မြန်မာ-တရုတ်နယ်စပ် တလျှောက် အခြေစိုက်လှုပ်ရှားနေသည့် အွန်လိုင်းငွေလိမ်ဂိုဏ်းများကို စဉ်ဆက်မပြတ် တိုက်ဖျက်ရေးလုပ်ဆောင်ရန် တရုတ်သံအမတ်နှင့် စစ်ကောင်စီတို့ ဆွေးနွေးခဲ့ကြောင်း ရန်ကုန်မြို့ရှိ တရုတ်သံရုံးက အောက်တိုဘာလ ၂၄ ရက်တွင် သတင်းထုတ်ပြန်လာသည်။

မြန်မာနိုင်ငံဆိုင်ရာ တရုတ်သံအမတ် မစ္စတာချန်းဟိုင် သည် အောက်တိုဘာလ ၂၃၊ ၂၄ ရက်တို့တွင် စစ်ကောင်စီ၏ ပြည်ထဲရေးဝန်ကြီး ဒုတိယဗိုလ်ချုပ်ကြီး ရာပြည့်နှင့် နိုင်ငံခြားရေးဝန်ကြီး ဦးသန်းဆွေတို့ သီးခြားစီ တွေ့ဆုံခဲ့ကြောင်း ထုတ်ပြန်ထားသည်။

ပြီးခဲ့သည့် စက်တင်ဘာလမှစ၍ အွန်လိုင်းငွေလိမ်ဂိုဏ်းများကို နှစ်နိုင်ငံ ပူးပေါင်းဖမ်းဆီးမှုနှင့် ပတ်သက်ပြီး အွန်လိုင်းလောင်းကစား ပြစ်မှုကျူးလွန်သည့် တရုတ်နိုင်ငံသား ၅၀၀၀ နီးပါးကို မြန်မာနိုင်ငံမှ တရုတ်နိုင်ငံရဲဘက်သို့ လွှဲပြောင်းပေးခြင်းကို တရုတ်သံအမတ်က ချီးကျူးထားသည်။

စစ်ကောင်စီဘက်မှ အွန်လိုင်းငွေလိမ်ဂိုဏ်းများကို တရုတ်နှင့်ပူးပေါင်းပြီး တက်တက်ကြွကြွ တိုက်ဖျက်သွားမည်ဟု တရုတ်သံအမတ်ကို ပြောသည်ဟု သတင်းထုတ်ပြန်ချက်တွင် ဆိုထားသည်။

မြန်မာ – တရုတ် နယ်စပ်တလျှောက် ကိုးကန့်ဒေသ၊ “ဝ” ဒေသ နှင့် မူဆယ်မြို့ နယ်အတွင်း အွန်လိုင်း ငွေလိမ်ဂိုဏ်း များကို တရုတ် – မြန်မာ – ထိုင်း (၃) နိုင်ငံ ပူးပေါင်းပြီး ဖမ်းဆီးမှု ပြုလုပ်သွားမည်ဟု ယခုလဆန်းပိုင်းက ကြေညာထားသည်။

မြန်မာ-တရုတ်နယ်စပ်ရှိ အွန်လိုင်းငွေလိမ်ဂိုဏ်းများကို စစ်ကောင်စီနှင့် “ဝ”တပ်ဖွဲ့ UWSA တို့က အယောင်ပြ ဖမ်းဆီးနှိမ်နှင်းနေသော်လည်း လက်တွေ့မြေပြင်တွင် ၎င်းအွန်လိုင်း ငွေလိမ်ဂိုဏ်းများသည် သျှမ်းပြည် ဒေသအသီးသီးရှိ ပြည်သူ့စစ်များထံ လာရောက်ခိုလှုံနေသည်ကို သျှမ်းသံတော်ဆင့်မှ သတင်းရရှိထားသည်။

ပြီးခဲ့သည့် အောက်တိုဘာ လဆန်းပိုင်းမှစပြီး “ဝ”ဒေသရှိ ပန်ဆန်းမြို့မှ ထွက်ပြေးလာသော တရုတ်အွန်လိုင်းငွေလိမ်ဂိုဏ်း အဖွဲ့ဝင်စုစုပေါင်း ၈၀၀ ခန့်သည် မိုင်းရယ်မြို့နယ်ရှိ မိုင်းဟပြည်သူ့စစ် ထိန်းချုပ်ရာ မိုင်းဟ/မိုင်းဟိုင်း နယ်မြေသို့ လာရောက်ခိုလှုံနေကြသည်။