နှစ်စဉ် နှစ်တိုင်း နိုဝင်ဘာ (၂၅) ရက်နေ့မှာ စတင်ပြုလုပ်လေ့ရှိသော (၁၆)ရက်တာ လှုပ်ရှားမှု လုပ်ငန်းစဉ်များကို အာဏာသိမ်းပြီး နောက်ပိုင်းတွင် လျှို့ဝှက်၊ တိုးတိတ်စွာသာ ‌လုပ်ဆောင်နေရကြောင်း သျှမ်းတောင် ဒေသတွင်း အမျိုးသမီး အဖွဲ့အစည်း တစ်ဦးမှ ပြောသည်။

အဆိုပါ ၁၆ ရက်တာ လှုပ်ရှားမှုကို ကမ္ဘာတစ်ဝန်းတွင် (၁၉၉၁) ခုနှစ်မှ စတင်ကာ ဂျဲန်ဒါအခြေပြု အကြမ်းဖက်မှုများကို ပပျောက်စေရန် ရည်ရွယ်ချက်ဖြင့် အသိပညာပေး အခမ်းအနားများ၊ လူထုလှုပ်ရှားမှုများကို နိုဝင်ဘာ (၂၅) ရက် မှ ဒီဇင်ဘာ (၁၀) ရက်နေ့ အထိ ကျင်းပလေ့ရှိကြပြီး အပြည်ပြည်ဆိုင်ရာ အမျိုးသမီးများပေါ် အကြမ်းဖက်မှု ပပျောက်ရေး‌နေ့ နှင့် လူ့အခွင့်အရေး‌နေ့ကဲ့သို့ နေ့ထူးနေ့မြတ်များစွာကို ထို(၁၆)ရက်တာ ကာလအတွင်း ပါဝင်သည်။

“အရင်တုန်းကဆို အဖွဲ့အစည်းတွေကနေ လူထုလှုပ်ရှားမှုတွေ အများကြီး ဒေသအနှံ့ ပြုလုပ်နိုင်တယ်။ အာဏာသိမ်းပြီးနောက်ပိုင်း လူမြင်ကွင်းမှာ ဘာမှလုပ်လို့ မရတော့ဘူး။ အခုဆို (၁၆) ရက်တာ လှုပ်ရှားမှုတွေ လုပ်နေတာမြင်ရင် အဖမ်းခံရမှာစိုးလို့ အစစအရာရာ သတိထား လုပ်ဆောင်နေရတယ်။ တချို့ တိုးတိုးတိတ်တိတ် လုပ်နေတဲ့ အဖွဲ့အစည်းတွေ ရှိနေသေးသလို တချို့ကျတော့လည်း လုံးဝ လုပ်လို့မရတော့ဘူး” ဟု တက်ကြွ လှုပ်ရှားသူ အမျိုးသမီးမှ ပြောသည်။

မြန်မာနိုင်ငံတွင်လည်း (၂၀၁၂) ခုနှစ်မှ စတင်ကာ (၁၆) ရက်တာ လှုပ်ရှားမှုကို ဖဲကြိုးဖြူ လှုပ်ရှားမှုနှင့် အတူတကွ ယှဉ်တွဲ လုပ်ဆောင်လေ့ရှိကြပြီး ထိုအကြမ်းဖက်မှုများ ရပ်တန့်နိုင်ရန် အသိပညာပေးများ ပေးခြင်း၊ ဟောပြောပွဲများ၊ သီချင်းဆိုပွဲများနှင့် သံချပ်ပြိုင်ပွဲများကို မီဒီယာမှတစ်ဆင့်သော်လည်းကောင်း၊ လူထုလှုပ်ရှားမှုဖြင့် သော်လည်းကောင်း ပြုလုပ်လေ့ ရှိခဲ့ကြသည်။

“အရင်တုန်းက ဒီလိုနေ့တွေမှာ ဖဲကြိုးဖြူလေးတွေ တပ်ဆင်ပြီး ဆင်နွှဲကြတယ်။ ဖဲကြိုးဖြူ တပ်ဆင်ရတဲ့ အကြောင်းက အမျိုးသမီးတွေကို အကြမ်းမဖက်တော့ပါဘူး၊ အကြမ်းဖက်မှုတွေကိုလည်း တားဆီး ကာကွယ်ပေးပါ့မယ်ဆိုတဲ့ အဓိပ္ပါယ်နဲ့ ဖြစ်ပါတယ်။ အခုနေ့များတော့ ဖဲကြိုးဖြူ တပ်သွားရင် လုံးဝ မေးမြန်းခံရ၊ အဖမ်းခံရမှာပဲပေါ့။ အကြမ်းဖက်တဲ့သူတွေက သူတို့ ကိုယ်တိုင်ဖြစ်နေတော့လေ” ဟုလည်း ၎င်းမှ ဆက်ပြောကြားသည်။

မြန်မာနိုင်ငံတွင် စစ်ကောင်စီမှ အာဏာသိမ်းပြီးနောက်ပိုင်း အမျိုးသမီးများ အကြမ်းဖက်ခံရမှုကို ယခင်ကထက် ပိုမိုတွေ့ကြုံလာရပြီး တရားဥပဒေ စိုးမိုးခြင်းလည်း မရှိသည့်အတွက် အမျိုးသမီးများအနေဖြင့် တရားမျှတမှုရရှိရန် ခက်ခဲနေသလို စစ်‌ကောင်စီမှ အမျိုးသမီးများအ‌ ေပါ်အကြမ်းဖက် မှုများကို တားဆီးကာကွယ်ခြင်း မရှိသည့်အပြင် စစ်ကောင်စီတပ်ဖွဲ့ဝင်များမှ အကြမ်းဖက်ခြင်းကို ခံစားရသော အမျိုးသမီးများစွာ ရှိကြောင်းကိုလည်း သိရှိရသည်။