သျှမ်းပြည် ကွတ်ခိုင်မြို့နယ် နမ့်ဖတ်ကာ လူနေအိမ်ရပ်ကွက်အတွင်း လက်နက်ကြီး ကျရောက်ပေါက်ကွဲမှုကြောင့် တစ်ရက်တည်း အရပ်သား ၂ ဦးထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။
ယမန်နေ့ စက်တင်ဘာလ ၂၆ ရက် မနက်ပိုင်း ၁၁ နာရီအချိန်မှစပြီး နမ့်ဖတ်ကာ ရပ်ကွက် ၄ ထဲတွင် လက်နက်ကြီး ကျရောက်ပေါက်ကွဲမှုကြောင့် အသက် ၁၁ နှစ်အရွယ် ကလေးငယ်တစ်ဦး ထိခိုက်ဒဏ်ရာ ရရှိခဲ့သည်။
အလားတူ ညပိုင်းအချိန်တွင်လည်း နမ့်ဖတ်ကာ ရပ်ကွက် ၂ အတွင်း လက်နက်ကြီးတစ်လုံး ထပ်မံကျရောက် ပေါက်ကွဲမှုကြောင့် အသက် ၃၅ နှစ်အမျိုးသားတစ်ဦး ထိခိုက်ဒဏ်ရာ ရရှိခဲ့ကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“လက်နက်ကြီး ကျရောက်ပေါက်ကွဲလို့ ကလေးငယ်တစ်ယောက်ကို ထိမိတယ်။ ဘယ်ဖက်က ပစ်တာလဲ မပြောတတ်ဘူး။ ကျွန်မတို့ နမ့်ဖတ်ကာမှာတော့ ဟိုဖက်ပစ်၊ ဒီဖက်ပစ် နဲ့ ဘယ်အဖွဲ့အစည်းက ပစ်တာလဲ မပြောတတ်တော့ဘူး “ ဟု နမ့်ဖတ်ကာ ဒေသခံ အမျိုးသမီး တစ်ဦးက ပြောသည်။
အဆိုပါ လက်နက်ကြီးကြောင့် ထိခိုက်ဒဏ်ရာ ရသူများကို လူမှုကူညီရေးအသင်းထံမှ သွားရောက်ကူညီခဲ့ပြီး ကွတ်ခိုင်ပြည်သူ့ဆေးရုံသို့ ပို့ဆောင်ပေးခဲ့သည်။
ထို့အပြင် နမ့်ဖတ်ကာမြို့နယ်အတွင်း စစ်ကောင်စီ နှင့် TNLA တို့အကြား တိုက်ပွဲဖြစ်ပွားလာချိန် စက်တင်ဘာလ တစ်လနီးပါးအတွင်း လက်နက်ကြီး ပစ်ခတ်မှုများ၊ မြေမြှုပ်မိုင်းများကြောင့် အရပ်သား ၆ ဦး သေဆုံးပြီး ၁၀ ဦးကျော် ထိခိုက်ဒဏ်ရာ ရရှိခဲ့ပြီ ဖြစ်ကြောင်း ခိုင်မာသည့်သတင်းရင်းမြစ် တစ်ဦးကပြောသည်။
“ယခုလထဲမှာ စစ်ကောင်စီ နဲ့ TNLA တို့ တိုက်ပွဲဖြစ်ပြီး လက်နက်ကြီးတွေ ရမ်းသမ်းပစ်ခတ်တာလို့ ၆ ယောက် ဆုံးသွားပြီ။ ၁၀ ယောက်ကျော်လောက်က ဒဏ်ရာရထားတယ်။ တစ်ယောက်ကလည်း ပြင်းထန် ဒဏ်ရာရထားတယ်။ ပြီးခဲ့တဲ့ရက်ကလည်း စစ်တပ်စခန်းဟောင်းမှာ အမျိုးသားတစ်ဦး မိုင်းမိသေးတယ်။ ဒါတွေက ကျနော်တို့ သိရသလောက်ပေါ့။ များသောအားဖြင့်တော့ စစ်ကောင်စီရဲ့ လက်နက်ကြီးတွေကြောင့် ဖြစ်တာများတယ် “ ဟု ၎င်းကဆိုသည်။
လက်ရှိမှာ ကွတ်ခိုင်မြို့နယ်အတွင်း စစ်ကောင်စီ နှင့် TNLA တို့အကြား စစ်ရေးတင်းမာနေလျက်ရှိသည်။
