ကရင်နီ (ကယား) ပြည်အတွင်း တိုက်ပွဲကြောင့် သျှမ်းပြည် ဆီဆိုင်မြို့နယ်ရှိ စစ်ရှောင်စခန်းများတွင် စစ်ရှောင် ဦးရေ ထပ်မံတိုးလာနေသဖြင့် နေရာမလုံလောက်မှု ပြသာနာနှင့် ကြုံတွေ့နေရကြောင်း စစ်ရှောင်ကော်မတီထံမှ စုံစမ်းသိရသည်။
လက်ရှိ ဆီဆိုင်မြို့နယ်တွင် ယခင်ရှိ စစ်ရှောင်ဦးရေနှင့် ယခုနောက်ပိုင်း “ ၁၁.၁၁ စစ်ဆင်ရေး “ တိုက်ပွဲကြောင့် အဝတ်တစ်ထည် ကိုယ်တစ်ခုဖြင့် ထွက်ပြေးတိမ်းရှောင်လာရသည့် စစ်ရှောင်များသည် စုစုပေါင်း လူဦးရေ ၁ သောင်းကျော် ရှိပြီဖြစ်ကြောင်း သိရသည်။
အဆိုပါ စစ်ရှောင်စခန်းများတွင် စစ်ရှောင်ဦးရေ ထပ်မံတိုးလာနေသာကြောင့် တဲအိမ်တစ်ခုထဲတွင် မိသားစု ၄ စုခန့်က စုပေါင်းပြီး ကျဉ်းကျဉ်းကြပ်ကြပ်နေထိုင်ရကြောင်း ဆီဆိုင်မြို့နယ် ဘုးရားဖြူရှိ စစ်ရှောင်စခန်းမှ မအဲ (အမည်လွှဲ) က သျှမ်းသံတော်ဆင့်ကို ပြောသည်။
“ ကျမတို့နေရပ်ပြန်ဖို့နေနေသာသာ အခုစစ်ရှောင်စခန်းမှာ ပိုလို့တောင်မှ လူဦးရေတိုးလာတယ်။ အခုလူဦးရေးက ၃၀၀ ကျော်နေပြီ။ လာနေတဲ့လူတွေလည်း လာနေသေးတယ်။ နေဖို့နေရာတောင် မရှိဘူး။ တချို့တွေလည်း ကျမတို့ အဆောင်ဘေးမှာ လာငှားနေတဲ့သူတွေလည်း စုနေကြတယ်။ အဲ့လိုကျဉ်းကျဉ်း ကြပ်ကြပ်နဲ့ တဲတစ်ခုထဲမှာ မိသားစု ၄ စုလောက် ဝင်နေရတယ် “ ဟု မအဲက ပြောသည်။
ယင်းကဲ့သို့ ကျဉ်းကြပ်စွာ စုပေါင်းနေထိုင်ရသဖြင့် မွန်းကြပ်ပြီး စိတ်မသက်သာရာ ခံစားရကြောင်း၊ ကိုယ်ဝန်သည် မိခင်များ အတွက်လည်း အဆင်မပြေကြောင်း ၎င်းကဆက်ပြောသည်။
ထို့အပြင် စစ်ရှောင်ဦးရေ ထပ်မံတိုးလာသည်နှင့်အမျှ စားနပ်ရိက္ခာအခက်အခဲများရှိပြီး လာရောက်ကူညီပေးမည့် အဖွဲ့အစည်း မရှိသေးကာ စစ်ရှောင်အချင်းချင်း ကူညီပေးနေရကြောင်း သိရသည်။
“ တချို့ဆိုရင် အိုးခွက်ပန်းကန်ကစ ငှားရမ်းတောင်းကျတယ်။ ကျမတို့လည်း ရှိတဲ့ပန်းကန်လေး၊ အိုးလေး ခွဲပြီးပေး လိုက်တယ်။ စစ်ရှောင်ကော်မတီ လည်း ရှာပေးတယ်။ တကယ့်အရေးကြီး လိုအပ်နေတဲ့ သူတွေဆိုရင် အိုး ၁ လုံး၊ ၂ လုံးပေးတာရှိတယ်။ စောင်တွေလည်း မျှပေးရတယ် “ ဟု မအဲက ထပ်လောင်းပြောသည်။
ကရင်နီ (ကယား) ပြည်အတွင်း “ ၁၁.၁၁ စစ်ဆင်ရေး “ တိုက်ပွဲကြောင့် ယနေ့အချိန်ထိ ဆီဆိုင်မြို့နယ်အတွင်း ထွက်ပြေးတိမ်းရှောင်လာကြသည့် စစ်ရှောင်များ နေ့စဉ်နှင့်အမျှရှိနေချိန် ဒေသခံများကလည်း ကူညီထောက်ပံ့ မပေးနိုင်တော့သဖြင့် အရပ်ဘက်အဖွဲ့အစည်း အသီးသီးအနေဖြင့် အလှူရှင်ရှာပြီး ကူညီပေးစေလိုကြောင်း စစ်ရှောင်ကော်မတီးများက တောင်းဆိုထားသည်။
