သျှမ်း-ကရင်နီနယ်စပ် ပင်လောင်း-ဖယ်ခုံ လမ်းကြောတစ်ခုလုံးတွင် စစ်ကောင်စီနှင့် ပအိုဝ်းပြည်သူ့စစ် PNO တပ်ဖွဲ့တို့က ရိက္ခာတင်ကားသွားလာမှု ပိတ်ပင်လိုက်သဖြင့် စစ်ဘေးရှောင်များ စားနပ်ရိက္ခာကို စျေးကြီးပေး ဝယ်ယူနေရကြောင်း စုံစမ်းသိရသည်။
သျှမ်းပြည် တောင်ကြီးခရိုင် ပင်လောင်း-ဖယ်ခုံ လမ်းကြောကို စစ်ကောင်စီနှင့် PNO တပ်ဖွဲ့တို့က ရိက္ခာတင်ကား၊ ကုန်ကားများကို သွားလာခွင့်ပိတ်သည်မှာ နှစ်ပတ်နီးပါး ရှိလာပြီး စစ်ရှောင်စခန်းတွင် နေထိုင်သည့် စစ်ဘေးရှောင်ပြည်သူများက စားနပ်ရိက္ခာအတွက် စျေးကြီးပေးပြီး ဝယ်ယူနေရသဖြင့် အခက်အခဲဖြစ်နေကြောင်း ဖယ်ခုံစစ်ဘေးရှောင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“စားနပ်ရိက္ခာ ပြတ်တော့ မှောင်ခိုဈေးတွေနဲ့ဆိုတော့ ဈေးတွေက ၅ ဆလောက် တက်မယ်ထင်တယ်။ ကျနော်တို့က လစ်ရင်လစ်သလို ခိုးပြီးသယ်ရတော့ အရမ်းဆိုးတဲ့ လမ်းတွေကို သုံးရတဲ့အခါကျတော ဝယ်ယူစားသုံးသူတွေ အတွက် ဈေးပိုတက်သွားတာ”ဟု ဒေသခံ စစ်ရှောင်အမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ဘေးရှောင်များသည် ၂ နှစ်ကျော်ကာလအတွင်း နေရပ်ကို စွန့်ခွာထွက်ပြေးလာရပြီး၊ လက်ရှိမှာ စစ်ရှောင်စခန်းတွင် အလုပ်လက်မဲ့ဖြစ်နေချိန် စစ်ကောင်စီနှင့် PNO တပ်ဖွဲ့တို့မှ ရိက္ခာတင်ကားများကို သွားလာမှုပိတ်သည့်အတွက် ကုန်ပစ္စည်းများ စျေးကြီးပေး ဝယ်ယူနေရသည့်အပေါ် ပြည်သူများ စားဝတ်နေရေး အခက်အခဲကြုံတွေ့နေရသည်။
“ချွေတာပြီးတော့ သုံးရတာပေါ့နော်၊ တခါတလေတိုက်ပွဲမဖြစ်တဲ့ရွာတွေမှာ ပြန်ပြီးတော့ နေ့စား အငှားလိုက် ကူလီလုပ်တာပေါ့ အဲ့လိုမျိုးနဲ့ ဖြေရှင်းနေရတာပါ”ဟု ဒေသခံ စစ်ဘေးရှောင် အမျိုးသားတစ်ဦးက ထပ်လောင်းပြောသည်။
ပြီးခဲ့သည့် အောက်တိုဘာ လလယ်ပိုင်းက စပြီး ဖယ်ခုံမြို့နယ်ရှိ ကျေးရွာတွေကို တိုက်ပွဲ ဖြစ်ပွားခြင်းမရှိဘဲ စစ်ကောင်စီတပ်မှ လက်နက်ကြီးနှင့် ရမ်းသမ်းပစ်ခတ်ပြီး အတွဲလိုက် ဒုံးပစ်သံများ၊ ထူးဆန်းသည့် လက်နက်ကြီးသံများလည်း ကြားရသည်ဟု ဒေသခံများထံမှ သိရသည်။
