“၁၀၂၇ စစ်ဆင်ရေး”ဖြစ်ပွားနေသည့် သျှမ်းပြည်မြောက်ပိုင်းအတွင်း ဖြတ်သန်းသွားမည့် တရုတ်-မြန်မာမီးရထားလမ်း ဖောက်လုပ်ရေးကို တရုတ်နိုင်ငံခြားရေးဝန်ကြီးနှင့် စစ်ကောင်စီခန့် နိုင်ငံခြားရေးဝန်ကြီးတို့ ပေကျင်းမြို့၌ တွေ့ဆုံဆွေးနွေးခဲ့ကြောင်း မြန်မာ့အလင်း သတင်းစာမှ ဒီဇင်ဘာလ ၇ ရက်တွင် ဖော်ပြသည်။

ဒီဇင်ဘာ ၆ ရက်တွင် တရုတ်နိုင်ငံခြားရေးဝန်ကြီး ဝမ်ယိနှင့် စစ်ကောင်စီခန့် နိုင်ငံခြားရေးဝန်ကြီး ဦးသန်းဆွေတို့ ပေကျင်းမြို့၌ တွေ့ဆုံစဉ် မြန်မာ-တရုတ် ဆွေမျိုးပေါက်ဖော် ဆက်ဆံရေး၊ မြန်မာ-တရုတ် စီးပွားရေးစင်္ကြံနှင့် ပိုးလမ်းမစီမံကိန်းအောက်မှ ကျောက်ဖြူရေနက်ဆိပ်ကမ်း၊ တရုတ်-မြန်မာ မီးရထားလမ်း ဖောက်လုပ်ရေးနှင့် လျှပ်စစ်ဓာတ်အား ဖြန့်ဖြူးရေးကွန်ယက် တည်ထောင်ရေး စသည့် အကျိုးတူပူးပေါင်းဆောင်ရွက်သည့် စီမံကိန်းများကို အရှိန်မြင့် လုပ်ဆောင်သွားရန် ဆွေးနွေးခဲ့ကြသည်ဟု သတင်းထုတ်ပြန်သည်။

ထို့အပြင် မြန်မာ-တရုတ် နှစ်နိုင်ငံ နယ်စပ်ဒေသတစ်လျှောက် လုံခြုံရေး၊ တရားမဝင် မူးယစ်ဆေးဝါး ရောင်းဝယ်ဖောက်ကားမှု၊ လူကုန်ကူးမှုနှင့် အွန်လိုင်းလိမ်လည်မှုများကို တိုက်ဖျက်သွားရေးအတွက် ပိုမိုနီးကပ်စွာ ပူး‌ပေါင်းဆောင်ရွက်သွားနိုင်ရန်လည်း ဆွေးနွေးခဲ့သည်ဟု သတင်းထုတ်ပြန်ချက်တွင် ပါဝင်သည်။

မြန်မာနိုင်ငံတွင် အကောင်အထည်ဖော်မည့် တရုတ်၏ ပိုးလမ်းမစီမံကိန်း အစိတ်အပိုင်းတစ်ရပ်ဖြစ်သော တရုတ်-မြန်မာ မီးရထားလမ်းသည် တရုတ်နိုင်ငံ ရွှေလီမြို့မှတဆင့် မူဆယ်မြို့သို့ စတင်ဝင်ရောက်လာပြီး မန္တလေးမြို့ကို ဖြတ်သန်းကာ ရခိုင်ပြည်နယ် ကျောက်ဖြူမြို့အထိ ဖောက်လုပ်သွားမည်ဟု ကနဦးထုတ်ပြန်ချက်များအရ သိရှိရသည်။

