သျှမ်းပြည် လားရှိုးမြို့တွင် အသက် ၁နှစ်ခွဲ အရွယ်ရှိ ကလေးငယ်ကို Ford ကားအနက်တစ်စီးက ဝင်ရောက်တိုက်သွားပြီး၊ ကားသမားထွက်ပြေးသွားကြောင်း စုံစမ်းသိရသည်။
သျှမ်းပြည် လားရှိုးမြို့ ရပ်ကွက် ၅၊၆၊၇ အဝင်လမ်းထိပ်တွင် ယမန်နေ့ ( နိုဝင်ဘာလ ၉) ရက် ညနေ ၄ နာရီခွဲဝန်းကျင်၌ Ford အနက်ရောင် ကားတစ်စီးသည် အသက် (၁)နှစ်ခွဲအရွယ်ရှိ ကလေးငယ်ကို ကားဖြင့် တိုက်ပြီး၊ ၎င်းကလေးသည် ပွဲချင်းပြီး သေဆုံးသွားခဲ့ကာ ၊ ကားသမားသည် ထွက်ပြေးသွားကြောင်း ဒေသခံ အမျိုးသမီး တစ်ဦး က သျှမ်းသံတော်ဆင့်ကို ပြောသည်။
“ကလေးကိုမမြင်ပဲကားက ဝင်ကြိတ်သွားတာ၊ ဆင်းကြည့်သေးတယ် သေတော့ ချက်ချင်းထွက် ပြေးသွား တာ၊ ကလေးက ခေါင်းပြားသွားတယ်။ ကားပိုင်ရှင်ကိုတော့ ပြန်တွေ့တယ် သူမောင်းတာ မဟုတ်ဘူး။ သူ့ကားကို သူငယ်ချင်းက ငှားသွားတာတဲ့”ဟုလားရှိုး ဒေသခံ အမျိုးသမီးတစ်ဦးက ပြောသည်။
ထိုကလေးငယ်ကို အမှတ်-(၁၂၃)ယာဉ်ထိန်းတပ်ဖွဲ့စု၊တာဝန်မှူး-ဒုရဲအုပ်၊ယာဉ်ထိန်းရဲတပ်ဖွဲ့ဝင်များနှင့် လားရှိုးလူငယ်များ လူမှုကူညီရေးအဖွဲ့တို့ ပူးပေါင်းပြီး (ဦးခေါင်းပွင့်)ဒဏ်ရာဖြင့် သေဆုံးသွားသည့် ကလေးငယ်ကို လားရှိုးပြည်သူ့ဆေးရုံကြီး-အရေးပေါ်ဌာန မှ တစ်ဆင့် ရင်ခွဲရုံသို့ ပို့ဆောင်ခဲ့ကြောင်း သိရသည်။
ထိုအပြင် ယနေ့ (နိုဝင်ဘာလ ၉ ရက်) နံနက် ၇ နာရီကျော်အချိန်က လားရှိုးမြို့နယ် မိုင်းတင်ကျေးရွာအုပ်စုရှိ အသက် ၆၀ အရွယ်ရှိ နိုင်းမွန်း နှင့် အသက် ၁၂ နှစ်အရွယ်ရှိ နန်းဆိုင် ဆိုသူ မိန်းကလေး ၁ ဦးတို့သည် နေအိမ်၌ နံနက်စာ ချက်ပြုတ်နေစဉ် စစ်ကောင်စီတပ်ဘက်မှ ရမ်းသမ်းပစ်ခတ်ကြောင့် ပွဲချင်းပြီး သေဆုံးခဲ့သည်။
စစ်တပ်က အာဏာသိမ်းပြီးနောက်ပိုင်း လားရှိုးမြို့တွင် ခိုးဆိုးလုယက်၊ ဓားပြတိုက်မှု၊ ဗုံးပေါက်ကွဲမှု စသည်ဖြင့် ပဋိပက္ခများ မကြာခဏဖြစ်ပေါ်နေကာ အုပ်ချုပ်ရေး၊ တရားဉပဒေရေး မရှိတော့ရာမှ ပြည်သူများသည် စိုးရိမ်ကြောက်လန့်စိတ်ဖြင့် နေထိုင်ကြရကြောင်း သိရသည်။
Leave a Comments