တောင်ကြီးခရိုင် ရဲမှူးလိုက်ပါလာသည့် စစ်ကောင်စီယာဉ်တန်းအား မိုင်းဆွဲ တိုက်ခိုက်ခဲ့ပြီး စစ်ကောင်စီဘက်မှ သေဆုံးမှုရှိကြောင်း ဓနုပြည်သူ့လွတ်မြောက်ရေး တပ်ဦး(DPLF)ထံမှ စုံစမ်းသိရသည်။
ယမန်နေ့ (အောက်တိုဘာ ၂၁) ရက် နံနက် ၈ နာရီအချိန်တွင် ရွာငံမြို့နယ် ယုံဗွေကွမ်းသီးခြံတဝိုက် စခန်းချပြီး ပြန်လာသည့် စစ်ကောင်စီယာဥ်တန်းအား ရေဦးလမ်းမကြီးပေါ်တွင် မိုင်းဆွဲတိုက်ခိုက်ခဲ့ရာ စစ်ကောင်စီတပ်သား တစ်ဦး ပွဲချင်းပြီး သေဆုံး၍ တောင်ကြီးခရိုင်ရဲမှုးအပါအဝင် ၄ဦး ဒဏ်ရာအပြင်းအထန် ရရှိသွားကြောင်း သိရသည်။
ထို့ပြင် ယနေ့ ( အောက်တိုဘာ ၂၂ )ရက်တွင် ဒဏ်ရာရ စစ်ကောင်စီတပ်သား၂ဦးသည် ဆေးရုံ၌ ထပ်မံ သေဆုံးသဖြင့် စုစုပေါင်း စစ်ကောင်စီ တပ်သား ၃ဦး သေဆုံးသွားကြောင်းသိရသည်။
“ခရိုင် ရဲမှူး က ဒုရဲမှူးကြီးစိုးသန်း လို့ သိရတယ်ဗျ၊ မျက်နှာဒဏ်ရာရသွားတယ် လို့ ပြန်ကြားရတယ်၊ နေရာမှာ ဆုံးသွားတာက တပ်ကြပ်မျိုးမင်းသူ၊ တပ်သား၃ ဦးက ဒဏ်ရာပြင်းပြီး အခုမနက်မှ ၂ယောက်ထပ်သေတာလို့ ဆေးရုံဘက်က ပြန်ကြားရတယ်” ဟု DPLF တာ၀န်ရှိသူတစ်ဦးမှ ပြောသည်။
မိုင်းဆွဲတိုက်ခိုက်ခံရပြီးနောက် စစ်ကောင်စီတပ်မှပြန်လည်ပစ်ခတ်မှုများကို ရမ်းသန်းပြုလုပ်ခဲ့ကြပြီး ရေဦးလမ်းမကြီးတလျှောက် ပိတ်ဆို့စစ်ဆေးမှုများကိုလည်း ပြုလုပ်လျှက်ရှိကြောင်း သိရသည်။
ဒဏ်ရာရစစ်သားများကို လူမှုကူညီရေးကားနှစ်စီးဖြင့် လာရောက်တင်ဆောင်သွားကြောင်း ထပ်မံသိရသည်။
စစ်ကောင်စီတပ်များရှိသည့်နေရာများနှင့် အတတ်နိုင်ဆုံး ဝေးဝေးမှ ရှောင်ရှားသွားလာကြပါရန် ဓနုဒေသအတွင်း နေထိုင်ကြသည့် ဒေသခံများကို DPLF မှ ကြေငြာချက် ထုတ်ပြန်ထားကြောင်းလည်း သိရသည်။
စစ်ကောင်စီလက်အောက်ခံ ဓနုကိုယ်ပိုင်အုပ်ချုပ်ခွင့်ရဒေသအတွင်း ဓနုပြည်သူ့လွတ်မြောက်ရေးတပ်ဦး ကို ဖွဲ့စည်းပြီးကြောင်း ကြေငြာပြီးနောက်ပိုင်း စစ်ကောင်စီနှင့် ၎င်းတို့လက်အောက်ခံပျူစောထီးတို့က ပင်းတယ နှင့် ရွာငံ မြို့တစ်ဝန်း လုံခြုံရေးအထူးတင်းကြပ်ထားပြီး ဒေသခံလူငယ်များအပြင် အမျိုးသမီးများပါ မကြာခဏ ဖမ်းဆီးစစ်ဆေးခံနေရကြောင်းလည်း ဒေသခံများထံမှ သိရသည်။
Leave a Comments