တန်ပြန်ထိုးစစ်ဆင်မှုဖြင့် ဟားမက်စ် ပါလက်စတိုင်းလူမျိုးတို့၏ မျိုးဆက်နှင့်ချီ ထိုးစစ်ဆင် တိုက်ခိုက်သွားမည်ဟု အစ္စရေးဘက်မှ ထုတ်ပြန် ပြောဆိုထားသည်။

ပြီးခဲ့သည့် တနင်္လာနေ့ (အောက်တိုဘာလ ၁၁) ရက်က အစ္စရေးနိုင်ငံ၏ ဝန်ကြီးချုပ် ဘင်ဂျမင် နေသန်ယာဟု (Benjamin Netanyahu) က ပြောကြားခဲ့ပြီး လက်ရှိအစ္စရေး၏ တိုက်ခိုက်မှုသည် အစသာ ရှိကြောင်းနှင့် နောက်ဆက်တွဲ၌ ဟားမက်စ် တို့၏ သားစဥ် မြေးဆက်အထိ တန်ပြန်တိုက်ခိုက် သွားမည် ဟု ဝန်ကြီးချုပ်က ပြောကြားခဲ့သည်။

လက်ရှိတွင်လည်း ဂါဇာနယ်စပ်ဒေသကို အစ္စရေးဘက်မှ ပြန်လည် ထိန်းချုပ်နိုင်ပြီ ဖြစ်ကြောင်း အစ္စရေး စစ်တပ်၏ ဗိုလ်ချုပ် ဒန် ဂိုးဖာ့စ် (Dan Goldfuss) ကမီဒီယာများကို ဖြေကြားပြောဆိုခဲ့သည်။

ဂါဇာကမ်းမြောင်ဒေသ၌ လူဦးရေ ၂.၂ သန်း ရှိပြီး အနည်းဆုံးလူဦးရေ ၂ သိန်းက အိုးအိမ်စွန့်ခွာ ထွက်ပြေး နေရကြောင်း ပါလက်စတိုင်းမှ ကုလသမဂ္ဂ လူသားချင်းစာနာထောက်ထားမှု ပေါင်းစပ်ညှိနှိုင်းရေးမှူး Lynn Hastings ကလည်း သတင်းထုတ်ပြန်ထားသည်။

၎င်းတို့၏ ထုတ်ပြန်ချက်အရ ပြီးခဲ့သည့် အင်္ဂါနေ့ ညဘက်အချိန်၌ ဟားမက်စ် ပါလက်စတိုင်းလူမျိုး တို့၏ စတင်ထိုးစစ်ဆင် တိုက်ခိုက်မှုကို တန်ပြန် တိုက်ခိုက်သည့် အနေဖြင့် အစ္စရေးအစ္စရေးတပ်ဖွဲ့မှ ဟားမက်စ်တပ်ဖွဲ့ကို စစ်လေယာဥ်ဖြင့် ရာချီ ဗုံးကြဲတိုက်ခိုက်မှု ပြုလုပ်ခဲ့ကြောင်းလည်း သိရသည်။

ယင်းကဲ့သို့ လေယာဥ်ဖြင့် ဗုံးကြဲတိုက်ခိုက်မှု၌ ဟားမတ်စ် စစ်စခန်း၊ လက်နက် ဂိုထောင် နှင့် ဂါဇာရှိ ဟားမတ်စ်၏ အမိန့်ပေးဌာနချုပ်တို့ကို ပစ်မှတ်ထား တိုက်ခဲ့ကြောင်း အစ္စရေးဘက်မှ ထုတ်ပြန်ခဲ့သော် လည်း ဟားမတ်စ်၏ စစ်ရုံး နှင့် အစိုးရမဟုတ်သည့် NGO အဖွဲ့ရုံးများ၊ လူနေအိမ်များစွာလည်း ထိခိုက်ခဲ့ကြောင်း VOA သတင်းဌာနက ထုတ်ပြန်ထားသည်။

ပြီးခဲ့သည့် စနေနေ့မှ တိုက်ပွဲနောက်ပိုင်းတွင် ဟားမတ်စ်စစ်သားများ၏ ရုပ်အလောင်း ၁,၅၀၀ ကို အစ္စရေး နယ်မြေထဲ၌ တွေ့ရကြောင်း စစ်တပ်ပြောရေးဆိုခွင့်ရှိသူ ရစ်ချတ် ဟက်ချ် (Richard Hecht) မှလည်း မီဒီယာများကို ပြောဆိုထားသည်။