အင်းလေးဖောင်တော်ဦးဘုရားပွဲကို လာရောက်ကြမည့် ဧည့်သည်များအနေဖြင့် စစ်တပ်ကျောထောက်နောက်ခံ မရဏဟိုတယ်တွေမှာ မတည်းခိုကြဖို့ အင်းလေးလူထုလှုပ်ရှားမှုအဖွဲ့က ထုတ်ပြန်ထားပါတယ်။

အင်းလေးဖောင်တော်ဦး ဘုရားပွဲသည် ယမန်နေ့ (အောက်တိုဘာ ၁၅)ရက်တွင် စတင်ကျင်းပကြောင်း သိရသည်။

“အိပ်စက်ခြင်းကနေ လက်နက်တွေ၊ ကျည်ဆံတွေ မဖြစ်ဖို့ မရဏဟိုတယ်များကို ငြင်းပယ်ကြပြီး ခရီးသွားနဲ့ ဟိုတယ်လုပ်ငန်းကို မီးခိုးမထွက်တဲ့ စက်ရုံလို့ခေါ်ရင် မီးခိုးမထွက်စက်ရုံနဲ့ လူသတ်အားပေးစက်ရုံ ခွဲခြားကြမယ်လို့ ပြောချင်ပါတယ်။ သွေးစွန်းမရဏဟိုတယ်များကို ငြင်းပယ်ကြပါ”ဟု အင်းလေးဒေသ ပြည်သူ့ကာကွယ်ရေးတပ်မှ ထုတ်ပြန်ထားသော ဗွီဒီယိုဖိုင်တွင် ပြောကြားထားသည်။

ထို့အပြင် စစ်ကောင်စီလက်အောက်ခံ သျှမ်းပြည်အစိုးရအဖွဲ့က ဘုရားကြွမည့် ဌာနတိုင်းကို ရောက်ရှိလာသည့် ဧည့်သည်တော်၊ ဘုရားလူကြီး(ဂေါပက)တွေကို ကျွေးမွေးဧည့်ခံရာ၌ သုံးရန်အတွက် ဖောင်တော်ဦးဘုရားကြွချီမည့် ကျေးရွာ ၂၁ ရွာသို့လည်း တစ်ဌာနကို ၂၁ သိန်းစီ ပေးထားရကြောင်း အင်းလေးအမျိုးသမီးသမဂ္ဂမှ အမည်မဖော်လိုသူ တစ်ဦးက သျှမ်းသံတော်ဆင့်ကို ပြောသည်။

“ကျမတို့ကတော့ ဒီနိုင်ငံရေးအခြေအနေနဲ့ဖြစ်နေတဲ့အတွက် ကိုယ့်ဒေသမှာ စစ်ကောင်စီက ဒီလိုမျိုးလုပ်တာကို မဖြစ်စေချင်ဘူး၊ အားမပေးဘူး။ အဲ့ဒီအတွက် ဆန့်ကျင်တာတွေ၊ ထုတ်ပြန်ချက်တွေ ဆန္ဒပြတာတွေ၊ လှုံ့ဆော်ပြီးပြီ။ အခုလက်ရှိမှာ ပြည်သူတွေက သိပ်မပူးပေါင်းဘဲ စစ်ကောင်စီက ဘုရားပွဲကို ဖြစ်မြောက်ဖို့ ဆိုတဲ့ပုံစံနဲ့ အတင်းကြီးလုပ်နေတာ ဖြစ်တယ်”ဟု အင်းလေး အမျိုးသမီးသမဂ္ဂမှ အမည်မဖော်လိုသူက သျှမ်းသံတော်ဆင့်ကို ဆက်ပြောသည်။

အင်းလေးဖောင်တော်ဦးဘုရားပွဲကို စစ်တပ်အသုံးချခံမဖြစ်ဖို့၊ မပူးပေါင်း မပါဝင်ဖို့နဲ့ လောင်းကစားပွဲ၊ မူးယစ်ဆေးဝါးနဲ့ စစ်တပ်ထုတ်ကုန်တွေကို ဆန့်ကျင်ကြဖို့ လိုအပ်ကြောင်းကိုလည်း အင်းလေးပြည်သူ့ကာကွယ်ရေးတပ်ဖွဲ့(IPDF)၊ အင်းလေးအမျိုးသမီးသမဂ္ဂ(IWU)နှင့် အင်းလေးဖက်ဒရယ်ဒီမိုကရေစီလှုပ်ရှားမှုအဖွဲ့(IFDM)တို့၏ သဘောထားထုတ်ပြန်ချက်တွင် တိုက်တွန်းထားသည်။

“ကျနော်တို့ အင်းသားရိုးရာပွဲဆိုတော့ ဘယ်သူမှလဲ မနှောက်ယှက်ဘူး။ သွားတဲ့လူကတော့ သွားနေကြတာပဲ၊ ဖွင့်ပွဲနေ့ကတော့ လူများတာပေါ့”ဟု ယမန်နေ့ ဖွင့်ပွဲအခြေအနေကို အင်းလေးဒေသခံ ကိုစိုးမင်းက ပြောသည်။

ယခုနှစ် စက်လှေငှားရမ်းသည့် ဈေးနှုန်းမှာ အနည်းဆုံး ၄သောင်းကျပ် မှ အများဆုံး ၇သောင်းကျပ်အထိ ဈေးပေါက်ကြောင်း သိရသည်။

စစ်ကောင်စီက ပြန်လည်ကျင်းပလာသည့် ဖောင်တော်ဦးဘုရားပွဲမှာ စားဝတ်နေရေးအတွက် ဝင်ငွေနှင့်ပတ်သက်ပြီး အင်းလေးဒေသခံများက စိုးရိမ်နေကြသည်။

“ဒီနှစ်ဘုရားပွဲကို ဝင်ငွေကတော့ အများကြီး မမျှော်မှန်းထားဘူးဗျ၊ ခါတိုင်းနှစ်လောက်တော့ မမျှော်မှန်းထားဘူး။ ခါတိုင်းနှစ်ရဲ့ သုံးပုံနှစ်ပုံလောက်ပဲ မှန်းထားတယ်။ ဘာဖြစ်လို့လဲဆိုတော့ ဒီနှစ်က ဒီဇယ်ဈေးလဲ တအားကြီး တက်တယ်။၊ ပြီးတော့ ခရီးသည်ကလည်း အခုလောလောဆယ်မှာ သိပ်မကျသေးဘူး”ဟု အင်းလေးမှ စက်လှေသမား ကိုရဲက သျှမ်းသံတော်ဆင့်ကို ပြောသည်။

ကိုဗစ်-၁၉ နှင့် နိုင်ငံရေးအခြေအနေကြောင့် ၃ နှစ်ကြာ မကျင်းပခဲ့ရသည့် အင်းလေးဖောင်တော်ဦးဘုရားပွဲကို အောက်တိုဘာလ ၁၅ ရက်မှ နိုဝင်ဘာလ ၁ ရက်အထိ ကျင်းပသွားမည်ဖြစ်ကြောင်း ပွဲကျင်းပရေးကော်မတီက ကြေညာထားသည်။