Sunday, July 21, 2024

ဖယ်ခုံမြို့ စစ်ကောင်စီမှ လေကြောင်းဖြင့်တိုက်ခိုက်

Must read

သျှမ်းပြည် ဖယ်ခုံမြို့နယ်အတွင်း စစ်ကောင်စီမှ နေ့စဉ်နီးပါး လေကြောင်းဖြင့် တိုက်ခိုက်နေကြောင်း စုံစမ်းသိရသည်။

ဖယ်ခုံ

သျှမ်းပြည် ဖယ်ခုံမြို့နယ်တွင် စစ်ကောင်စီနှင့် ကရင်နီတော်လှန်‌ရေးအင်အားစုတို့ ဇန်နဝါရီလ ၇ ရက်မှ စ၍မြေပြင်တိုက်ပွဲများ ပြန်လည်ပြင်းထန်နေပြီး စစ်ကောင်စီမှ လေကြောင်းသုံးကာ တိုက်ခိုက်မှုများ ပြုလုပ်နေကြောင်း သျှမ်းတောင်သို့ စစ်ဘေးရှောင်လာသူတစ်ဦးက သျှမ်းသံတော်ဆင့်ကို ပြောသည်။

“မနေ့နေ့လည်က နည်းနည်းငြိမ်ပြီး စစ်ရှောင်တွေ ထွက်လာတယ်။ ဒီနေ့ထိတော့ ထွက်လာတာတွေ ရှိတယ်။လေယာဉ်ကတော့ တစ်ရက်တစ်စီး အနည်းဆုံးတော့ ရောက်လာပြီး ဗုံးကြဲသွားတာတို့ ပစ်သွားတာမျိုးတို့ လုပ်တယ်။ မနေ့ကဆိုရင် စစ်ရှောင်တွေ လှေစီးလာချိန်တောင် လေယာဥ်နဲ့လာပစ်သေးတယ်၊ လူမထိတာကံကောင်း” ဟု စစ်ရှောင်လာသည့် အမျိုးသားတစ်ဦးက ပြောသည်။

ဖယ်ခုံ

ယနေ့ (ဇန်နဝါရီ ၁၀)ရက် နေ့လည်ပိုင်းတွင် တိုက်ပွဲများ ပြန်လလည်စတင်နေကြောင်း ဒေသခံများပြောပြချက်အရသိရသည်။

ဖယ်ခုံမြို့မှ ညောင်ရွှေမြို့နယ်၊ပင်လောင်းမြို့နယ် နှင့် အနီးအနားကျေးရွာတွင် ထွက်ပြေးနေထိုင်ကြပြီး နေရာထိုင်ခင်းများလိုအပ်နေကြောင်း စစ်ဘေးရှောင်လာသူများက သျှမ်းသံတော်ဆင့်ကိုပြောသည်။

“အဆင်ပြေတဲ့နေရာလေးတွေ နေနေကြတာများတယ်။ ဖယ်ခုံရဲ့ မြစ်တဖက်ကမ်းမှာရှိတဲ့ ကျေးရွာတွေမှာ သွားနေကြတာလည်းရှိတယ်။ အဝတ်တထည် နဲ့ထွက်လာတာ ဘာမှ မပါလာဘူး။ဒီမှာစောင်တွေ နေရာထိုင်ခင်းတွေလည်းလိုနေတာ‌ပေါ့ ရာသီဥလည်းအေးတော့လေ။”ဟု စစ်ဘေးရှောင် အမျိုးသားတစ်ဦးက ပြောသည်။

လက်ရှိ ဖယ်ခုံမြို့နယ်အတွင်း ဖြစ်ပွားနေသည့် တိုက်ပွဲသည် KNDF၊ ပြည်သူ့ကာကွယ်ရေးတပ်မတော် (PDF) တပ်ရင်းများအပါအဝင် ကရင်နီဒေသအခြေစိုက် တော်လှန်ရေးအင်အားစုများ ပူးပေါင်းတိုက်ခိုက်နေသည်ဟု သိရသည်။

ဖယ်ခုံမြို့နယ်အတွင်း စစ်ကောင်စီခြေမြန်တပ်ရင်းများဖြစ်သည့် အမှတ် (၃၃၆) နှင့် (၄၂၁) တပ်ရင်းများ ရှိပြီး အမှတ် (၇) စစ်ဆင်ရေးကွပ်ကဲမှုဌာနချုပ် (စကခ) လည်း အခြေစိုက်သည်။

ဖယ်ခုံမြို့နယ်အတွင်းရှိ ရွှေပြည်အေးနှင့် လွယ်ပတာ စခန်းကုန်းများကို ဒီဇင်ဘာလ ၂၃၊ ၂၄ နှင့် ၂၅ ရက် တို့တွင် သိမ်းပိုက်ရရှိခဲ့သည်ဟု တော်လှန်ရေး တပ်ပေါင်းစုက ထုတ်ပြန်ထားသည်။

ဖယ်ခုံမြို့နယ်၊ အင်းအရှေ့ခြမ်းရှိ တောင်ပို့ကြီးကျေးရွာ၊ ငါးမူးကျေးရွာ၊ ဆီမီးလော့ကျေးရွာ၊ လယ်ထွန်ကျေးရွာ၊ ဆောင်ကန်းကျေးရွာ စသည့် ကျေးရွာများကို စကခ (၇) က လက်နက်ကြီးနှင့် မကြာခဏ ပစ်ခတ်လေ့ရှိသည်ဟု ဒေသခံများက ပြောသည်။

Leave a Comments

- Advertisement -spot_img

Latest article