အာဏာသိမ်း စစ်ကောင်စီတပ်ဖွဲ့မှ ရဟတ်ယာဥ်အသုံးပြုပြီး သျှမ်းမြောက်ဒေသ မူဆယ်၊ နမ့်ခမ်း၊ ပန်ဆိုင်းမြို့ တလျှောက်ကို ဓာတုဆေးရည်ဖြင့် ပတ်ဖြန်းကာ နမ့်ခမ်းမြို့ဒေသခံတစ်ဦး သေဆုံးသွားခဲ့ဆိုသည့် ရုပ်ပုံ၊ ဗီဒီယိုဖိုင်နှင့်အတူ လူမှုကွန်ရက် စာမျက်နှာပေါ်၌ သတင်းအမှားဖြန့်ဝေနေသည်။

လူမှုကွန်ရက် ဖေ့ဘုတ်ပေ့ (facebook page) ဖြစ်တဲ့ Lai Dai Noom SP ဆိုသည့် အကောင့်တစ်ခုမှ “ 2023-11-1 ရက်နေ့က နမ့်ခမ်းကအမျိုးတစ်ယောက် စစ်ကောင်စီဖြန်းထားတဲ့ ဓာတုဆေးရည်မိပြီး ဆုံးသွားပါပြီ။ သျှမ်းမြောက်ဒေသက လူတွေသတိထားပြီး အပြင်ထွက်ပါ “ (မူရင်းအရေးအသား) ဟုဆိုကာ လူအများထိတ်လန့်စေအောင် ရည်ရွယ်ချက်ဖြင့် သျှမ်းစာနှင့်ရေးသား ဖြန့်ချိနေကြောင်း မသက်ဆိုင်သည့် ရုပ်သံဖိုင်နှင့်အတူ ဖြန့်ဝေထားသည်။

သျှမ်းသံတော်ဆင့် အချက်အလက်စစ်ဆေးသည့် အဖွဲ့အနေဖြင့် စစ်တပ်မှ ရဟတ်ယာဥ် အသုံးပြုပြီး ဓာတုဆေးဖြန်းခြင်းအပေါ် စီစစ်ခဲ့ရာ သတင်းအချက်အလက် မှားယွင်းနေကြောင်း တွေ့ရသည်။

တိုက်ပွဲကြောင့် တရုတ်နယ်စပ်တလျှောက်ရှိ မူဆယ်၊ နမ့်ခမ်း၊ ပန်ဆိုင်းမြို့ကို စစ်တပ်မှ ရဟတ်ယာဉ်ဖြင့် ပျံဝဲနေလျက်ရှိသည်။ သို့ပေမယ့် ဓာတုဆေးရည် ပတ်ဖြန်းခြင်း ရှိ၊ မရှိကိုတော့ အတည်ပြု၍ မရပေ။

ထို ဗီဒီယိုဖိုင်ထဲမှ အမျိုးသားတစ်ဦးဟာ ပန်ဆိုင်းမြို့ (ကြူဂုတ်)မှ ပရဟိတလူမှုကူညီရေးအသင်း အဖွဲ့ဝင် (စိုင်းဆိုင်လူ) ဆိုသူဖြစ်ပြီး သွေးတိုးတက်မေ့လှဲနေသောကြောင့် ဆေးရုံသို့ ပို့ဆောင်ကုသနေရသည့် ရုပ်သံဖိုင် ဖြစ်ကြောင်း ဒေသခံအမျိုးသားတစ်ဦးက အတည်ပြုထားပါသည်။

ဖြစ်စဉ်မှာ ယမန်နေ့ ( နိုဝင်ဘာလ ၁ ရက်) နံနက်ပိုင်း ၉ နာရီဝန်းကျင်တွင် ဖြစ်ပွားခဲ့ပါသည်။

“ မနေ့က ပန်ဆိုင်း (ကြူဂုတ်) မှာလက်နက်ကြီး ပစ်ခတ်သံကြားလို့ သူ့ကလေးကိုချီပြီး တခြားအိမ်ကို ထွက်ပြေးရင်း ဖြစ်တာပါ။ အစပိုင်းကတော့ သူခေါင်းကိုက်တယ်ဆိုပြီး ခေါင်းကိုလက်နဲ့ပုတ်တာ။ အဲ့လိုဖြစ်တာ မကြာဘူး၊ အုန်းခနဲ လှဲကြသွားတာ “ ဟု ပန်ဆိုင်းမြို့ဒေသခံတစ်ဦးက သျှမ်းသံတော်ဆင့်ကို အတည်ပြုပြောဆိုထားသည်။

လက်ရှိအချိန်ထိ တရုတ်ပြည် ရွှေလီမြို့ရှိ ပုဂ္ဂလိကဆေးရုံတစ်ခုသို့ ဆေးဝါးကုသခံယူနေရဆဲ ဖြစ်သည်။

ထို့ကြောင့် စစ်တပ်မှ ရဟတ်ယာဉ်အသုံးပြုပြီး ဓာတုဆေးဝါး ပတ်ဖြန်းကာ နမ့်ခမ်းမြို့ဒေသခံတစ်ဦး သေဆုံးသွားခဲ့သည်ဆိုသည့် သတင်းမှာ အမှားဖြစ်ပြီး၊ သတင်းအချက်အလက်များကို မစိစစ်ဘဲ မှားယွင်းစွာ တင်ပြနေသဖြင့် တိုက်ပွဲကြား ပြည်သူများ အထိတ်အလန့် ဖြစ်စေရသည်။