ကချင်ပြည် ဖားကန့်မြို့နယ် ဆိပ်မူကျေးရွာအုပ်စုအတွင်း စစ်ကောင်စီ နှင့် ကချင်လွတ်လပ်ရေး တပ်မတော် KIA ၊ ပြည်သူ့ကာကွယ်ရေး PDF ပူးပေါင်းတပ်ဖွဲ့တို့အကြား တိုက်ပွဲဖြစ်ပွားပြီး လက်နက်ကြီးဖြင့် ပစ်ခတ်မှုကြောင့် နေအိမ်ထိမှန်ခဲ့ကြောင်း စုံစမ်းသိရသည်။
ယမန်နေ့ (အောက်တိုဘာလ ၃ ) ရက် နံနက်ပိုင်း ၁၀ နာရီမှစပြီး ဖားကန့်မြို့နယ် ဆိပ်မူကျေးရွာအုပ်စု ဆိုင်းတောင်ကျေးရွာတွင် စစ်ကောင်စီတပ်နှင့် KIA ၊ PDF ပူးပေါင်းတပ်ဖွဲ့တို့အကြား တိုက်ပွဲဖြစ်ပွားပြီး လက်နက်ကြီးဖြင့် ပစ်ခတ်တိုက်ခိုက်ခဲ့ကြရာ ပြည်သူနေအိမ်ပေါ်သို့ လက်နက်ကြီးကျပေါက်ကွဲပြီး အိမ်တစ်လုံး မီးလောင်ပျက်စီးသွားခဲ့ကြောင်း ဒေသခံ အမျိုးသားတစ်ဦးက ပြောသည်။
“မနေ့က သူတို့ တိုက်ပွဲဖြစ်ပြီး ညနေပိုင်းလောက်မှာ စစ်ကောင်စီဘက်က တစ်ဖက်သတ် လက်နက်ကြီးတွေ နဲ့ ရမ်းသမ်းပစ်သေးတယ်။ နေအိမ်တစ်လုံးတော့ လက်နက်ကြီးမှန်ပြီး မီးလောင်သွားတယ်။ ရွာတွေထဲ လူတွေလိုက်ရှာပြီး မသင်္ကာသူတွေကိုလည်း ခေါ်သွားတယ် “ ဟု ၎င်းအမျိုးသားတစ်ဦးက ပြောသည်။
အဆိုပါ နေအိမ်ပေါ် လက်နက်ကြီး ကျရောက်ပေါက်ကွဲမှု နှင့် ပတ်သက်၍ မည်သည့်လက်နက်ကိုင်တပ်ဖွဲ့မှ ပစ်ခတ်သော လက်နက်ကြီးဖြစ်ကြောင်း မသိရပေ။
တိုက်ပွဲသည် ဆိုင်းတောင်ဘက်သို့ စစ်ကြောင်းထိုးလာသော စစ်ကောင်စီ စစ်ကြောင်း နှင့် ကျေးရွာအတွင်း အိမ်စီးကား ၃ စီးဖြင့် လာသော KIA၊ PDF တို့မှ စတင်ပစ်ခတ်ခဲ့ရာ နှစ်ဖက်ပစ်ခတ်တိုက်ခိုက်ကြပြီး တိုက်ပွဲဖြစ်ပွားခဲ့ကြောင်း သိရသည်။
ယင်းကဲ့သို့ နှစ်ဖက်တပ်ဖွဲ့ တိုက်ပွဲဖြစ်ပွားမှုကြောင့် ဆိုင်းတောင်ကျေးရွာရှိ အထက်တန်းကျောင်း ပိတ်ထားရပြီး ယနေ့အချိန်ထိ ပြန်လည်ဖွင့်လှစ်နိုင်ခြင်း မရှိသေးကြောင်း သိရသည်။
“အဓိကတော့ လက်နက်ကိုင်တွေပေါ့ ရွာထဲ မလာနေကြဖို့ တောင်းဆိုချင်တာ။ တိုက်ပွဲဖြစ်လာရင် ကြားထဲက ကျနော်တို့ ပြည်သူတွေ ခံရတယ်။ ဒုက္ခရောက်ပြီး ရှာစားရတာခက်တယ် “ ဟု ဒေသခံ သျှမ်းအမျိုးသားတစ်ဦးက တောင်းဆိုထားသည်။
ထို့အပြင် တိုက်ပွဲအတွင်း နှစ်ဖက်တပ်ဖွဲ့ ထိခိုက်သေဆုံးမှုများ ရှိနိုင်ပြီး သေဆုံးမှု စာရင်းကိုတော့ လက်ရှိအချိန် ထုတ်ပြန်နိုင်ခြင်း မရှိသေးပေ။
အလားတူ စက်တင်ဘာ ၂၅ ရက်တွင်လည်း ဖားကန့်မြို့ ပြည်သူ့ဆေးရုံမှာ ဆေးဝါးကုသမှု ခံယူနေသည့် ရဲတပ်ဖွဲ့ဝင် တစ်ဦး ထပ်မံပစ်သတ်ခံရပြီး သေဆုံးသွားခဲ့ကြောင်း ဒေသခံများက ပြောသည်။
Leave a Comments