက်ဝယ်နေသူတစ်ဦးထံမှ သိရပါသည်။
ကော်ဖီစိုက် တောင်သူများသည် ထိုသို့စျေးထက်ဝက်ဖြင့် ရောင်းနေရသည်မှာ ကော်ဖီသီးတွေဟာ အမှည့်မညီ၍ ကြာရှည်ထား၍ မရတာကြောင့် ပေးသည့်စျေးနှင့်သာ အမြန်ရောင်းကြရကြောင်း ဒေသခံတစ်ဦးကဆိုသည်။
“ကော်ဖီက မှည့်တဲ့အလုံးက မှည့်နဲ့ မညီဘူး။ ကြာကြာထားလို့မရဘူးလေ။ အမှည့်လွန်ပြီး ကြွေကုန်မှာစိုးလို့ လာဝယ်တဲ့စျေးနဲ့ပဲ ရောင်းပေးလိုက်တယ်။ စျေးကောင်းတဲ့အထိစောင့်ရင် ကော်ဖီကြွေကုန်တယ်။ အသီးတွေများတဲ့ အချိန်ဆို စျေးကမရှိဘူး။ အခု အသီးကုန်ခါနီးကျတော့ ဈေးက တက်လာတယ်။ ဘာလုပ်လို့ရတော့မှာလဲ။ငါတို့ကော်ဖီစိုက်တဲ့သူတွေ နာတာပေါ့။ “လို့ ဆိုပါသည်။
ယခင် ကော်ဖီသီးမှည့် စပေါ်ချိန်တွင် ကော်ဖီသီးမှည့်စျေးသည် တစ်ပြည်လျှင် (၂၅၀၀) ဝန်းကျင်သာရှိပြီး ယခု ကော်ဖီသီးမှည့် ကုန်ချိန်တွင် တစ်ပြည်ကို (၄၅၀၀) အထိရှိလာပြီဖြစ်သော်လည်း တောင်သူများတွင် ရောင်းစရာမကျန်ရှိတော့ကြောင်း သိရသည်။
