သျှမ်းပြည်နယ် တောင်ပိုင်း၊ ဖယ်ခုံမြို့တွင် ယနေ့ နံနက်ပိုင်းမှ စတင် တိုက်ပွဲ ပြင်းထန်နေပြီး ရဲစခန်း မီးလောင်ပြာကျကာ မြို့မြောက်ဘက်ရှိ စစ်ကောင်စီ ထိုင်တော်မူ စခန်းကို တော်လှန်ရေးတပ်ပေါင်းစု တိုက်ခိုက် သိမ်းပိုက်ခဲ့ကြောင်း စစ်ရေးသတင်းရင်းမြစ်က ပြောသည်။
လက်ရှိ ဖယ်ခုံ အခြေစိုက် စစ်ကောင်စီ ခမရ (၄၂၁) တပ်ရင်း အနီး တိုက်ပွဲပြင်းထန်နေပြီး စစ်ကောင်စီတပ်သား ၃ ဦး သေဆုံးကာ စခန်းငယ် တစ်ခု ဆုတ်ခွာသွားသည်ဟု ၄င်းကဆိုသည်။
“တိုက်ပွဲ မနေ့ကတည်းက စနေတာ။ မနေ့က ညောင်ပင်သာရပ်ကွက်ထဲ လက်နက်ကြီး ၄ လုံးကျတယ်။ အထိအခိုက်တော့ သေချာမသိသေးဘူး။ ဒီနေ့ ရဲစခန်း မီးလောင်သွားတယ်။ လေယဥ်နဲ့ ဗုံးလာကြဲတယ်။ ဘယ်နားကျလဲ မသိဘူး။ မထွက်ရဲဘူး” ဟု မြို့ခံ တစ်ဦးက ပြောသည်။
ယနေ့ ဖြစ်ပွားနေသည့် တိုက်ပွဲတွင် စစ်ကောင်စီတပ် အထိနာသဖြင့် ဖယ်ခုံ အခြေစိုက် စစ်ကောင်စီ စစ်ဆင်ရေး ကွပ်ကဲမှုဌာနချုပ် စကခ(၇) တပ်က လေကြောင်းပစ်ကူ တောင်းပြီးနောက် ဗုံးကြဲခြင်းဖြစ်ကြောင်း စစ်ရေးသတင်းရင်းမြစ်က ဆိုသည်။
ဖယ်ခုံမြို့နယ်အတွင်းရှိ ရွှေပြည်အေးနှင့် လွယ်ပတာ စခန်းကုန်းများကို ဒီဇင်ဘာလ ၂၃၊ ၂၄ နှင့် ၂၅ ရက် တို့တွင် သိမ်းပိုက်ရရှိခဲ့သည်ဟု တော်လှန်ရေး တပ်ပေါင်းစုက ထုတ်ပြန်ထားသည်။
ဖယ်ခုံမြို့နယ်၊ အင်းအရှေ့ခြမ်းရှိ တောင်ပို့ကြီးကျေးရွာ၊ ငါးမူးကျေးရွာ၊ ဆီမီးလော့ကျေးရွာ၊ လယ်ထွန်ကျေးရွာ၊ ဆောင်ကန်းကျေးရွာ စသည့် ကျေးရွာများကို စကခ (၇) က လက်နက်ကြီးနှင့် မကြာခဏ ပစ်ခတ်လေ့ရှိသည်ဟု ဒေသခံများက ပြောသည်
