အာဏာသိမ်းစစ်ကောင်စီတွင် အဖွဲ့ဝင်အဖြစ် ပါဝင်ခဲ့သည့် ဒုတိယဗိုလ်ချုပ်ကြီး မိုးမြင့်ထွန်းနှင့် ဗိုလ်မှူးချုပ် ရန်နောင်စိုးတို့ ကို ရာထူးလုပ်ပိုင်ခွင့်အား အသုံးပြု၍ လာဘ်စားမှုနှင့် စစ်တရားရုံးက ထောင်ဒဏ်တစ်သက်တစ်ကျွန်းစီ ချမှတ်လိုက်ကြောင်း အောက်တိုဘာလ ၁၀ ရက်နေ့ညမှာ စစ်ကောင်စီဘက်က သတင်းထုတ်ပြန်လိုက်သည်။

ဒုတိယဗိုလ်ချုပ်ကြီး မိုးမြင့်ထွန်းသည် ၂၀၂၁ ခုနှစ် အာဏာသိမ်းစကတည်းက စစ်ကောင်စီၑ နိုင်ငံတော်စီမံအုပ်ချုပ်ရေးအဖွဲ့တွင် ပါဝင်ခဲ့သလို မြန်မာနိုင်ငံရင်းနှီးမြှုပ်နှံမှုကော်မရှင်၊ နိုင်ငံခြားသုံးငွေ ကြီးကြပ်ရေးကော်မတီတို့အပြင် ကုန်သွယ်မှုနှင့်ကုန်စည်စီးဆင်းမှုများ မှန်ကန်မြန်ဆန်ရေး ဗဟိုကော်မတီတို့၌ ဥက္ကဋ္ဌရာထူးကို ပူးတွဲရယူခဲ့သူ ဖြစ်သည်။

ထိုရာထူးတာဝန်များ ရယူထားချိန်တွင် ဒုတိယဗိုလ်ချုပ်ကြီး မိုးမြင့်ထွန်းသည် စစ်ကောင်စီ၏ နိုင်ငံခြားသုံးငွေနှင့် အခြားစီးပွားရေးဆိုင်ရာ မူဝါဒများကို ဆန့်ကျင်ကာ ပုဂ္ဂိုလ်ရေး အကျိုးအမြတ်ရယူခဲ့ခြင်း ကုန်စည်များကို သတ်မှတ်ရည်ညွှန်းဈေးထက် ဈေးတင်ရောင်းမှုကို သိလျက်နှင့် အရေးမယူခြင်း၊ နိုင်ငံခြားငွေများကို တရားမဝင် လက်ဝယ်ထားရှိခြင်း၊ စစ်စည်းကမ်းများကို ဖောက်ဖျက်ပြီး အရပ်ဘက်စီးပွားရေးတွင် ပါဝင်ဆောင်ရွက်မှုကြောင့် စစ်တရားရုံးက ထောင်ဒဏ်တသက်တကျွန်း ချမှတ်ခဲ့ခြင်းဖြစ်သည် ဟု ထုတ်ပြန်ချက်တွင်ရေးသားထားသည်။

ဆက်လက်ပြီး ဗိုလ်မှူးချုပ်မင်းနောင်စိုးသည် ကုန်သွယ်မှုနှင့် ကုန်စည်စီးဆင်းမှု မှန်ကန်မြန်ဆန်ရေးကော်မတီတွင် တွဲဖက်အတွင်းရေးမှူး တာဝန်ယူစဉ် ဒုတိယဗိုလ်ချုပ်ကြီး မိုးမြင့်ထွန်းနှင့်အတူ ရာထူးလုပ်ပိုင်ခွင့်များ အသုံးပြုပြီး စီးပွားရေးလုပ်ငန်းရှင်များထံမှ လာဘ်ယူခြင်း၊ စစ်စည်းကမ်းများကို ဖောက်ဖျက်ပြီး အရပ်ဘက်စီးပွားရေးလုပ်ငန်းများတွင် ဝင်ပါခြင်း တို့ကြောင်း ထောင်ဒဏ်တစ်သက်တစ်ကျွန်း ချမှတ်ခဲ့ခြင်းဖြစ်သည်။

စီးပွားရေးလုပ်ငန်းရှင်များကို နေပြည်တော်တွင် ခေါ်ယူစစ်ဆေးမှုအပြီး စက်တင်ဘာလ တတိယပတ်၌ ဖမ်းဆီးထိန်းသိမ်းခံခဲ့ရသည် ဗိုလ်ချုပ်နှစ်ဦးသည် ထောင်ဒဏ်နှစ်(၂၀)နှင့် ညီမျှတဲ့ တသက်တကျွန်းပြစ်ဒဏ် ချမှတ်ခံရခြင်းဖြစ်သည်။