သျှမ်း – ကရင်နီ (ကယား) ပြည်နယ်စပ်ဒေသ မိုးဗြဲမြို့တွင် တိုက်ပွဲဖြစ်ပွားခြင်းမရှိဘဲ စစ်ကောင်စီ၏ ရေကာတာ စောင့် တပ်စခန်းမှ လက်နက်ကြီးဖြင့် ရမ်းသမ်းပစ်ခတ်နေကြောင်း စုံစမ်းသိရှိရသည်။
မိုးဗြဲမြို့ အခြေစိုက် ခမရ (၄၂၂) မိုးဗြဲဆည် အစောင့်တပ်စခန်းမှ (ရေကာတာအစောင့်တပ်) နေ၍ အရှေ့ဘက်ခြမ်း၊ အနောက်ဘက်ခြမ်း နှင့် အနီးတဝိုက်ရှိ ကျေးရွာများကို တာဝေးပစ် လက်နက်ကြီးဖြင့် နေ့စဉ်နီးပါး ပစ်ခတ်နေကြောင်း မိုးဗြဲမြို့ အရှေ့ဘက်ခြမ်းရှိ စစ်ရှောင်တစ်ဦးက သျှမ်းသံတော်ဆင့်ကို ပြောသည်။
“တိုက်ပွဲကတော့ ငြိမ်နေတယ်။ ဒါပေမယ့် လက်နက်ကြီးတွေ နဲ့ နေ့တိုင်းလိုလို ရမ်းသမ်း ပစ်နေတယ်။ ဗိုးဗြဲမြို့ ရေကာတာကုန်းပေါ်ကနေ လှမ်းပစ်တာ။ နေအိမ်ထိတာ၊ လူမှန်တာတွေ ရှိတယ်။ ပြီးခဲ့တဲ့ ၄ ရက်လောက်ကလည်း တစ်ယောက်ထိသေးတယ် “ ဟု စစ်ရှောင်တစ်ဦးက ပြောသည်။
အဆိုပါ စစ်ကောင်စီ လက်နက်ကြီးဖြင့် ရမ်းသမ်းပစ်ခတ်မှုကြောင့် ပြည်သူများနှင့် စစ်ရှောင်များသည် နေအိမ်အတွင်း လက်နက်ကြီး ကျရောက်ပေါက်ကွဲမည်ကို စိုးရိမ်နေကြကြောင်း သိရသည်။
လက်ရှိ မိုးဗြဲမြို့နယ်တွင် တိုက်ပွဲငြိမ်သက်လာချိန် ၄ လ ဝန်းကျင်ရှိပြီး ဖြစ်သော်လည်း လယ်ယာအတွင်း လူစုဝေးခြင်း၊ သွားလာလှုပ်ရှားခြင်း ရှိပါက စစ်ကောင်စီသည် လက်နက်ကြီးဖြင့် ရမ်းသမ်းပစ်ခတ် ခြိမ်းခြောက်နေကြောင်း မိုးဗြဲမြို့ဒေသခံ တစ်ဦးကဆိုသည်။
“ ဒီဆည်အောက်မှာ စပါးတွေ လက်လှမ်းမှီသလောက် တောင်သူတွေ စပါးစိုက်တာရှိတယ်။ လူတွေအရမ်းအုံလာပြီဆိုရင် လက်နက်ကြီးတွေနဲ့ လှမ်းပစ်တာ။ ပုံမှန်လို့တောင် ပြောလို့ရတယ်။ တစ်နေ့ကို အနည်းဆုံး ၁၀ လုံးလောက်ပစ်နေတာ။ မနက် နဲ့ ညနေပိုင်းမှာ ပစ်တာရှိတယ်။ ညနေပိုင်းတော့ သူတို့ပိုပစ်တယ် “ ဟု ၎င်းဒေသခံတစ်ဦးက ထပ်လောင်းပြောသည်။
ယင်းကဲ့သို့ လက်နက်ကြီးဖြင့် ပစ်ခတ်မှုများကြောင့် ပြည်သူများအနေဖြင့် သတိထား သွားလာရန်၊ လုံခြုံရေး ဂရုပြုကြရန် မိုးဗြဲပြည်သူ့ကာကွယ်ရေးတပ် (MBPDF) မှ ယမန်နေ့ စက်တင်ဘာလ ၂၇ ရက်တွင် ထုတ်ပြန်ထားသည်။
ထို့အပြင် မိုးဗြဲမြို့ပေါ်ရှိ ညောင်ဝိုင်းရပ်ကွက်၊ စည်ကား ရပ်ကွက် (၁) နှင့် (၂) တွင် စစ်ကောင်စီတပ်ဖွဲ့ တပ်စွဲနေထိုင်လျက်ရှိသောကြောင့် စစ်ရှောင်များ နေရပ်ပြန်လည်နေရာ ချထားရေး မရသေးပေ။
စစ်တပ်အာဏာသိမ်းပြီးနောက်ပိုင်း မိုးဗြဲမြို့တွင် စစ်ကောင်စီ နှင့် ပြည်သူ့ကာကွယ်ရေး PDF ပူးပေါင်းတပ်ဖွဲ့တို့အကြား တိုက်ပွဲဖြစ်ပွားမှုကြောင့် ပြည်သူဦးရေ သောင်းနှင့်ချီ ထွက်ပြေးနေလျက်ရှိသည်။
