Saturday, July 20, 2024

တာချီလိတ်မြို့ ယာဉ်ထိန်းရဲများ တရုတ်ကျားဖြန့်ဖမ်းဆီးမှု အကြောင်းပြပြီး ငွေညစ်နေ

Must read

မြန်မာ-ထိုင်းနယ်စပ်ဒေသ တာချီလိတ်မြို့တွင် ယာဉ်ထိန်းရဲတပ်ဖွဲ့များမှ တရုတ်ကျားဖြန့်အဖွဲ့ဝင်များကို ဖမ်းဆီးခြင်း အကြောင်းပြပြီး ဒေသခံများထံ ငွေညစ်နေကြောင်း ဒေသခံများ၏ သတင်းပေးပို့ချက်အရ သိရသည်။

တာချီလိတ် ယာဥ်ထိန်းရဲ ငွေညစ်

ယခုရက်ပိုင်း တာချီလိတ်မြို့တွင် တရုတ်ကျားဖြန့် (ငွေလိမ်ဂိုဏ်း) များကို နှိမ်နင်းဖမ်းဆီးနေကြောင်း ဆိုသည့် အကြောင်းပြချက်ဖြင့် ယာဉ်ထိန်းရဲတပ်ဖွဲ့များက အုပ်စုဖွဲ့၍ ကားများအား တားဆီးစစ်ဆေးပြီး တရုတ်လူမျိုးကို  တွေ့ရှိလျှင် ထိုင်းဘတ်ငွေ သိန်းဂဏန်းစတောင်းခံနေကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။

“ ဒီရက်ပိုင်း တာချီလိတ်မြို့က ယာဉ်ထိန်းရဲတွေက အုပ်စုနဲ့ လိုင်စင်စစ်သလို၊ ကားစစ်သလိုနဲ့ တားဆီးပြီး စစ်တယ်။ အဓိက တရုတ်ကိုစစ်တာ အရမ်းသိသာတယ်။ တရုတ်တစ်ယောက်တွေ့ပြီဆို ဘတ်ကို သိန်းဂဏန်း စတောင်းတယ်။ မဖမ်းဘူး ငွေပဲညစ်တာ။ တချို့လည်း ကြားကပွဲစား တရုတ်စကားပြန်တွေ ညှိပေးလို့ ဘတ်တစ်သောင်းနဲ့ ယူပြီး ပြန်လွှတ် ပေးတာလည်း ရှိတယ် “ ဟု ၎င်းဒေသခံတစ်ဦးက ပြောသည်။ 

တာချီလိတ်ယာဥ်ထိန်းရဲ

အဆိုပါ တားစီးစစ်ဆေးသည့် နေရာများမှာ တာချီလိတ် မုဒ်ဦး၊ အာခါဈေး မီးပွိုင့်အကျော် နှင့် ဂေါက်ကွင်း၊ ဟိုတယ်များတွင် စောင့်၍ ကားများကို တားဆီး စစ်ဆေးကာ ငွေညစ်တောင်းခံနေကြောင်း ၎င်းကဆက်ပြောသည်။

ပြီးခဲ့သည့် နိုဝင်ဘာလ ဒုတိယအပတ်တွင်လည်း တာချီလိတ်မြို့တွင် တိုက်ပွဲဝင်နေသော စစ်ကောင်စီ တပ်သားများ အတွက်ဆိုပြီး ဗျူဟာမှူးမှ လုပ်ငန်းရှင်၊ ဟိုတယ်ပိုင်ရှင်များထံ အလှူငွေတောင်းခံနေသည်။

တရုတ်အစိုးရ၏ စေခိုင်းချက်အရ စစ်ကောင်စီတပ်ဖွဲ့သည် အောက်တိုဘာလ ၃၁ ရက်မှစ၍ နယ်စပ်ဒေသ တလျှောက်ရှိ တရုတ်ကျားဖြန့် (ငွေလိမ်ဂိုဏ်း) များကို လိုက်လံဖမ်းဆီးပြီး လွှဲပြောင်းပေးခဲ့ရာမှ လက်ရှိအချိန်ထိ ၁၀,၉၅၂ ဦး ရှိပြီဖြစ်ကြောင်း ယနေ့ ဒီဇင်ဘာလ ၄ ရက်တွင် စစ်ကောင်စီက ထုတ်ပြန်ထားသည်။

Leave a Comments

- Advertisement -spot_img

Latest article