သျှမ်းပြည် ကွတ်ခိုင်မြို့တွင် စစ်ကောင်စီလက်နက်ကြီးကြောင့် အရပ်သား ၁ ဦး သေဆုံးခဲ့ပြီး ကလေးမိခင် အပါအဝင် ၂ ဦး ထိခိုက်ဒဏ်ရာရရှိခဲ့ကြောင်း စုံစမ်းသိရသည်။
ဒီဇင်ဘာလ ၂၁ ရက် နေ့လယ် ၁ နာရီခွဲခန့်က ကွတ်ခိုင်မြို့နယ် လွယ်ပယ်ကျေးရွာသို့ စစ်ကောင်စီလက်နက်ကြီး ကျရောက်ပေါက်ကွဲခဲ့ခြင်းကြောင့် အသက် ၂၅ နှစ်အရွယ် အိုက်လူ သည် နဖူးနှင့်ပေါင် ထိမှန်ဒဏ်ရာဖြင့် ပွဲချင်းပြီး သေဆုံးသွားခဲ့ကာ ရင်ခွင်ပိုက် ကလေးမိခင် လွေးအိုဆွေမှာ ဒူးခေါင်းထိမှန်ဒဏ်ရာဖြင့် ကွတ်ခိုင်ဆေးရုံတွင် ကုသနေကြောင်း ဒေသခံများက ပြောသည်။
“ လွယ်ပယ်ရွာမှာ နေ့လယ်ပိုင်း လက်နက်ကြီးကျလို့ တစ်ယောက်ဆုံးသွားပြီ။ ဆုံးသွားတာက ယောကျ်ားလေး ပွဲချင်းပြီးလို့ ပြောတယ်။ ဆေးရုံမှာတော့ အမျိုးသမီး။ ကလေးငယ်နဲ့ နို့စို့ကလေး ပါတယ်။ ရင်ခွင်ပိုက် ကလေးတော့ မထိဘူး၊ သူ့အမေပဲ ထိတာ။ မန်ထန်က တစ်ယောက်ကတော့ မြေမြှုပ်မိုင်း နင်းမိလို့ ခြေထောက် ပြတ်သွားတယ်”ဟု ကွတ်ခိုင်မြို့မှ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ယမန်နေ့ (ဒီဇင်ဘာလ ၂၂ ရက်) နံနက် ၁၀ နာရီခန့်က ကွတ်ခိုင်မြို့နယ် မန်ထန်ကျေးရွာမှ အသက် ၃၀ နှစ်ခန့်ရှိ စိုင်းယီ သည် မြေမြှုပ်မိုင်းနင်းမိ၍ ခြေထောက်ပြတ်သွားခဲ့သည်ဟု ကွတ်ခိုင်မြို့မှ ၎င်းဒေသခံအမျိုးသမီးက ဆက်ပြောသည်။
ကွတ်ခိုင်မြို့နယ်တွင် ဒီဇင်ဘာလ ဒုတိယပတ်မှစ၍ စစ်ကောင်စီ နှင့် ညီနောင်မဟာမိတ် ၃ ဖွဲ့တို့ နှစ်ဘက်ထိတွေ့တိုက်ပွဲ ပြင်းထန်လာခြင်းကြောင့် ကွတ်ခိုင်မြို့ပေါ် ရပ်ကွက် ၅ ခုနှင့် အနီးအနားကျေးရွာ ၁၀ ရွာထက်မနည်း ထွက်ပြေးတိမ်းရှောင်နေရပြီး တိုက်ပွဲထပ်မံ ပြင်းထန်လာမည်ကို စိုးရိမ်နေကြောင်း ကွတ်ခိုင်ဒေသခံများထံမှ သိရသည်။
“စစ်ရေးကတော့ တင်းမာနေဆဲ။ စစ်ရေးစစ်ရာကတော့ မကြာမီ စတော့မယ် ထင်ပါတယ်။ အလွန်ဆုံး ၂ ရက် ၃ ရက်ပေါ့နော်။ ပြည်သူတွေကတော့ အရွှေ့အပြောင်းတွေ ရှိနေတယ်။ ကွတ်ခိုင်မြို့နား တစ်ဝိုက်မှာ ရှိတဲ့ ရွာတွေပေါ့။ အရှေ့ဘက်အခြမ်းကို ကပ်နေတဲ့ ရွာတွေ ၁၀ ရွာလောက် ရှိမယ်။ မြို့ပေါ်ကလည်း ၅ ရပ်ကွက်လောက် ပြောင်းခိုင်းထားတယ်ပြောတယ်။ လုံခြုံစိတ်ချရတဲ့နေရာတွေ ပြောင်းကုန်ကြပြီ”ဟု ကွတ်ခိုင်မြို့မှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“၁၀၂၇ စစ်ဆင်ရေး” နှစ်လနီးပါးကာလအတွင်း ကွတ်ခိုင်မြို့နယ်တွင် စစ်ကောင်စီ၏ လက်နက်ကြီး နှင့် လေကြောင်းဗုံးကြဲမှုကြောင့် အမျိုးသမီး ၆ ဦးနှင့် ကလေး ၅ ဦး အပါအဝင် စုစုပေါင်း ၁၆ ဦး သေဆုံးပြီး ၃၅ ဦးထက်မနည်း ထိခိုက်ဒဏ်ရာရရှိခဲ့ကြောင်း ကွတ်ခိုင်ဒေသခံများထံမှ သိရသည်။
