သျှမ်းပြည် တောင်ကြီးခရိုင်အတွင်းသို့ ရောက်ရှိလာသည့် စစ်ဘေးရှောင်များသည် ဧည့်စာရင်းတိုင်ကြားရသည့် အတွက် စိုးရိမ်စိတ်များရှိနေကြောင်း စုံစမ်းသိရသည်။

သျှမ်း – ကရင်နီ နယ်စပ်တကြော “၁၁.၁၁ စစ်ဆင်ရေး” တိုက်ပွဲများကြောင့် တောင်ကြီးခရိုင်၊ မြို့အတွင်းသို့ ဝင်ရောက် ခိုလှုံလာသည့် စစ်ရှောင်များအတွက် ဧည့်စာရင်းများတိုင်ကြားရသဖြင့် စစ်ဘေးရှောင် ပြည်သူများ နှင့် ဒေသခံများက စိုးရိမ်နေကြသည်။

“တောင်ကြီးမှာတော့ တိုးတိုးတိတ်တိတ် နေ နေကြရတာ၊ သူတို့ လာရှုပ်မှာဆိုးလို့လေ။ လာနေတဲ့ လူတွေကလည်း ဧည့်စာရင်း မတိုင်ရဲဘူး။ အိမ်ထဲမှာပဲ နေကြတာပေါ့၊ သိပ်မထွက်ရဲကြဘူးပေါ့” ဟု တောင်ကြီး ဒေသခံ အမျိုးသားတစ်ဦးက ပြောသည်။

အောင်ပန်းမြို့ နှင့် ပင်လောင်းမြို့နယ်ရှိ ကျေးရွာအချို့ တွင် ရောက်ရှိနေကြသည့် စစ်ဘေးရှောင်များလည်း ဧည့်စာရင်းများတိုင်ခြင်း၊ ရွာသူကြီးကို အကြောင်းကြားခြင်းပြုလုပ်နေကြောင်း စစ်ဘေးရှောင် ကူညီသူများက ပြောသည်။

“ကျနော်တို့ ဒီမှာကတော့ ဘယ်မှာပဲ တည်းတည်းပေါ့၊ ကျနော်တို့ အိမ်မှာလာနေလည်း တာဝန်ယူပြီး ဧည့်စာရင်းကို ကောက်ရတယ်။ ပြီးတော့ ဌာနဆိုင်ရာ၊ ရပ်ကွက်အုပ်ချုပ်ရေးမှူးတွေကိုလည်း တင်ရတာပဲလေ။ ဧည့်စာရင်းမတင်ပဲနဲ့ နေပိုင်ခွင့် မရှိဘူး။ ဒီမှာကတော့အဲ့လို ဧည့်စာရင်းမတိုင်ပဲနဲ့ နေပိုင်ခွင့်မရှိဘူးလေ” ဟု အောင်ပန်းမြို့ ဒေသခံ အမျိုးသားတစ်ဦးက ပြောသည်။

သျှမ်း – ကရင်နီ နယ်စပ်တကြောတွင် နိုဝင်ဘာလ ၁၅ ရက်မှစပြီး ဒေသခံများ စစ်ဘေးတိမ်းရှောင်နေရပြီး တောင်ကြီး၊ အောင်ပန်း ၊ညောင်ရွှေ၊ ၊ ပင်လောင်းတို့တွင် ပြောင်းရွှေ့ကာ နိုဝင်ဘာလ ၁၉ ရက်နေ့မှ စတင်လက်ခံခဲ့ ကြောင်း သိရသည်။

အောင်ပန်းမြို့အတွင်းသို့ ရောက်လာသည့် စစ်ဘေးရှောင်များမှာ စုစုပေါင်း ၅၀၀ ကျော် ရှိကြောင်း သိရသည်။