သျှမ်းပြည် ဖယ်ခုံမြို့ရှိ ရပ်ကွက်အချို့နှင့်ရဲစခန်းအပါအဝင် အစိုးရဌာနများကို ကရင်နီတော်လှန်ရေးတပ်ဖွဲ့များမှ ထိန်းချုပ်နိုင်ခဲ့ပြီးနောက် စစ်ကောင်စီမှ လေကြောင်းဖြင့် လက်နက်ကြီးပစ်ခတ်မှုရှိနေကြောင်းသိရသည်။

ဖယ်ခုံမြို့ရှိ မြို့မရဲစခန်းအပါအဝင် အစိုးရဌာနရုံးများကို ယမန်နေ့ ( ဇန်နဝါရီလ ၁၁) ရက်တွင် ကရင်နီတော်လှန်ရေးအင်းအားစုမှ ထိုးစစ်ဆင် တိုက်ခိုက်သိမ်းပိုက်နိုင်ခဲ့ကြောင်းသိရသည်။

ထို့သို့ ကရင်နီတော်လှန်ရေး အင်းအားစုမှ သိမ်းပိုက်ရရှိခဲ့သည့် ဖယ်ခုံမြို့နယ်အတွင်း စစ်ကောင်စီမှ လေကြောင်းဖြင့် လက်နက်ကြီး ပစ်ခတ်မှုများရှိနေကြောင်းသိရသည်။

“ လောလောဆယ်တော့ စကစက လေကြောင်းနဲ့လက်နက်ကြီးပစ်ခတ်နေတာမျိုးရှိတယ်။ အချို့ဒေသခံတွေလည်း တိုက်ပွဲထဲ ပိတ်မိနေတုန်းဘဲ”သတင်းရင်းမြစ်တစ်ဦးမှပြောသည်။

ဖယ်ခုံတိုက်ပွဲသည် ဇန်နဝါရီလ ၇ရက်မှ စပြီး တိုက်ပွဲများ စတင်ပြင်းထန်လာခဲ့ပြီး ဒေသခံများမှလည်း ထိုနေ့မရောက်ခင်ကတည်းက စစ်ရှောင်သူများရှိသလို့ ပိတ်မိစစ်ရှောင်များလည်း ကျန်ရှိနေကြောင်းသိရသည်။

“ ၁၀ရက်က တိုက်ပွဲအတော်ပြင်းထန်တယ် ဖယ်ခုံမှာ စစ်ရှောင်နေတဲ့ ညောင်ပင်သာထင်းရူးကုန်းဘက်၁ဦးရယ် မြို့မဘုန်းကြီးကျောင်းဘေးက လူငယ် ၁ဦး ဈေးအနောက်ရပ်ကွက်ကအသိအကို ၁ဦး စကစဘက်က လက်နက်ကြီးနဲ့ ပစ်တာခံရတယ်။” ဟု သေခံတစ်ဦးမှပြောသည်။

ထိုအပြင် ဖယ်ခုံမြို့နယ်အတွင်း ဆက်သွယ်ရေးဖုန်းလိုင်းများပြတ်တောက်ခံရပြီး တိုက်ပွဲအတွင်းဒေသခံသေဆုံးမှုများကို အသေးစိတ် ဆက်လက် စုံစမ်း နေသည်။

လက်ရှိတွင် စစ်ကောင်စီမှ လေကြောင်းဖြင့် လက်နက်ကြီးပစ်ချမှုကြောင်း စာသင်ကျောင်း၊ ဘုန်းတော်ကြီးကျောင်းနှင့် လူနေအိမ်အချို့လည်းပျက်စီးခဲ့ကြောင်းသိရသည်။