ထိုင်း-မြန်မာ နယ်စပ်ဒေသ တာချီလိတ်မြို့နယ် ဖန်မန်ကျေးရွာအုပ်စု ဝမ်ကျောက်လုံရွာရှိ ဘုန်းကြီးကျောင်းမှ ကျောင်းထိုင်ဆရာတော်တစ်ပါး ထိုင်းဘတ်(၁၅)သိန်း လိမ်လည်ခံလိုက်ရကြောင်း သတင်းရရှိသည်။
ဖြစ်စဉ်မှာ ပြီးခဲ့သည့် စက်တင်ဘာလ ၁၈ ရက်တွင် ကား (Probox) တစ်စီးနှင့် (ဒေါ်ခင်ခင်ခနှင့် မရတနာ) နာမည်ရှိသည့် အမျိုးသမီး ၂ ဦးအပါအဝင် လူ ၄ ဦးတို့သည် ထီရောင်းချရန်အတွက် ဝမ်ကျောက်ရွာလုံ ဘုန်းကြီးကျောင်းသို့ ရောက်ရှိလာခဲ့သည်။
ထို့နောက် ထီအရောင်း ကုမ္မဏီတစ်ခုမှလာသည့် ထီးရောင်းချသူများ ဖြစ်ကြောင်းပြောဆိုပြီး ၎င်းကျောင်းထိုင်ဆရာတော်က ဝယ်ယူအားပေးသည့် အနေဖြင့် ထီတစ်စောင် ဝယ်ယူခဲ့သည်ဟု ဆိုသည်။
ယင်းကဲ့သို့ ထီဝယ်ယူပြီးနောက် ရက်ပိုင်းအနည်းငယ်အကြာ ကျောင်းထိုင်ဆရာတော်ထံသို့ ထပ်မံဖုန်းဆက် အကြောင်းလာပြီး ထီဆုကြီး ကားတစ်စီးနှင့် ကျပ်သိန်း ၅ ထောင်ကျော် ပေါက်မည့် အစီအစဉ်ကို ရင်းနှီးမြုပ်နှံ စေရန် အဆိုပါဘုန်းကြီးကျောင်းသို့ နောက်တကြိမ်လာရောက် စည်းရုံးခဲ့သည်။
“ ထီဆုကြီးပေါက်မယ်ဆိုပြီး ပိုက်ဆံကို ဘယ်လောက်လောက် ရင်းနှီးမြုပ်နှံဖို့ပြောတယ်။ ကျန်တဲ့အပိုင်းကို သူတို့စီစဉ်ပေးမယ်၊ လုပ်ပေးမယ်ဆိုပြီး ပြောတယ်။ ဒီထီဆုကြီးပေါက်မယ်ဆိုရင် ကားတစ်စီးနဲ့ ကျပ်သိန်း ၅ ထောင် လာလှူမယ်လို့ ပြောတယ် “ ဟု ကျောင်းထိုင်ဆရာတော်မှ ရှင်းပြသည်။
ထိုချိန်မှစ၍ ကျောင်းထိုင်ဆရာတော်သည် ထီဆုကြီးပေါက်မည့် ရင်းနှီးမြုပ်နှံမှုကြီးကို ထိုင်းဘတ် ၂ သိန်းခန့်ဖြင့် စတင်ရင်းနှီးမြုပ်နှံခဲ့ကြောင်း ဆိုသည်။
“ အဲ့နောက်ပိုင်း တမျိုးပြီးတမျိုး အကြောင်းပြပြီး ပိုက်ဆံတောင်းလာတယ်။ ဟိုနေရာကို ပေးရမယ်၊ ဒီနေရာကို ပေးရမယ်ဆိုပြီး တောင်းလာတာ။ ဘဏ်နဲ့ကော၊ Wave Money နဲ့ကော ထပ်လွှဲပေးလိုက်တယ် “ ဟု ဆရာတော်က ဆိုပြန်သည်။
စက်တင်ဘာလ ၁၈ ရက်မှ အောက်တိုဘာလ ၁၂ ရက်နေ့အထိ ဆရာတော်သည် ဘဏ်ဖြင့်လည်းကောင်း၊ Wave Money ဖြင့်လည်းကောင်း တစ်ကြိမ်လျှင် အနည်းဆုံး ထိုင်းဘတ် (၂ သောင်းမှ ၃ သောင်း) အထိ ၁၀ ကြိမ်ခန့် ထီးရောင်းသူထံ လွှဲအပ်ပေးခဲ့သည်။
နောက်ဆုံးလွှဲပေးသည့်အကြိမ်မှစ၍ စုစုပေါင်း ထိုင်းဘတ် 1,500,000 (၁၅သိန်း) ကို လွှဲအပ်ပြီးစီးကြောင်း ထီးရောင်းသူထံကို အကြောင်းကြားခဲ့ရာ ၎င်းတို့ဘက်မှ အကြောင်းပြန်ကြားခြင်းအပြင် ဆက်သွယ်၍မရသဖြင့် ငွေလိမ်လည်ခံရကြောင်း သိရှိလိုက်ရသည်ဟု ဆရာတော်က ဆိုပြန်သည်။
စစ်တပ်အာဏာသိမ်းပြီးနောက်ပိုင်း သျှမ်းပြည်တွင် ငွေလိမ်လည်မှု ပုံစံအမျိုးမျိုး ဖြစ်ပွားခဲ့ရာမှ ယခု ဆရာတော်တစ်ပါး ကြုံခဲ့ရသည့် ငွေလိမ်လည်မှုသည် မျက်လုံးပေး စည်းရုံးသိမ်းသွင်းသည့် ငွေလိမ်လည်မှု ဖြစ်သည်။
ထို့အပြင် ပြည်သူများအနေဖြင့် အယုံမလွယ်ကြရန်၊ ခေတ်အခြေအနေ မကောင်းသည့်ကာလ၌ ပြည်သူများ စားဝတ်နေရေး တင်းကြပ်နေရာ အခွင့်ကောင်းယူပြီး မျက်လုံးပေး ငွေလိမ်လည်မှု ပြုလုပ်နေသောကြောင့် တစ်ယောက်တစ်ယောက်မှ ရင်းနှီးမြုပ်နှံဖိုပြောဆိုလာပါက သံသယစိတ်ဖြင့် ကြည့်ရန်၊ ရင်းနှီးမြုပ်နှံခြင်း ဂရုပြုကြရန် ထပ်လောင်းပြောသည်။
မှတ်ချက်။ ။ပုံပါအမျိုးသမီးတစ်ဦးအား တွေ့ရှိပါက ဖုန်းနံပါတ် 09793349854 သို့ ဆက်သွယ် အကြောင်းကြားပေးပါရန် မေတ္တာရပ်ခံထားပါသည်။
