သျှမ်းပြည် လားရှိုးမြို့အခြေစိုက် စစ်ကောင်စီတပ်စခန်းများကို ညီနောင်မဟာမိတ်တပ်ဖွဲ့များက ဒရုန်းဖြင့် ထိုးစစ်ဆင် တိုက်ခိုက်ပြီး သေဆုံးမှုရှိကြောင်း စုံစမ်းသိရသည်။
လားရှိုးမြို့ အခြေစိုက် စစ်ကောင်စီတပ်များဖြစ်သည့် အမတ-၃၄၆ အမြောက်တပ်၊ ခလရ-၄၁ တပ် နှင့် ခမရ-၅၀၇ တပ်တို့ကို ညီနောင်မဟာမိတ်တပ်များက နိုဝင်ဘာ ၁၁ ရက် ညအချိန်တွင် ဒရုန်းဖြင့် ဗုံးကျဲတိုက်ခိုက်ခဲ့ပြီး လူထိခိုက်သေဆုံးမှုရှိကြောင်း လားရှိုးဒေသခံများက ပြောသည်။
“ဟုတ်တယ်၊ အရင်ည (နိုဝင်ဘာ ၁၁ ရက်)က အထက်မန်အိုင်မှာရှိတဲ့ ခမရ-၅၀၇ တပ်ထဲကို ကိုးကန့်တပ်က ဒရုန်းနဲ့ ဗုံးလာပစ်တော့ တပ်ထဲက မိန်းမ ၂ ဦး ပွဲချင်းပြီး သေတယ်ပြောတယ်၊ သေချာမသိရသေးဘူး။ ဒဏ်ရာရတဲ့လူတွေကို လားရှိုးက စစ်ဆေးရုံထဲမှာ ကုပေးထားတယ် ပြောတယ်။ ခုတလော လားရှိုးမြို့ပေါ်က တပ်တွေကို မဟာမိတ်တပ်တွေက ဒရုန်းနဲ့ ထောက်လှမ်းပြီး ဗုံးကျဲတာတွေ ရှိလာတယ်”ဟု လားရှိုးမြို့မှ ဒေသခံတစ်ဦးက သျှမ်းသံတော်ဆင့်ကို ပြောသည်။
ယမန်နေ့ (နိုဝင်ဘာ ၁၁ ရက်) ညအချိန်တွင် ကိုးကန့်တပ်ဖွဲ့ MNDAA က လားရှိုးမြို့ အထက်မန်အိုင်ရှိ ခမရ-၅၀၇ တပ်အတွင်းသို့ ဒရုန်းဖြင့် ဗုံးကြဲတိုက်ခိုက်ခဲ့ခြင်းကြောင့် တပ်အတွင်းရှိ အမျိုးသမီး ၄ ဦး သေဆုံးခဲ့သည်ဟု သိရသော်လည်း သျှမ်းသံတော်ဆင့်အနေဖြင့် သီးခြားအတည်ပြုနိုင်ခြင်း မရှိသေးပါ။
အလားတူ နိုဝင်ဘာလ ၁၁ ရက်နေ့ နံနက်တွင် လားရှိုးမြို့ အမှတ်(၂) ရဲစခန်းကိုလဲ ကိုးကန့်တပ်ဖွဲ့ MNDAA က ဒရုန်းဖြင့် ဗုံးကျဲတိုက်ခိုက်ခဲ့ရာ ၎င်းရဲစခန်းနှင့် ကပ်လျက်ရှိ မန်ပန်ပြည်သူ့စစ် အုတ်တံတိုင်း ထိမှန်ပျက်စီးခဲ့ပြီး နေအိမ်အချို့မှ ပြတင်းမှန်များလည်း အက်ကွဲခဲ့ကြောင်း လားရှိုးဒေသခံများက ပြောသည်။
ထို့အပြင် လားရှိုးမြို့အခြေစိုက် အရှေ့မြောက်တိုင်း စစ်ဌာနချုပ်နှင့် ခလရ-၄၁ ဗျူဟာကုန်း တို့ကိုလည်း ယမန်နေ့ (နိုဝင်ဘာ ၁၁ ရက်) နံနက် ၂ နာရီခွဲခန့်တွင် အမြောက်ဖြင့် တပြိုင်တည်း ပစ်ခတ်တိုက်ခိုက်ခဲ့ကြောင်း ကိုးကန့်တပ်ဖွဲ့ MNDAA က ထုတ်ပြန်ထားသည်။
လက်ရှိတွင် လားရှိုးမြို့အခြေစိုက် အရှေ့မြောက်တိုင်း စစ်ဌာနချုပ်ထဲမှနေ၍ အနီးအနား ကျေးရွာများသို့ စစ်ကောင်စီတပ်က နေ့စဉ်ရက်ဆက် လက်နက်ကြီးများဖြင့် ရမ်းသမ်းပစ်ခတ်နေခြင်းကြောင့် ပြည်သူသေဆုံးဒဏ်ရာရရှိမှုနှင့် လူနေအိမ် ထိခိုက်ပျက်စီးမှု အများအပြား ရှိနေကြောင်း လားရှိုးဒေသခံများက ပြောသည်။
ပြင်ဦးလွင်မြို့မှ ထိုးစစ်ဆင်ရန် အင်အားဖြည့်တင်းလာသော စစ်ကား ၄၀ စီးကျော်နှင့် သံချပ်ကာယာဉ် ၄ စီးတို့သည် ကျောက်မဲ၊ သီပေါ၊ လားရှိုးမြို့များသို့ ချီတက်နိုင်ရန်အတွက် စစ်ကောင်စီတပ်မှ ဂုတ်တွင်းလမ်းပိုင်းကို အပြင်းအထန် ထိုးဖောက်လျက်ရှိရာ TNLA တပ်ဖွဲ့မှ စစ်ကောင်စီ ထောက်ပို့လမ်းကြောင်းကို ဖြတ်တောက်နိုင်ရန်အတွက် သီပေါ ဘော်ကြိုအဝင်ရှိ ကျင်သီတံတားကို ယမန်နေ့ (နိုဝင်ဘာ ၁၂ ရက်)တွင် ဗုံးခွဲဖျက်ဆီးထားခြင်းကြောင့် တံတား အထက်ပိုင်းကျိုး၍ သွားလာနိုင်ခြင်းမရှိတော့ကြောင်း သိရသည်။
