သျှမ်းပြည် လားရှိုးခရိုင်၊ သိန္နီမြို့နယ် ကွန်ကောက်ကျေးရွာအုပ်စု နှင့် စယ်အူကျေးရွာအုပ်စု အတွင်း လက်နက်ကိုင်တပ်ဖွဲ့များ စစ်အင်အားဖြည့်တင်းသဖြင့် တိုက်ပွဲဖြစ်မည်ကို စိုးရိမ်သောကြောင့် ဒေသခံ အချို့ စစ်ရှောင်နေရကြောင်း စုံစမ်းသိရသည်။
ယနေ့ (အောက်တိုဘာလ ၆) ရက်တွင် သိန္နီမြို့နယ် ကွန်ကောက်ကျေးရွာအုပ်စုအတွင်း ကချင်လွတ်လပ်ရေး တပ်မတော် (KIA) က အင်အားဖြည့်တင်းနေပြီး၊ စယ်အူကျေးရွာအုပ်စုတွင်လည်း စစ်ကောင်စီတပ်က အင်အားဖြည့်တင်းရောက်ရှိနေကြောင်း ဒေသခံများထံမှ သိရသည်။
ယင်းကဲ့သို့ ကျေးရွာအနီး လက်နက်ကိုင် တပ်ဖွဲ့များ စစ်အင်အားဖြည့် စခန်းချ နေထိုင်မှုကြောင့် ဒေသခံ အချို့က ကြိုတင် စစ်ရှောင်နေရကြောင်း အသက် (၃၀) ဝန်းကျင် အမျိုးသား တစ်ဦးက သျှမ်းသံတော်ဆင့်ကိုပြောသည်။
“စစ်တပ်တွေက ရွာရဲ့ အနီးပတ်ဝန်းကျင်မှာ ရှိနေလို့ ကြောက်ရတာပေါ့၊ အဲ့ကြောင့် ဒေသခံ ၃၀၀ နီးပါး လောက်က ကြိုတင်စစ်ရှောင်နေရတယ်၊ ဖိုင်ခမ်းဘုန်းကြီးကျောင်းမှာ ၁၀၀ လောက်ရှိတယ်၊ တချို့က မြို့ပေါ် အမျိုး တွေဆီကို ရှောင်သွားကြတယ်” ဟု အသက် (၃၀) ဝန်းကျင် အမျိုးသားက သျှမ်းသံတော်ဆင့်ကို ပြောသည်။
ကြိုတင် စစ်ရှောင်နေရသည့် ဒေသခံများသည် တန့်ခန်ကျေးရွာ (ဝၢၼ်ႈတၢင့်ၶၢၼ်)၊ နောင်မွမ်းကျေးရွာ (ဝၢၼ်ႈၼွင်မွၼ်း)၊ ကွန်ကောက်ကျေးရွာ (ဝၢၼ်ႈၵုၼ်ၵွၵ်ႇ) နှင့် ပိန်းဟုန်းကျေးရွာ (ဝၢၼ်ႈပဵင်းႁုင်း) ကျေးရွာတို့မှ ဖြစ်ကြောင်း သိရသည်။
လက်ရှိတွင် ကွန်ကောက်ကျေးရွာအတွင်း စခန်းချနေသည့် KIA တပ်သည် အင်အား ၄၀၀ နီးပါး ရှိနေပြီး စယ်အူကျေးရွာအတွင်း ရှိ စစ်ကောင်စီတပ်သည် အင်အား ၂၀၀ ထက်မနည်း ရှိနိုင်ကြောင်း ဒေသခံများက ပြောသည်။
KIA တပ်စခန်းရှိရာ ကွန်ကောက်ရွာသည် စစ်ကောင်စီ စခန်းချရှိနေသည့် စယ်အူရွာ နှင့် နမ့်စလပ်ရွာကြား ရှိနေသည့်အတွက် တိုက်ပွဲပြင်းထန်မှာကို စိုးရိမ်သည့်အကြောင်း အိုက်စိုင်း (နာမည်လွှဲ) က သျှမ်းသံတော်ဆင့်ကို ပြောသည်။
“နမ့်စလပ်မှာ စစ်ကောင်စီ တပ်စခန်းရှိတယ်၊ အဲ့စခန်းကနေ လက်နက်ကြီးနဲ့ ပစ်လေ့ရှိလို့ တကယ်လို့ တိုက်ပွဲဖြစ်ရင် အဲ့တပ်ကနေ လက်နက်ကြီးနဲ့ ရမ်းပစ်ကြမှာ စိုးရိမ်ကြတာ၊ KIA တပ်ကတော့ တကယ်လို့ စကစ ရွာနားရောက်လာရင် သူတို့ဆုတ်ပေးမယ်၊ ရွာနားတိုက်ပွဲ မဖြစ်စေရဘူးလို့ ဒေသခံတွေကို ပြောထားတယ်” ဟု အသက် (၃၀) ဝန်းကျင် ဒေသခံ အမျိုးသားက သျှမ်းသံတော်ဆင့်ကို ပြောသည်။
ထို့အပြင် ယမန်နေ့ (အောက်တိုဘာလ ၅) ရက် မွန်းလွဲပိုင်း ၁ နာရီ ဝန်းကျင်တွင်လည်း သိန္နီမြို့နယ် ကွန်ကောက်ကျေးရွာအုပ်စုရှိ နမ့်တူချောင်းဘေး နယ်ကျွံရောက်လာသည့် စစ်ကောင်စီ စစ်ကြောင်း နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တို့ တိုက်ပွဲဖြစ်ရာ စစ်ကောင်စီက ဆုတ်ခွာခဲ့ရသည်။
လက်ရှိအချိန်သည် KIA တပ်ဖွဲ့မှ ကွန်ကောက်ကျေးရွာ ဘုန်းကြီးကျောင်းဝင်းနား စခန်းချကာ ကွန်လုံဘက် သွားလာသည့် ကုန်တင်ကားများထံမှ ဆက်ကြေးကောက်တောင်းခံ နေကြောင်းလည်း သိရ သည်။
Leave a Comments