သျှမ်းပြည် လားရှိုးမြို့နယ်တွင် စစ်ကောင်စီတပ်မှ လေကြောင်းဗုံးကြဲမှုကြောင့် အမျိုးသမီး ၂ ဦး သေဆုံးသွားခဲ့ကြောင်း စုံစမ်းသိရသည်။
ယမန်နေ့ (နိုဝင်ဘာ ၁၅ ရက်) ညနေ ၃ နာရီခွဲခန့်က လားရှိုးမြို့နယ် ကွန်ကြိုင်းကျေးရွာတွင် စစ်ကောင်စီတပ်မှ လေကြောင်းဗုံးကြဲ တိုက်ခိုက်မှုကြောင့် အသက် ၄၀ အရွယ်ရှိ နန်းပီး ဆိုသူ အမျိုးသမီးသည် နေအိမ်၌ ပွဲချင်းပြီး သေဆုံးသွားခဲ့ပြီး အသက် ၅၀ အရွယ်ရှိ နန်းခမ်း ဆိုသူမှာ ဒဏ်ရာပြင်းထန်ခြင်းကြောင့် မိုင်းယန်းကျေးရွာသို့ ဆေးကုသနေစဉ် နိုဝင်ဘာ ၁၆ ရက် နံနက်တွင် ထပ်မံသေဆုံးသွားကြောင်း လားရှိုးဒေသခံများက ပြောသည်။
“ကွန်ကြိုင်းရွာဘက်မှာ နိုဝင်ဘာ ၁၅ ရက်နေ့က စစ်ကောင်စီ လေယာဉ်နဲ့ ဗုံးလာကြဲလို့ နန်းပီး က အိမ်မှာ ပွဲချင်းပြီး ဆုံးသွားတယ်။ နန်းခမ်းကတော့ ဒဏ်ရာပြင်းထန်ပြီး စိုးရိမ်ရလို့ မိုင်းယန်းမှာ ရွှေ့လာတာ၊ မနေ့ (နိုဝင်ဘာ ၁၆ ရက်) မနက်မှာ ဆုံးသွားတယ်။ နောက်ပြီး ပါ့လီရဲ့ အိမ်ကတော့ လုံးဝကို ပျက်စီးသွားတယ်”ဟု လားရှိုးမြို့နယ်မှ ဒေသခံတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်၏ လေကြောင်းဗုံးကြဲတိုက်ခိုက်မှုကြောင့် ပွဲချင်းပြီး သေဆုံးသွားသူ နန်းပီး၏ ရုပ်အလောင်းအား ကိုးကန့်တပ်ဖွဲ့ MNDAA က မြေမြှုပ်သင်္ဂြိုဟ်ပေးခဲ့ကြောင်းသိရသည်။
သျှမ်းပြည် မြောက်ပိုင်းတွင် “၁၀၂၇ စစ်ဆင်ရေး” တိုက်ပွဲအတွင်း အရပ်သားသေဆုံးမှု ၄၀ ဦးကျော်အထိ ရှိလာပြီး၊ ၎င်းတို့ထဲတွင် လားရှိုးမြို့နယ်၌ အရပ်သား ၁၀ ဦး ထက်မနည်း သေဆုံးကြောင်း သိရသည်။
လက်ရှိတွင် လားရှိုးမြို့အခြေစိုက် စစ်ကောင်စီတပ်စခန်းများကို ညီနောင်မဟာမိတ် ၃ ဖွဲ့က ဒရုန်းဖြင့် ခြိမ်းခြောက်တိုက်ခိုက်မှုများ ရှိနေပြီး “၁၀၂၇ စစ်ဆင်ရေး” စတင်သည့် အောက်တိုဘာ ၂၇ ရက်မှစ၍ ယနေ့ နိုဝင်ဘာ ၁၇ ရက်အထိ လားရှိုးမြို့နယ်တွင် စစ်ဘေးရှောင်ဦးရေ ၆၅၀၀ ကျော် နှင့် သိန္နီမြို့မှ ထွက်ပြေးတိမ်းရှောင်လာသည့် စစ်ဘေးရှောင် ၁၅၀၀ ဦးခန့်၊ စုစုပေါင်း စစ်ဘေးရှောင်ဦးရေ ၉၀၀၀ ကျော်အတွက် စားနပ်ရိက္ခာနှင့် စစ်ရှောင်နေရာ အခက်အခဲများ ရှိနေကြောင်း သိရသည်။
Leave a Comments