သျှမ်းပြည် မိုင်းရယ်မြို့နယ်အတွင်း “ ဝ “ ဒေသမှထွက်ပြေးလာသည့် တရုတ်အွန်လိုင်းငွေလိမ်ဂိုဏ်း အဖွဲ့ဝင် အများအပြား ရောက်ရှိနေကြောင်း ဒေသခံများ ပြောပြချက်အရ သိရသည်။
ပြီးခဲ့သည့် အောက်တိုဘာလ လဆန်းပိုင်းမှစပြီး “ ဝ “ ဒေသရှိ ပန်ဆိုင်းမြို့မှ ထွက်ပြေးလာသော တရုတ်အွန်လိုင်းငွေလိမ်ဂိုဏ်းအဖွဲ့ဝင် စုစုပေါင်း လူဦးရေ ၈၀၀ ခန့်သည် မိုင်းဟပြည်သူ့စစ်ဌာနာ ထိန်းချုပ်ရာ နယ်မြေ မိုင်းဟ/မိုင်းဟိုင်းရွာသို့ လာရောက်ခိုလှုံနေကြကြောင်း တိကျသည့် အမည်မဖော်လိုသူ ဒေသခံတစ်ဦးက သျှမ်းသံတော်ဆင့်ကို ပြောသည်။
“ ရောက်လာတဲ့သူတွေက တရုတ်ကြီးပဲ။ သူတို့ရောက်လာတာ ဒီနေ့နဲ့ဆိုရင် ၁၀ ရက်ကျော်နေပြီ။ လုံခြုံရေးကို မိုင်းဟပြည်သူ့စစ်က လုပ်ပေးတယ်။ ဘယ်လိုနေ၊ ဘယ်လိုစားရသလဲတော့ သေချာမသိရဘူး။ သူတို့ကိုတော့ နေရာအဝေးကြီးသွားဖို့ တားမြစ်ထားလောက်တယ် “ ဟု ၎င်းအမျိုးသားတစ်ဦးက ပြောသည်။
ယင်းကဲ့သို့ ကျေးရွာအတွင်း တရုတ်အွန်လိုင်းငွေလိမ်ဂိုဏ်းများ ရောက်ရှိလာသောကြောင့် ဒေသခံများလည်း လုံခြုံရေးအတွက် စိုးရိမ်နေကြရသည်။
“ ဟုတ်တယ်။ ကျနော်တို့လည်း စိုးရိမ်နေရတယ်။ ဒါပေမယ့် လက်နက်ကိုင်တပ်ဖွဲ့တွေကိုတော့ သူတို့မလွန်ဆန်နိုင်ဘူး။ ကျနော်တို့ပြည်သူတွေကတော့ ထိတ်လန့်မှုဖြစ်နေတယ်။ တခုခုဆို ရွာထဲဝင်လာပြီး တောင်းကျန်းမှာကိုပဲ ကြောက်တယ် “ ကျေးရွာနေဒေသခံ တစ်ဦးကပြောသည်။
ယခုရက်ပိုင်း သျှမ်းပြည် ကိုးကန့် နှင့် “ဝ” ဒေအတွင်း တရုတ်နိုင်ငံ၏ ဖိအားကြောင့် “ဝ”တပ်ဖွဲ့ (UWSA) က အွန်လိုင်း ငွေလိမ်ဂိုဏ်းဖမ်းဆီးမှု ကြမ်းလာသဖြင့် ထိုတရုတ်များသည် မိုင်းရယ်မြို့နယ် ပြည်သူ့စစ်များရှိသည့်နေရာသို့ လာရောက်ခိုလှုံနေသည့် သဘောဖြစ်ကြောင်း မိုင်းရယ်မြို့ ရပ်မိရပ်ဖများက ဆိုသည်။
အလားတူ (အောက်တိုဘာလ ၇ ရက်)တွင် ကိုးကန့်ဒေသအတွင်း တရားမဝင်ရောက်လာသည့် တရုတ်နိုင်ငံသား ၃၇၇ ဦးကိုလည်း ကိုးကန့်တပ်ဖွဲ့မှ ဖမ်းဆီးပြီး တရုတ်နိုင်ငံ၏ ရဲတပ်ဖွဲ့ထံသို့ လွှဲပြောင်း ပေးခဲ့သည်။
အောက်တိုဘာလ ၁၄ တွင်လည်း မိုင်းဆတ်ခရိုင် မိုင်းယွင်းကျေးရွာအုပ်စုအတွင်း အွန်လိုင်းငွေလိမ်ဂိုဏ်များ နေထိုင်အလုပ်လုပ်သည့် နေရာကို “ ဝ “ တပ်ဖွဲ့က ဝင်ရောက်စီးနင်းခဲ့သည်။
ယခုလပိုင်းအတွင်း မြန်မာ – တရုတ်နယ်စပ်တလျှောက် ကိုးကန့် ဒေသ၊ “ဝ” ဒေသ နှင့် မူဆယ်မြို့ နယ်အတွင်း အွန်လိုင်း ငွေလိမ်ဂိုဏ်း များကို တရုတ် – မြန်မာ – ထိုင်း (၃) နိုင်ငံ ပူးပေါင်းပြီး ဖမ်းဆီးမှု ပြုလုပ်သွားမည်ဟု ကြေညာထားသည်။
ယခုလ (အောက်တိုဘာ) ၁၆ ရက်တွင်လည်း မြန်မာနယ်စပ်တလျှောက်တွင် အွန်လိုင်း ငွေလိမ်ဂိုဏ်း နှင့် ဆက်စပ်သည့် သံသယရှိသူ ၄၆၀၀ ကျော် ဖမ်းဆီးရမိကြောင်း တရုတ်နိုင်ငံပြည်သူ့လုံခြုံရေး ဌာန ထုတ်ပြန်ချက်အရ သိရသည်။
Leave a Comments