သျှမ်းပြည်မြောက်ပိုင်းတွင် အရေးနိမ့်နေသဖြင့် တပ်တွင်း ဝေဖန်မှုများစွာ ကြုံတွေ့နေရသည့် စစ်ခေါင်းဆောင် မင်းအောင်လှိုင်က ကာကွယ်ရေး ဦးစီးချုပ်(ရေ) ဗိုလ်ချုပ်ကြီး မိုးအောင် ကို အနားပေးလိုက်ပြီး စစ်ဦးစီး အရာရှိချုပ် (ရေ) ဒုတိယဗိုလ်ချုပ်ကြီး ဇွဲဝင်းမြင့် ကို အစားထိုး ခန့်အပ်လိုက်ကြောင်း တပ်တွင်း သတင်းရင်းမြစ်က ယနေ့ (ဇန်န၀ါရီ ၈ ရက်) တွင်ပြောသည်။
ဗိုလ်ချုပ်ကြီး မိုးအောင် ကို အနားပေးလိုက် သော်လည်း အမျိုးသား လုံခြုံရေး အကြံပေးအဖြစ် ဆက်လက် ခန့်အပ်ထားသည်ဟု ကြားသိရကြောင်း ၄င်းကဆိုသည်။
ထို့အပြင် တောင်ကြီးမြို့ အခြေစိုက် အရှေ့ပိုင်းတိုင်း စစ်ဌာနချုပ် (ရပခ) တိုင်းမှူး ဗိုလ်ချုပ် မျိုးမင်းထွန်း အရန်အင်အား ပို့ခံရပြီး နေပြည်တော်ရှိ နိုင်ငံတော် ကာကွယ်ရေး တက္ကသိုလ် ကျောင်းအုပ် ဗိုလ်ချုပ် ဇော်မင်းလတ်က ရပခ တိုင်းမှူး ဖြစ်လာကြောင်း ၄င်းက ဆက်ပြောသည်။
“တခြား ရာထူး အပြောင်းအလဲတွေလည်း ထပ်ဖြစ်တယ်။ ထပ်ဖြစ်ဖို့ရှိတယ်လို့ ပြောလို့ရတယ်။ တပ်တွင်း ဖိထားနိုင်ဖို့ သူ (မင်းအောင်လှိုင်) စိတ်ချရတဲ့သူတွေ အစားထိုးတဲ့ သဘောပါ။ အရန်အင်အား အပို့ရခံရသူတွေ အရပ်ဘက် (၀န်ကြီးဌာန) ရောက်သွားဖို့ များတယ်” ဟု တပ်တွင်း သတင်းရင်းမြစ်က ရှင်းပြသည်။
ထို့အပြင် လုံခြုံရေးနှင့်ဆိုင်သော ပုံနှပ်လုပ်ငန်းများ ညွှန်ကြားရေးမှူးရုံး (ကကလုံ) ညွှန်မှူးကို အရန်အင်အား ပြောင်းရွှေ့ပြီး ဒုညွှန်မှူးဖြင့် အစားထိုး ခန့်အပ်ခဲ့သည်ဟု သိရသည်။
စစ်ခေါင်းဆောင်က လောက်ကိုင် လက်နက်ချမှုတွင် ဦးဆောင်ပါ၀င်ခဲ့သည့် ကလောမြို့ အခြေစိုက် တပ်မ (၅၅) တပ်မမှူးကို ဖမ်းဆီးထားကာ ဗိုလ်မှူးကြီး အောင်စိုးမင်း (တေဇ ၂၅) ကို အစားထိုး ခန့်အပ်ခဲ့ပြီး တပ်မ (၆၆) တပ်မမှူး အဖြစ် ဗိုလ်မှူးကြီး ကျော်စိုးလင်း (စတသ ၄၁) ကို ခန့်အပ်လိုက်ကြောင်း သိရသည်။
အနားပေး ခံခဲ့ရသည့် ဗိုလ်ချုပ်ကြီးမိုးအောင် သည် နဝတ စစ်ကောင်စီ လက်ထက် စက်မှု (၁) ဝန်ကြီး ဦးအောင်သောင်း (ကွယ်လွန်) ၏ သားဖြစ်ပြီး UAB ဘဏ်သည် ၄င်းနှင့် မောင်နှမ မိသားစုများ ပိုင်ဆိုင်သော ဘဏ်ဖြစ်သည်။
Leave a Comments