မူဆယ်-မန္တလေး မီးရထားလမ်းပိုင်းတွင် ဖြတ်သန်းသွားမည့် မူဆယ်၊ ကွတ်ခိုင်၊ သိန္နီ၊ လားရှိုး၊ သီပေါ၊ ကျောက်မဲ၊ နောင်ချိုမြို့နယ်များသည် ညီနောင်မဟာမိတ် ၃ ဖွဲ့က စစ်ကောင်စီတပ်ကို “၁၀၂၇ စစ်ဆင်ရေး” ဆင်နွှဲနေသည့် နယ်မြေများဖြစ်ပြီး တရုတ်-မြန်မာ နယ်စပ်မြို့များဖြစ်သည့် နမ့်ခမ်း၊ ပန်ဆိုင်း(ကြူကုတ်)၊ မုံးကိုးနှင့် ချင်းရွှေဟော်မြို့တို့ကို ညီနောင်မဟာမိတ်တပ်များက သိမ်းပိုက်ထားကာ မူဆယ်နှင့် လောက်ကိုင်မြို့တို့ကို ထိန်းချုပ်နိုင်ရန် အပြင်းအထန် ထိုးစစ်ဆင်နေသည်။

“တိုက်ပွဲတွေသည် တော်လှန်ရေးဆိုတာထက် စီးပွားရေးလမ်းကြောင်းတွေနဲ့ သက်ဆိုင်နေတယ်။ တရုတ်ကလဲ သူ့ရဲ့အကျိုးစီးပွားအတွက်ကတော့ အကျိုးမရှိဘဲနဲ့ လွယ်လွယ်ကူကူ သူ့နယ်စပ်မှာ ဒီလိုတိုက်ပွဲပြင်းထန်နေတာ ခွင့်ပြုမှာမဟုတ်ဘူး။ စစ်ကောင်စီတပ်ကလဲ သူ့ရဲ့ဖိအားတွေ အခုဖြစ်နေတဲ့တိုက်ပွဲတွေ လျော့ကျသွားအောင် တရုတ်နဲ့ အလဲအထပ်လုပ်မှာပဲ။ အဲ့တာကြောင့်မလို့ ဒီစီမံကိန်းမှာ ဒေသခံတွေ မသိလိုက်ပဲနဲ့ အများကြီး နစ်နာသွားစေနိုင်မယ့် အရာတွေ အများကြီး ရှိလာနိုင်တယ်”ဟု စီမံကိန်းနှင့်ပတ်သက်၍ စစ်ကောင်စီနှင့် တရုတ်တို့ ဆွေးနွေးလာသည့်အပေါ် သဘောထားအမြင်ကို သျှမ်းလူငယ် တက်ကြွလှုပ်ရှားသူတစ်ဦးက သျှမ်းသံတော်ဆင့်သို့ ပြောသည်။

“၁၀၂၇ စစ်ဆင်ရေး” ဆင်နွှဲနေသော ညီနောင်မဟာမိတ်တပ်များ၊ ပြည်သူ့ကာကွယ်ရေးတပ် PDF များနှင့် စစ်ကောင်စီတပ်တို့သည် စစ်ရေးပဋိပက္ခအတွင်း လူထု၏ ဒုက္ခကို လျစ်လျူရှုနေကြပြီး တော်လှန်ရေးခေါင်းစဉ်ကို အကြောင်းပြ၍ ပိုးလမ်းမစီမံကိန်း BRI မှ အကျိုးအမြတ် ရရှိစေရန် ကြိုတင်ကြံစည်၍ ထိန်းချုပ်နယ်မြေ လုယူခြင်း၊ လူမျိုးရေး ပဋိပက္ခဖြစ်စေရန် စည်းရုံးလှုံဆော်ကြခြင်းနှင့် နိုင်ငံရေး၊ စစ်ရေး မရိုးဖြောင့်မှုများ ပြုလုပ်လာခြင်းကြောင့် စိုးရိမ်ပူပန်မိကြောင်း သျှမ်းလူထုနှင့် အရပ်ဖက်အဖွဲ့အစည်းများက နိုဝင်ဘာလ ၁၁ ရက်တွင် ထုတ်ပြန်ထားသည်။