သျှမ်းပြည် ဖယ်ခုံမြို့တွင် တိုက်ပွဲများ ပြန်လည် ဖြစ်ပွားသည့်အတွင်ကြောင့် မြို့ထဲအတွင်း ပိတ်မိနေသူများပြားနေကြောင်း စုံစမ်းသိရသည်။

ဖယ်ခုံမြို့တွင် ဒီဇင်ဘာလ လလယ်မှ တိုက်ပွဲများ ပြန်လည်ဖြစ်ပွားလာပြီး မြို့၏အဝင်၊အထွက်တို့ တွင် တိုက်ပွဲများပြင်းထန်နေသည့် အတွက်ကြောင့် ပြည်သူဒေသခံများပိတ်မိနေပြီး ထွက်ပြေးရန် အခက်အခဲများ ရှိနေကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“ဖယ်ခုံက စစ်ပြန်ဖြစ်နေတာ ၃ ရက်လောက်ရှိပြီး။ စစ်ကောင်စီတွေကလည်း လေယာဉ်တွေနဲ့လည်း ပစ်တာတွေ ရှိတယ်။ စစ်ရှောင်တွေ တချို့ပိတ်မိနေတာ တွေလည်းရှိတယ်။ ရေလမ်းကနေလည်း ကယ်ထုတ်လို့ရပေမဲ့ လက်နက်ကြီး၊လက်နက်ငယ်တွေနဲ့ ပစ်ခံရတာတွေရှိတော့ စက်လှေတွေက ကမ်းကပ်ဖို့ခက်တာပေါ့။”ဟု တိုက်ပွဲ မှ ထွက်ပြေးလာသူ အမျိုးသားတစ်ဦးက ပြောသည်။

ဖယ်ခုံမြို့တွင် ပိတ်မိနေသည့်ဒေသခံများနှင့် စစ်ဘေးရှောင်များ စုစုပေါင်း ၄သောင်းခန့် ကျန်ရှိနေပြီး ထွက်ပြေး လာသူများလည်း ညောင်ရွှေမြို့နယ်၊ ပင်လောင်းနှင့် အနီးအနားကျေးရွာများတို့တွင် ထွက်ပြေး သိမ်းရှောင် နေကြရကြောင်း ပြည်သူဒေသခံများက ပြောသည်။

လက်ရှိ ရေလမ်းကို အားကိုးနေရပါသော်လည်း လုံခြုံစိတ်ချမှုမရှိသည့်အတွက် သွားရောက်ကယ်ဆယ်ကယ်ထုတ်နိုင်ရန် အခက်အခဲများဖြစ်နေကြောင်း ဒေသခံများက ပြောသည်။

ဖယ်ခုံမြို့တွင် ပြီးခဲ့သည့် ဇန်နဝါရီ ၈ရက် မှ စတင် တိုက်ပွဲ ပြင်းထန်နေပြီး ရဲစခန်း မီးလောင်ပြာကျကာ မြို့မြောက်ဘက်ရှိ စစ်ကောင်စီ ထိုင်တော်မူ စခန်းကို တော်လှန်ရေးတပ်ပေါင်းစု တိုက်ခိုက် သိမ်းပိုက်ခဲ့သည်။

လက်ရှိ ဖယ်ခုံ အခြေစိုက် စစ်ကောင်စီ ခမရ (၄၂၁) တပ်ရင်း အနီး တိုက်ပွဲပြင်းထန်ခဲ့ကာ စစ်ကောင်စီ တပ်သား ၃ ဦး သေဆုံးပြီး စခန်းငယ် တစ်ခု ဆုတ်ခွာသွားခဲ့ကြောင်း သိရသည်။

ဖယ်ခုံမြို့နယ်အတွင်းရှိ ရွှေပြည်အေးနှင့် လွယ်ပတာ စခန်းကုန်းများကို ဒီဇင်ဘာလ ၂၃၊ ၂၄ နှင့် ၂၅ ရက် တို့တွင် သိမ်းပိုက်ရရှိခဲ့သည်ဟု တော်လှန်ရေး တပ်ပေါင်းစုက ထုတ်ပြန်ထားသည်။

ဖယ်ခုံမြို့နယ်၊ အင်းအရှေ့ခြမ်းရှိ တောင်ပို့ကြီးကျေးရွာ၊ ငါးမူးကျေးရွာ၊ ဆီမီးလော့ကျေးရွာ၊ လယ်ထွန်ကျေးရွာ၊ ဆောင်ကန်းကျေးရွာ စသည့် ကျေးရွာများကို စကခ (၇) က လက်နက်ကြီးနှင့် မကြာခဏ ပစ်ခတ်လေ့ရှိသည်ဟု ဒေသခံများက ပြောသည်။