သျှမ်းမြောက် မူဆယ်မြို့ အနီး နှင့် နမ့်ခမ်းမြို့ တွင် ယနေ့ ( ဒီဇင်ဘာ ၁၆) ရက် ည ၁၀ နာရီဝန်းကျင်မှ စပြီး စစ်ကောင်စီ မှ လေကြောင်းဖြင့် ဗုံးကြဲမှု ပြုလုပ်ခဲ့ကြောင်း စုံစမ်းသိရှိရသည်။
ဒီဇင်ဘာ (၁၆) ရက် ည ၁၀ နာရီဝန်းကျင်မှ စတင်ပြီး နမ့်ခမ်းမြို့ နှင့် မူဆယ်မြို့ အနီးတွင် လေကြောင်းဖြင့် အလေးချိန် ပေါင် ၃၀၀ရှိ ဗုံး လာရောက်ကြဲခဲ့ကြောင်း သိရှိသည်။
“မူဆယ်မှာ ဒီနေ့ ည အသံအကျယ်ကြီးပဲ လေကြောင်းနဲ့ ဗုံးလာကြဲသွားတယ်။ အိမ်တောင် တုန်သွားတယ်။ ဘယ်နေရာလဲတော့ သေချာမသိရသေးဘူး။ မူဆယ်မြို့နဲ့တော့ တော်တော်နီးတယ်ထင်တယ်။ ” ဟု မူဆယ်ဒေသခံ တစ်ဦး ကပြောသည်။
အလားတူ နမ့်ခမ်းမြို့မှာလည်း စခန်းသစ်ကုန်း မကျရေးအတွက် စစ်ကောင်စီမှ ရက်ဆက်တိုက် ဆိုသလို လေကြောင်းဖြင့် ဗုံးကြဲမှုများ ပြုလုပ်လျက်ရှိပြီး ယနေ့ ဒီဇင်ဘာ (၁၆) ရက်ညတွင် ပေါင် (၅၀၀) အလေးချိန်ရှိ ဗုံးကို စစ်ကောင်စီဘက်မှ လက်ရှိ သတင်းတင်ဆက်ချိန်ထိ (၄) ကြိမ် လာရောက် ပစ်ခတ်ခဲ့ကြောင်း စုံစမ်းသိရှိရသည်။
“နမ့်ခမ်းမှာလည်း ပေါင် (၅၀၀) ဗုံး လာရောက်ပစ်ချသွားတယ်။ ဘယ်နေရာတွေ ပစ်ချလည်းတော့ မသိရဘူး။ စခန်းသစ်ကုန်း မကျဆုံးရေးအတွက် စစ်ကောင်စီဘက်ကလည်း ကာကွယ်နေသလို မဟာမိတ်ဘက်ကလည်း တိုက်ယူနေတယ်။ ၂ ဖက် တိုက်ပွဲက တင်းမာနေတုန်းပဲ” ဟု နမ့်ခမ်းဒေသခံ တစ်ဦး ကပြောသည်။
ညီနောင်မဟာမိတ် (၃) ဖွဲ့မှ စစ်ကောင်စီကို ၁၀၂၇ စစ်ဆင်ရေး ဆင်နွှဲသည့် ၁ လကျော် ကာလတွင် စစ်ကောင်စီရဲ့ ခြေကုပ် စခန်းကြီး /ငယ် ပေါင်း (၃၀၀) ကျော် သိမ်းပိုက်နိုင်ခဲ့ပြီး ဒီဇင်ဘာ (၁၄) ရက်တွင် မူဆယ် (၁၀၅) မိုင်ရှိ စစ်ကောင်စီ ဗျုဟာကုန်းကို ညီနောင်မဟာမိတ်တို့ စတင်တိုက်ခိုက်ခဲ့ပြီး ဒီဇင်ဘာ (၁၅) ရက်တွင် လက်နက်ခဲယမ်း နှင့်အတူ စစ်ကောင်စီ ရဲ့ တင့်ကား ၂ စီးကိုပါ သိမ်းပိုက်နိုင်ခဲ့ကြောင်း သိရှိရသည်။
လက်ရှိ သျှမ်းမြောက်ဒေသ မူဆယ်မြို့နယ် နှင့် နမ့်ခမ်းမြို့နယ်ရှိ စစ်းဘေးတိမ်းရှောင်သည့် ဒေသခံ (၈၀၀၀) ကျော်သည် စားနပ်ရိက္ခာ အရေးပေါ် အကူအညီ လိုအပ်နေသကဲ့သို့ မူဆယ် – နမ့်ခမ်း ကားလမ်းများ ပိတ်ထားခြင်းကြောင့် နမ့်ခမ်းမြို့နယ်ရှိ စစ်းဘေးရှောင်များအတွက် ဆေးဝါး အခက်အခဲ ဖြစ်နေလျက်ရှိကြောင်း သိရသည်။
Leave a Comments