“ ၁၀၂၇ စစ်ဆင်ရေး “ တိုက်ပွဲကြောင့် လောက်ကိုင်မြို့အတွင်း ပိတ်မိနေကြသူများသည် အရဲစွန့်ပြီး နေရပ်ပြန်လာကြရာ လမ်းတစ်ဝက်၌ နှစ်ရက်ကြာထပ်မံ ပိတ်မိနေပြီး စားနပ်ရိက္ခာပြတ်လပ်မှု နှင့် ကြုံတွေ့နေရကြောင်း စုံစမ်းသိရသည်။

ပြီးခဲ့သည့်ရက်ပိုင်း ( နိုဝင်ဘာလ ၄ ရက် ) နှင့် (နိုဝင်ဘာလ ၅ ရက် ) နှစ်ရက်အတွင်း လောက်ကိုင်မြို့ကို အရဲစွန့်ပြီး နေရပ်ပြန်လာကြသူ လူဦးရေ ၆၀၀ ကျော်သည် ပြန်လာစဉ် လောက်ကိုင် – ချင်းရွှေဟော်ကြားရှိ ပါစင်ကျော်ရွာအနီး လမ်းတစ်ဝက်တွင် ပိတ်မိနေသည်ဟု ပိတ်မိနေသူ အမျိုးသားတစ်ဦးက ပြောသည်။

“ ပြန်လှည့်လို့လည်း မရဘူး။ လောက်ကိုင်ဘက်မှာလည်း ပိတ်နေတယ်။ စားစရာပါလာတာလည်း ကုန်ပြီ။ အခုလောဆယ် ကြံရာကြံစိုက်ခင်းထဲက ကြံချိုးစားနေရတယ်။ ရေမချိုးရ၊ ရေမသောက်ရတာလည်း နှစ်ရက်ရှိပြီ “ ဟု ၎င်းက ပြောသည်။

ပိတ်မိနေသူ လူဦးရေ ၆၀၀ ကျော်ထဲတွင် ကလေးငယ်များလည်း ပါဝင်နေသည်။

ထို့အတူ ဖုန်းလိုင်း ပြတ်တောက်မှုနှင့် ကြုံတွေ့နေရသဖြင့် ဆက်သွယ်ရန် ခက်ခဲသည့် အခြေအနေ နှင့် ကြုံတွေ့နေရသည်။

ထို့အပြင် လောက်ကိုင်မြို့ဘက်ကို ပြန်လှည့်ပြီး ခရီးဆက်ရန်အတွက် မြို့အဝင်ရှိ စစ်တပ်မှ ပိတ်ထားသောကြောင့် ပြန်ဝင်လို့မရတော့ပေ။

“ ပြန်လှည့်လို့ မရတော့ဘူး။ စစ်တပ်က လောက်ကိုင်ဘက်မှာ ပိတ်ထားပါတယ်။ ပြန်လှည့်ဖို့ ဆိုင်ကယ်နဲ့ သွားပြီး ညှိကြသူတွေထဲ တချို့ပြန်မရောက်လာဘူး “ ဟု ပိတ်မိနေသူ အမျိုးသားတစ်ဦးက ထပ်လောင်းပြောသည်။

တစ်ဖက်တွင်လည်း ချင်းရွှေဟော်မြို့ကို ထိန်းချုပ်ထားတဲ့ ကိုးကန့် MNDAA တပ်ဖွဲ့မှ နယ်မြေမတည်ငြိမ်မှုကြောင့် ဖြတ်သန်းသွားလာခွင့်အပြင် မြို့ထဲကို ဝင်ခွင့်ပိတ်ပင်ထားကြောင်းလည်း သိရသည်။

အဆိုပါ ကိစ္စနှင့် ပတ်သက်ပြီး ကိုးကန့် MNDAA ရဲ့ ပြောရေးဆိုခွင့်ရှိသူ လီကျားဝင်းက “ ဒါကတော့ စစ်ကောင်စီဘက်ကနေ ပိတ်ထားတာနေမှာပါ။ ကျနော်တို့ဘက်က အဲ့လိုလုပ်တာ မရှိဘူး “ ဟု ကိုးကန့် MNDAA ရဲ့ ပြောရေးဆိုခွင့်ရှိသူ လီကျားဝင်းက ငြင်းဆိုထားသည်။

လက်ရှိ လမ်းတစ်ဝက်မှာ ပိတ်မိနေသည့် လူဦးရေ ၆၀၀ ကျော်သည် စားနပ်ရိက္ခာပြတ်လပ်နေပြီ ဖြစ်သောကြောင့် အရေးပေါ်အကူညီလိုအပ်နေလျက်ရှိသော်လည်း သွားရောက်ကူညီသူ မရှိသေးပေ။

ယင်းကဲ့သို့ အရဲစွန့်ပြီး နေရပ်ပြန်လာကြသူများကလည်း ပြီးခဲ့သည့် ( နိုဝင်ဘာလ ၄ ရက် ) က လှုမှုကွန်ရက် စာမျက်နှာပေါ်၌ ပြန်နှံ့လာသည့် “ လောက်ကိုင်မှ လားရှိုးသို့ လမ်းလျှောက်ပြန်လို့ရတယ် “ ဆိုသည့် သတင်းအမှားတခုကြောင့် စွန့်စားပြီးလာကြသူများ ဖြစ်သည်။