မြန်မာ – ထိုင်းနယ်စပ် တာချီလိတ်မြို့ပေါ် ရှိ ရပ်ကွက်လမ်းကြားထဲ၌ ရေပေးဝေရေးအတွက် ပိုက်များ မြှုပ်နှံရန် မြေတူးဖော်နေသောကြောင့် လမ်းများပျက်စီးပြီး ပြည်သူများ နေ့စဉ်သွားလာရန် အခက်ခဲဖြစ်နေကြောင်း စုံစမ်းသိရသည်။
အဆိုပါ ရေပေးဝေရေးအတွက် စက်ယန္တယားဖြင့် တူးဖော်နေမှုကြောင့် တူးဖော်သည့်လမ်းများတွင် နဂိုမူလအတိုင်း ပြန်လည်မပြုပြင်ပေးသောကြောင့် လူသွားလမ်းများ ပျက်စီးနေကြောင်း တာချီလိတ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ရေပေးဝေရေးအတွက်က ပြည်သူဆိုပေမယ့် အခကြေးငွေယူပြီး လုပ်ထားတဲ့ဟာပေါ့။ ဒါပေမယ့် ကျနော်ပြောချင်တာက သူတို့ဒီဟာပြင်လိုက်တယ်၊ လမ်းက မူလအတိုင်းရှိတာ သူတို့ ပြန်ခင်းပေးရမှာလေ။ အခုဟာ လူတွေ၊ ကားတွေ သွားလို့လာလို့ မရအောင် ပျက်စီးသွားတာ “ ဟု ၎င်းအမျိုးသားတစ်ဦးက ပြောသည်။
တာချီလိတ်မြို့ပေါ် ရှိ လမ်းများသည် ကားတစ်စီးစာ သွားလာနိုင်ပြီး အနည်းငယ် ပျက်စီးနေရာမှ လက်ရှိမှာ ရေပေးဝေရေး ပြုလုပ်ပြီး မြေများတူးဖော်ကာ နဂိုမူလအတိုင်း ပြန်လည်မပြုပြင်ပေးသောကြောင့် ကားများ သွားလာ၍ မရအောင် ပျက်စီးနေကြောင်း ၎င်းကဆိုသည်။
အဆိုပါ ပြည်သူများ အသုံးပြုသည့် လမ်းများကို တူးဖော်ပြီးပါက ပျက်စီးပေါက်ပြဲသွားသော လမ်းများကို နဂိုမူလအတိုင်း ပြန်လည်၍ တာဝန်ယူခင်းပေးပါရန် ဒေသခံများက တောင်းဆိုထားသည်။
Leave a Comments