သျှမ်းပြည် မြောက်ဘက် လားရှိုးမြို့ တွင် နိုင်ငံကူးလက်မှတ် (Passport) ပြုလုပ်ရာ၌ ၁၀ သိန်းအထက် ဈေးပေါက်နေကြောင်း ပြည်သူများက ပြောသည်။

စစ်အာဏာသိမ်းပြီးနောက် ပြည်တွင်းအလုပ်အကိုင် ရှားပါးမှုကြောင့် ပြည်ပထွက် အလုပ်လုပ် မည့်သူ များပြားလာသဖြင့် နိုင်ငံကူးလက်မှတ်များကို အလုအယက်ပြုလုပ်နေကြသည်။

ထို့ကြောင့်လားရှိုးမြို့ပေါ်တွင် နိုင်ငံကူးလက်မှတ်များကို ပွဲစားများနှင့် ပြုလုပ်ရာတွင် ၁၀ သိန်းမှ ၁၆ သိန်းကြားရှိကြောင်း သိရသည်။

“ကိုယ်တိုင်သွားလုပ်ရင် အများကြီးမကုန်ဘူး။ လူတွေကမြန်လိုအပ်တာနဲ့ အရေးပေါ် လိုအပ်နေတာကြောင့် ပွဲစားငှားပြီး လုပ်ကြတာ” ဟု လားရှိုးမြို့ နိုင်ငံကူးလက်မှတ်သွားလုပ်သည့် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

နိုင်ငံကူးလက်မှတ်ကို ပွဲစားနှင့် ပြုလုပ်ပါက ရက်တပတ်ကြာပြီး ကိုယ်တိုင်သွားရောက်ပြုလုပ်ပါက လချီကြာကြောင်း သိရသည်။

ထို့ပြင် သျှမ်းပြည် မြန်မာ-ထိုင်းနယ်စပ် တာချီလိတ်မြို့တွင် နိုင်ငံကူးလက်မှတ်ပြုလုပ်ပါက မြန်မာကျပ်ငွေ ၂သိန်းခွဲ မှ ၄သိန်းခွဲကြား ရှိကြောင်း နိုင်ငံကူးလက်မှတ်ပြုလုပ်သည့် ပွဲစားအမျိုးသား တစ်ဦးက သျှမ်းသံတော်ဆင့်ကို ပြောသည်။

ဆက်ကလက်ပြီး ကျိုင်းတုံမြို့တွင် နိုင်ငံကူးလက်မှတ်ကို ကိုယ်တိုင်သွားရောက်ပြုလုပ်ရသဖြင့် မြန်မာကျပ်ငွေ တစ်သိန်းခွဲသာ ကုန်ကျကြောင်း ဒေသခံ အမျိုးသမီး တစ်ဦးက ပြောသည်။

သျှမ်းပြည်အတွင်း နိုင်ငံကူးလက်မှတ်ထုတ်ပေးသည့် နေရာများမှာ တောင်ကြီး၊ လားရှိုး၊ တာချီလိတ်နှင့် ကျိုင်းတုံမြို့တို့ ဖြစ်သည်။

စစ်တပ်အာဏာသိမ်းပြီး ၂နှစ်ကျော်ကာလအတွင်း မြန်မာနိုင်ငံ၏ စီးပွားရေး၊ လူမှုရေး၊ပညာရေး နှင့် အလုပ်အကိုင် ရှားပါးမှုကြောင့် ပြည်သူများသည် ပြည်ပသို့ထွက်ခွာပြီး အလုပ်လုပ်ကြသည်။

နိုင်ငံကူးလက်မှတ်ထုတ်ပေးရေးရုံးကို ၂၀၂၂ခုနှစ်၊ ဒီဇင်ဘာလ တတိယပတ်တွင် နှစ်သစ်ကူးရုံးပိတ်ရက် အဖြစ် စတင်ပိတ်ခဲ့ပြီး ပုံမှန်ရုံးဖွင့်ရက် ၂၀၂၃ ဇန်နဝါရီ ၂ရက်တွင် ပြန်မဖွင်ဘဲ ယာယီပိတ်ကြောင်း ကြေညာလိုက်သည်။

ထို့နောက် နိုင်ငံကူးလက်မှတ် Passport လျှောက်ရန် Online မှ QR code ရယူပြီးမှသာ ရက်ချိန်းရယူလျှောက်ထားနိုင်သဖြင့် ပြည်သူများက အလုပ်ရှုပ်ထွေးမှု နားမလည်မှုကြောင့် ပွဲစားများဖြင့်သာ ပြုလုပ်လာရခြင်းဖြစ်သည်။