သျှမ်းပြည် တောင်ပိုင်း တောင်ကြီးမြို့နယ် ညို့မီး နှင့် ထီဗွာကျေးရွာရှိ အိမ်များ ဖောက်ထွင်းခံရပြီး ပစ္စည်းအချို့ ခိုးယူခံရကြောင်း ဖောက်ခံရသူ ဒေသခံ အိမ်ရှင်များ ပြောကြားချက်အရ သိရှိရသည်။

ယမန်နေ့ ဒီဇင်ဘာလ (၂၂) ရက်နေ့ နေ့လည် (၂) နာရီကျော်တွင် ညို့မီးရပ်ကွက်နေ ဒေသခံများ နေအိမ်မှာ မရှိသည့်အချိန်တွင် ခြံစောင့်ကျန်နေခဲ့သော ခွေး နှစ်ကောင်ကို အဆိပ်ကျွေးကာ အိမ်ကို ဖောက်ထွင်းပြီး ပစ္စည်းများ ခိုးယူသွားကြောင်း သိရှိရသည်။ ဖောက်ထွင်းသူများမှာ မည်သူ ဖြစ်သည်ကို မသိရှိရသေးကြောင်းလည်း အိမ်ရှင်များမှ ပြောသည်။

“အိမ်ပြန်လာတော့ ခွေးနှစ်ကောင်က အမြုပ်တွေထွက်၊ မြက်ပင်တွေ လိုက်စားထားပြီး လဲနေပြီ၊ သူတို့ကို ပွေ့ပြီး ဆေးခန်း အမြန် ပြေးပို့ရတယ်။ အိမ်ကို စစ်ကြည့်တဲ့အခါမှာ ပါဝါဘန့်ခ်တွေ၊ အသစ်၀ယ်ထားတဲ့ ဖိနပ်တွေ နဲ့ ပုံးထဲအပြည့်ရှိတဲ့ မီးပစ္စည်းတွေ အကုန်ယူသွားတယ်၊ ရောင်းစားဖို့ပဲလို့ ထင်တယ်။ ကျန်တဲ့ ပစ္စည်းတော့ မယူသွားဘူး။ အချိန်မရလို့ ရှာယူချိန် မရှိလိုက်ဘူးလို့ ထင်တယ်။ ကြည့်ရတာ ကျွန်မတို့ နေတဲ့အိမ်ကို စောင့်ကြည့်ထားတဲ့သူ ဖြစ်လောက်မယ်”ဟု အိမ်ရှင် အမျိုးသမီးမှ ပြောပြသည်။

အလားတူ ဖြစ်ရပ်မျိုး ညို့မီးအနီးအနားရွာဖြစ်တဲ့ ထီဗွာကျေးရွာတွင်လည်း အိမ်ဖောက်ထွင်းခံရမှုများမှာ ယခုရက်ပိုင်းအတွင်း သုံးလေးခုထက်မနည်း ရှိနေခဲ့ပြီး တရားခံ မည်သူမည်၀ါဟူ၍လည်း မသိသေးကြောင်း ဒေသခံများမှ ပြောသည်။

“ထီဗွာရွာမှာလည်း ရှေ့ရက်ကပဲ လင်မယားနှစ်ယောက်ပဲ ရှိတဲ့အိမ်ကို ဖောက်သွားတာ။ အဲ့အိမ်မှာ ဆန်နှစ်အိတ်ခွဲ ၀ယ်ထားတာကို ဆန်နှစ်အိတ် ယူသွားတယ်။ အိတ် တစ်၀က်ကတော့ ချန်ပေးခဲ့တယ်။ မနေ့ကလည်း ရွာနားက ကုန်စုံဆိုင်မှာ လူလစ်တုန်း ဖုန်းဘေလ် (၅၀၀၀) တန်ကဒ်တွေ နှိက်သွားတာ တစ်သိန်းခွဲဖိုး ပါသွားတယ်” ဟု ဒေသခံ တစ်ဦးမှ ထပ်လောင်း ပြောပြသည်။

လက်ရှိကာလမှာ ပြည်တွင်းတွင် တရားဥပဒေ စိုးမိုးမှု မရှိသောကြောင့် ပြည်သူများ မလုံခြုံမှုကို ပိုခံစားလာကြရပါသည်။ တစ်ဖက်တွင်လည်း ကုန်စျေးနှုန်းနှင့် စက်သုံးဆီများ စျေးတက်နေသလို ပြည်သူများလည်း အလုပ်အကိုင် ခက်ခဲပြီး စား၀တ်နေရေး ကျပ်တည်းမှုများ တွေ့ကြုံနေရသည်။ ထို့အပြင် မြို့ပြသော်လည်းကောင်း ကျေးရွာအတွင်း သော်လည်းကောင်း နေထိုင်သွားလာရသည်မှာလည်း လုံခြုံမှု မရှိတော့ဘူးပဲ စိုးရိမ်နေရကြောင်း ဒေသခံများမှ ရင်ဖွင့်ပြောကြားသည်။