သျှမ်းပြည် တောင်ပိုင်း ရွာငံ ဒေသတွင် စစ်ကောင်စီဘက် မှ တဖတ်သတ် လက်နက်ကြီး ပစ်ခတ်ပြီး ဒေသခံများ၏ ရာသီပေါ် သီးနှံခြံများရှိ ခြံစောင့်တဲ (၅)လုံးကို မီးရှို့ဖျက်ဆီးသွားကြောင်း ဒေသခံလူငယ် တစ်ဦးထံမှ သိရှိရသည်။
“နိုဝင်ဘာ(၁)ရက်နေ့ကစပြီး ည(၉)နာရီလောက် မှာ ရွာငံဘက်ကို စစ်ကားအစီး(၂၀) တက်လာတယ်။ (၄)ရက်နေ့မှာတော့ စစ်ကောင်စီဘက်က စစ်ကြောင်းထိုးပြီး လက်နက်ကြီးတွေနဲ့ ရမ်းသမ်းထုတယ်။ အခုက နှစ်ဖက်အပြန်အလှန် ပစ်ခတ်တာမျိုးလည်း မရှိဘဲ ဒီလိုဖြစ်တာ” ဟု အဆိုပါ ဒေသခံလူငယ်မှ ပြောသည်။
ခြံစောင့်တဲများ မီးရှို့ခံရသည့် အကြောင်းရင်းသည် စစ်ကောင်စီတပ်များမှ ထိုတဲများတွင် ဒေသခံကာကွယ်ရေး တပ်ဖွဲ့ဝင်များ မှီတင်းနေထိုင်သည် ဆိုကာ ဖျက်ဆီးသွားကြောင်း သိရှိရသည်။
“မီးရှို့ခံလိုက်ရတဲ့ ခြံစောင့်တဲတွေအထဲတွေက အခိုင်အမာ ဆောက်ထားတာ (၂)လုံးပါတယ်။ ကျန်တာက ဝါးတို့၊ သက်ကယ်တို့နဲ့ ဆောက်ထားတာပေါ့။ ဆုံးရှုံးသွားတာတွေက ကာလတန်ဖိုးအရဆို ဝါးနဲ့ဆောက်ထားတာတင် (၅)သိန်းအထက် ရှိတယ်။ အခိုင်အမာဆောက်ထားတဲ့ တဲ(၂)လုံးဆို သိန်း(၂၀)အထက် ရှိပါတယ်။ ဒီလိုဖြစ်ပြီးနောက်ပိုင်း တောထဲခြံထဲကို ဒေသခံတွေ အခုထိ မသွားအိပ်ရဲသေးဘူး” ဟု ၎င်းက ဆက်ပြောသည်။
ထိုစစ်ကောင်စီ တပ်ဖွဲ့ဝင်များမှာ ရွာငံ ဒေသတွင်း ကျေးရွာ ဆေးပေးခန်းတွင် အလှည့်ကျ နေထိုင်ကြကြောင်း သိရသည်။
ဆက်လက်ပြီး ဓနုပြည်သူ့ လွတ်မြောက်ရေးတပ်မတော် – DPLFက နိုဝင်ဘာလ (၁)ရက်နေ့တွင် ရပ်စောက်- နောင်ချိုလမ်းကို မှော်ဘုရင်စစ်ကြောင်းမှ နိုဝင်ဘာလ (၂)ရက်နေ့တွင် ဟန်မြင့်မိုရ်-ရွာငံလမ်းကို စစ်ကားများ ဖြတ်သန်းသွားလာခြင်း မပြုရန် ပိတ်ပင်ခဲ့သည်။
ထိုနောက်ပိုင်း စစ်ကောင်စီမှ ရွာငံ ဒေသခံများ၏ ကားများကို အသုံးပြုကာ လက်နက်၊ လူအင်အား၊ စားနပ်ရိက္ခာများ ထောက်ပို့လုပ်နေကြောင်း ထပ်မံသိရှိရသည်။
“စစ်ကားတွေနဲ့ သွားလာရင် ဖြတ်တိုက်ခံရမှာစိုးလို့ ရွာသားတွေရဲ့ ကားနဲ့ပဲ အတင်းအကြပ် ပေါ်တာဆွဲပြီး ထောက်ပို့လုပ်နေတာ။ အရင်ကဆို ကားရော ပိုင်ရှင်တွေကိုယ်တိုင်ပါ ပစ္စည်းလိုက်ပို့ပေးရတယ်၊ အခုကျတော့ ရွာထဲ ဘယ်အိမ်ကားရှိလဲ သူတို့က စာရင်းကောက်ထားတယ်။ သူတို့လိုတဲ့အခါဆို လာယူသုံးစွဲမယ်ပေါ့။ ဆီအပြည့်လဲထည့်ထားပေးဖို့၊ ဆီကုန်သွားရင်အဲ့နေရာမှာပဲ ကားကိုပစ်ထားခဲ့မယ် ဆိုပြီး ခြိမ်းခြောက်တာတွေလဲရှိတယ်”ဟု ထို ဒေသခံမှ ပြောကြားသွားသည်။
ယခုလက်ရှိ အချိန်တွင် ရွာငံ ဒေသခံများအနေဖြင့် စစ်ကောင်စီတပ်များ၏ ပစ်ခတ် ဖျက်ဆီးမှု၊ ခြိမ်းခြောက်မှုများကြောင့် စိုးရိမ်ပူပန်စွာ နေထိုင်လျက်ရှိရကြောင်း သိရှိရသည်။
နော်လာဝါမှ သတင်းပေးပို့သညါ
