သျှမ်းပြည် သီပေါမြို့ မြစ်ငယ်မြစ်(ခေါ်) ဒုဋ္ဌဝတီမြစ်ရေ မြင့်တက်မှုကြောင့် မြစ်ဘေးတွင်နေထိုင်သည့် နေအိမ်အချို့ ရွှေ့ပြောင်းနေထိုင်ရကြောင်း သတင်းရရှိသည်။
ယခုရက်ပိုင်း မိုးသည်းထန်စွာ ရွာသွန်းမှုကြောင့် ယမန်နေ့ ( အောက်တိုဘာ ၁၂ ရက်) ညနေ ၆ နာရီခန့်မှ စတင်ပြီး ဒုဋ္ဌဝတီမြစ်ရေ မြင့်တက်လာကာ မြစ်ကမ်းဘေး ပန်းတိမ်တောင်ရပ်ကွက်နှင့် စျေးရပ်ကွက်တွင် နေထိုင်သည့် နေအိမ်အချို့ ရွှေ့နေရကြောင်း သီပေါမြို့ခံတစ်ဦးက ပြောသည်။
“အခု သီပေါမြို့ ဈေးရပ်ကွက်နဲ့ ပန်းတိမ်တောင်ရပ်ကွက်ပေါ့နော်၊ မြစ်ကမ်းနားကပ်လျက် အိမ်ခြေတွေ ရေနစ်မြှုပ်နေတယ်၊ အိမ်အောက်ခြေလောက်ထိ မြှုပ်နေတဲ့ အိမ်အချို့ကို လောလောဆယ် ဓမ္မာရုံမှာ ယာယီ ထားပေးထားပါတယ်”ဟု ရေနစ်မြှုပ်သည့် ပြည်သူတွေကို ကူညီပေးနေတဲ့ နယ်စည်းမခြား ပရဟိတအဖွဲ့မှ ကိုမျိုးက သျှမ်းသံတော်ဆင့်ကို ပြောသည်။
ရေနစ်မြှုပ်နေသည့် မြေနိမ့်ပိုင်းနှင့် မြစ်ကမ်းဘေးရှိအိမ်များကို ပရဟိတ လူမှုကူညီရေးအသင်းများနှင့် မီးသတ်တပ်ဖွဲ့ဝင်များက ရေဘေးလွတ်ရာ ဓမ္မာရုံသို့ ကူညီ ရွှေ့ပြောင်းပေးနေသည်ဟု ဆက်ပြောသည်။
သီပေါမြို့ ဈေးရပ်ကွက်တွင် ယမန်နေ့ ညအချိန်၌ မီးသတ်တပ်ဖွဲ့နှင့် ရပ်ကွက်ပြည်သူများ စုပေါင်းပြီး မြစ်ကမ်းတစ်လျှောက် သဲအိတ်တွေ ကာရံထားရသည်ဟု သိရသည်။
ဒုဋ္ဌဝတီမြစ် စိုးရိမ်ရေမှတ်သည် ၆၀၀ စင်တီမီတာဖြစ်ပြီး မြေနိမ့်ပိုင်းရပ်ကွက်နှင့် မြစ်ချောင်းဘေးရှိ နေအိမ်များ ကြိုတင်ရွှေ့ပြောင်းထားရန် သီပေါမြို့ မိုး/ဇလစခန်းမှ အကြံပြုထားသည်။
“အရင်က သီပေါမြို့မှာ ဒီလိုဖြစ်တာ မကြားဖူးဘူး၊ သီပေါအပေါ်ဘက် နမ္မတူရေကာတာ ဆောက်တာနဲ့လည်း ဆိုင်မယ်ထင်တယ်၊ တာလုံဘက်က ရေကာတာဆောက်ပြီးရင်လည်း မြစ်ရေအမှတ်က ဒီထက် ပိုတက်လာဖို့ပဲရှိတယ်။ ဆည်တွေဆောက်တယ်ဆိုရင် ပြည်သူတွေ ပိုသတိထားရတယ်”ဟု ဒုဋ္ဌဝတီမြစ်ပေါ်မှာ ရေကာတာတည်ဆောက်မှုကို လေ့လာနေတဲ့ မြို့ခံတစ်ဦးက သျှမ်းသံတော်ဆင့်ကို ပြောသည်။
သီပေါမြို့အထက်ပိုင်း မြစ်ငယ်မြစ်ခေါ် ဒုဋ္ဌဝတီမြစ်ပေါ်မှာ တည်ဆောက်နေသော နမ္မတူ(သီပေါ)ရေကာတာသည် ရေအားလျှပ်စစ် (၂၁၀) မဂ္ဂါဝပ် ထုတ်လုပ်မှာဖြစ်ပြီး ရေကာတာအမြင့် ၁၁၄ မီတာ၊ ရေလွှမ်းမိုးခံရမည့် ဧရိယာ ၈၆၆.၆၉ ဟက်တာရှိကြောင်း သျှမ်းလူ့အခွင့်အရေးမဏ္ဍိုင်အဖွဲ့ SHRF က ထုတ်ပြန်ထားသည်။
