မြန်မာ-တရုတ်နယ်စပ်ဒေသ မူဆယ်မြို့ခရိုင် ကြူကုတ် (ပန်ဆိုင်း) မြို့နယ် လွယ်အင်ကျေးရွာမှ အထည်ဆိုင်ရှင် သားအဖနှစ်ဦးအပါအဝင် အမျိုးသမီးတစ်ဦး သတ်ဖြတ်ခံရပြီး အလောင်းကို စာလာအိတ်ထဲထည့်ကာ အမှိုက်ပုံသို့ စွန့်ပစ်ထားခဲ့ကြောင်း စုံစမ်းသိရသည်။
ပြီးခဲ့သည့် အောက်တိုဘာလ ၂၁ ရက် မနက်ပိုင်း ၁၀ နာရီခွဲဝန်းကျင်တွင် မူဆယ်မြို့နယ် ကျင့်စန်ကျော့ သွားသည့်လမ်းရှိ ဟိုနောင်ရွာအနီးရှိ အမှိုက်ပုံတစ်ခုတွင် စာလာအိတ်ဖြင့် ထုပ်ပိုးထားသော လူအလောင်း ၃ လောင်းကို ရှာဖွေတွေ့ရှိခဲ့ သည်ဟု ၎င်းကို သွားရောက်ကူညီခဲ့သည့် လက်ဖက်ညွှန့် လူမှုကူညီရေးအသင်းထံမှ သိရသည်။
ဖြစ်စဉ်မှာ အောက်တိုဘာလဆန်းပိုင်းတွင် ၎င်းတို့ဖွင့်လှစ်ထားသော အထည်ဆိုင်မှနေ၍ ရုတ်တရက် ပျောက်ဆုံးသွားရာ ရက်ပေါင်း ၁၀ရက်ကျော် အကြာ လုပ်ကြံသတ်ဖြတ်ခံရသည့် အလောင်း (၃)လောင်းကို ပြန်လည်ရှာဖွေတွေ့ရှိခဲ့ကြောင်း ၎င်းနှင့် နီးစပ်သူ အမျိုးသမီးတစ်ဦးက သျှမ်းသံတော်ဆင့်ကိုပြောသည်။
“ အလောင်းက ပုတ်ပွနေတယ်။ ဒဏ်ရာဒဏ်ချက်ကတော့မတွေ့ရတော့ဘူး” ဟု အထက်ပါ အမျိုးးသမီးက ပြောပြသည်။
အဆိုပါ (၃)ဦးသည် နေအိမ်မှ တရုတ်ပြည် ကျယ်ဂေါင်မြို့သို့ ပစ္စည်းဝယ်မည်ဟုဆိုပြီး မြန်မာကျပ်ငွေ သိန်း ၁၀၀ ဖြင့် ထွက်သွားခဲ့ရာ ယခုလို အသက်ခံရခြင်းဖြစ်ကြောင်းလည်းသိရသည်။
ထိုသတ်ခံရသူသည် အထည်ဆိုင်ပိုင်ရှင်ဖြစ်သူ အသက် ၅၀ ကျော်အရွယ်ရှိ ဦးကျော်ဝေ၊ ၎င်း၏သားဖြစ်သူ အသက် ၂၀ နှစ်ကျော် အရွယ်ရှိ ကိုကျော်ကျော်နှင့် အမျိုးသမီးဖြစ်သူ အသက် ၃၀ ကျော်အရွယ် စာရေးမ မအေး တို့ဖြစ်သည်။
ထို(၃)ခု သတ်ခံရပြီးနောက် အသက် (၂၀)အရွယ် ရှိ ကိုကျော်ကျော်နှင့် ၃လ နီးပါးလာနေသည့် သူငယ်ချင်းလည်း ပျောက်ဆုံးနေကြောင်း၊ ထိုသူသည် ကိုကျော်ကျော်ဆီ အကြွေး ၈သိန်းတင်ထားကြောင်း သိရသည်။
“ သူ့(ဦးကျော်ဝေ)က သား(ကျော်ကျော်)ရဲ့ သူငယ်ချင်းကို အကြွေး ၈သိန်းဆပ်ဖို့ ပြောတယ်။ အကြွေးပြန် မဆပ်ရင် ဘာညာလုပ်မယ်ဆိုပြီး ပြောမယ်ထင်တယ်။ သူလည်းနားကြားခါးလို့လား၊ နာကြည်းလို့လား မသိဘူး အဲ့ကြောင့် ဒီလိုရက်ရက်စက်စက်လုပ်သွားတာ “ ဟု ၎င်းနှင့်နီးစပ်သူ အမျိုးသမီးတစ်ဦးက ပြောသည်။
သေဆုံးသွားသည့် သားအဖနှစ်ဦးနှင့် အမျိုးသမီးတစ်ဦးကို ယနေ့ (အောက်တိုဘာ ၂၃ ) ရက်၌ ၎င်းတို့မိသားစုဝင်နှင့် ဆွေမျိုးမိတ်ဆွေသူများက သွားရောက် မီးသင်္ဂြိုလ်ပေးခဲ့ကြောင်း သိရသည်။
အလားတူ မူဆယ်မြို့နယ်အတွင်း လစဉ်နီးပါး ပိုင်ရှင်မဲ့အလောင်းများကို မကြာခဏတွေ့ရှိနေရသော်လည်း ယခုလို တပြိုင်တည်း အလောင်း ၃ လောင်းကို ပထမဆုံးအကြိမ်ဖြင့် ကောက်ယူခဲ့ဖူးကြောင်း လူမှုကူညီရေးအသင်းမှ ပြောသည်။
ထို့အပြင် စစ်တပ်ကအာဏာသိမ်းပြီးနောက်ပိုင်း နယ်စပ်ဒေသဖြစ်သည့် မူဆယ်မြို့တွင် အနယ်နယ်အရပ်ရပ်မှ ရောက်ရှိလာသည့် အခြေခံအလုပ်သမားများ၊ လောင်ကစားဝိုင်းများ ပေါများခြင်းကြောင့် မကြာခဏ လူသတ်မှု၊ ဓားပြတိုက်မှု၊ ပြန်ပေးဆွဲများ ဖြစ်ပွားနေကြောင်း ဒေသခံများက ဆိုကြသည်။
မူဆယ်မြို့နယ်တွင် စစ်တပ်အပြင် ပြည်သူ့စစ်၊ တိုင်းရင်းသားလက်နက်တပ်ဖွဲ့များနှင့် PDF သွားလာလှုပ်ရှားသည့် နယ်မြေတစ်ခုဖြစ်သည်။
