သျှမ်းပြည် မြောက်ပိုင်း “ ၁၀၂၇” စစ်ဆင်ရေး ဖြစ်ပွားပြီးနောက် ကုန်စျေးနှုန်းများ အဆမတန်မြင့်တက်လာကြောင်း စုံစမ်းသိရသည်။

သျှမ်းသံတော်ဆင့် ကောက်ယူထားသည့် သတင်းအချက်အလက်အရ သျှမ်းပြည်မြောက်ပိုင်း မူဆယ်မြို့ အပါအဝင် စစ်ရေးပဋိပက္ခဖြစ်ပွားနေသည့် သိန္နီမြို့၊ လောက်ကိုင်မြို့၊ လားရှိုးမြို့တို့တွင် ကုန်စျေးနှုန်း တစ်ဆစီ ခုန်တက်သွားသည်။

လက်ရှိ ကုန်စျေးနှုန်းများသည့် ကုန်သည်များ၏ လက်ထဲတွင် တည်ရှိပြီး စစ်ရေးပဋိပက္ခနှင့် ကုန်စီဆင်းမှုလမ်းကြောင်း ပိတ်ဆိုင်းမှုကို အခွင့်ကောင်းယူကာ မူဆယ်မြို့တွင် ကြက်ဥ အလုံး (၃၀) တစ်ကတ်လျှင် မြန်မာကျပ်ငွေ တစ်သောင်း ရှစ်ထောင်ကျပ်ထိ ဖြစ်ပွားပြီး၊ ဆန်တစ်အိတ်လျှင် ၂သိန်းကျပ်ထိရှိလာပြီ ဖြစ်ကြောင်း သိရသည်။

ယခင်က ဆန် တစ်အိတ်လျှင် ၁ သိန်း ကျော်သာရှိပြီး၊ ယခုတွင် ဆန်တစ်အိတ်လျှင် ၂ သိန်း ကျော်ထိရှိနေကြောင်း ဒေသခံအမျိုးတစ်သားတစ်ဦးက သျှမ်သံတော်ဆင့်ကိုပြောသည်။

“ဆန်ဈေးနှုန်းတွေက သူတို့ဆီမှာပဲရှိတာ၊ တချို့တွေက ဈေးတင်ရောင်းကြတယ်။ တချို့တွေကတော့ အရင်ကဈေးနှုန်းနဲ့ ရောင်နေကြတယ်၊ ချက်ချင်းဈေးတင်လာတာဆိုလို့ ကြက်သား ဈေးနဲ့ ကြက်ဥဈေးပဲရှိတယ်” ဟု မူဆယ်မြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ယခင်က ကြက်ဥ တစ်ကဒ်လျှင် ၆ ထောင်ကျပ် သာရှိသော်လည်း ယခုတွင် ကြက်ဥ တစ်ကတ်လျှင် (၁သောင်း ၆ထောင်ကျပ် မှ ၂ သောင်းကျပ်) အကြား ဈေးနှုန်းများတက်နေကြောင်း မူဆယ် ဒေသခံများက သျှမ်းသံတော်ဆင့်ကို ပြောပါသည်။

“တချို့ဆိုင်တွေက ကြက်ဥ လောင်ထားကုန်ပြီ ဘယ်ဆိုင်မှမရောင်းတော့ဘူးတဲ့၊ မရရင်တော့ ကျမဆိုင်က ခေတ္တပိတ်ထားရတော့မှာ” ဟု မူဆယ်မြို့ဒေသခံအမျိုးသမီးတစ်ဦးက သျှမ်းသံတော်ဆင့်ကိုပြောသည်။

အလားတူ လားရှိုးမြို့ ၊ လောက်ကိုင်မြို့ ၊ သိန္နီမြို့တို့တွင်လည်း ဆန်းဈေးနှုန်းများအဆမတန် ဈေးတက် နေကြောင်းသိရသည်။လားရှိုးနှင့် သိန္နီတို့တွင် ဆန်တစ်အိတ်လျှင် ၂ သိန်းကျပ် ကျော် နှင့် လောက်ကိုင် တွင် ဆန်တစ်အိတ်လျှင် တရုတ်ယွမ်ငွေ ၁၀၀၀ ယွမ် ( ကျပ်ငွေ ၄ သိန်းနီးပါး) ရှိနေကြောင်း သိရသည်။

ထိုပြင် သျှမ်းပြည် ဟိုပန်မြို့တွင်လည်း တိုက်ပွဲများကြောင့် လမ်းကြောင်းပိတ်ဆို့ခြင်း၊ တံတားကျိုး ပြတ်ခြင်းကြောင့် ကုန်သွင်း၊ ထုတ်ကုန် ပြတ်တောက်ကာ စားနပ်ရိက္ခာကို အလုအယက် ပြေးဝယ်နေရကြောင်းသိရသည်