တရုတ်ပြည် ရွှေလီမြို့ နှင့် မန်စီမြို့အတွင်း သွားရောက် အလုပ်လုပ်ကိုင်ကြသည့် မြန်မာလုပ်သားများသည် လုပ်အားခ လျှော့ချခံနေရကြောင်း စုံစမ်းသိရသည်။
မြန်မာလုပ်သားများသည် ယခင်က လုပ်အားခ တစ်လကို တရုတ်ယွမ်ငွေ ၂,၅၀၀ ကျော် (မြန်မာကျပ်ငွေ ၁၁ သိန်းကျော်) ရရှိခဲ့ရာ လက်ရှိတွင် လုပ်အားခ တစ်လကို ယွမ်ငွေ ၁,၈၀၀ အထိ လျှော့ချခံနေရကြောင်း ရွှေလီမြို့ရှိ မြန်မာလုပ်သား အမျိုသား တစ်ဦးက ပြောသည်။
“အရင်တုန်းက ကျနော်တို့ ကုမ္ပဏီမှာ တစ်ယောက်ကို ယွမ် ၂၅၀၀ ရတယ်။ အခု အလုပ်သမားတွေ များလာတော့ ကျနော်တို့ လစာတွေ လျှော့ခံရတယ်။ အခုဝင်လာတဲ့ အလုပ်သမားတွေက အလုပ်မရှိတော့ အလုပ်ရှာကြတယ်။ ပိုက်ဆံ ဘယ်လောက်ရရ လုပ်တယ်။ တချို့တွေကတောင် ယွမ် (၁၀၀၀)၊ (၂၀၀၀) ပေးပြီး အလုပ်ခန့်ဖို့ ပူဆာတော့ သူဌေးတွေက နဂိုမူလရှိတဲ့ အလုပ်သမား လုပ်အားခကို လျှော့ပြီးပေးလိုက်တယ် “ ဟု ၎င်း အမျိုးသားတစ်ဦးက ပြောသည်။
ပြီးခဲ့သည့် စက်တင်ဘာလ ၄ ရက်မှစ၍ မြန်မာ – တရုတ်နယ်စပ်ဒေသရှိ ဂိတ်များကို ပြန်လည်ဖွင့်လှစ်ပြီး နှစ်နိုင်ငံ ဝင်ထွက်ခွင့် တစ်ခါသုံးကတ် TBP ပြုလုပ်ပေးကြရာ လူဦးရေ ထောင် နှင့် ချီရှိသည့် အနယ်နယ် အရပ်ရပ်မှ မြန်မာလုပ်သားများသည် ကတ်လုပ်ရန်အတွက် အလုအယက် တန်းစီ စောင့်နေကြကြောင်းလည်း သိရသည်။
ယင်းကဲ့သို့ တစ်ခါသုံးကတ် TBP ကို ကိုင်ဆောင်ပြီး တရုတ်ပြည်အတွင်း သွားရောက် အလုပ်လုပ်ကိုင်သည့် မြန်မာလုပ်သား များပြားလာသည်နှင့်အမျှ အလုပ်အကိုင် ရှားပါးမှု ကြုံတွေ့ရပြီး လုပ်အားခ ခေါင်းပုံ ဖြတ်ခံရကြောင်းလည်း မြန်မာလုပ်သားတစ်ဦး ကပြောသည်။
“အခုတော့ အလုပ်ထဲမှာ နည်းနည်းလေး မှားရင် အလုပ်ထုတ်ဖို့ ပြောတယ်။ မလုပ်ချင်ရင်ထွက် မင်းတို့နောက်မှာ အလုပ်လာလုပ်မယ့်သူတွေ အများကြီးရှိတယ်ဆိုပြီး သူဌေးကပြောတာ။ အရင်တုန်းကတော့ ကျနော်တို့ အလုပ် ထုတ်ဖို့မပြောနဲ့ အလုပ်မှားတာတောင် ဘာမှမပြောဘူး။ အလုပ်လုပ်မယ့် လူမရှိမှာကြောက်လို့ အလုပ်တောင် ပေးမထွက်ဘူး “ ဟု မြန်မာလုပ်သားတစ်ဦးက ထပ်လောင်းပြောသည်။
စစ်တပ် အာဏာသိမ်းပြီးနောက်ပိုင်း မြန်မာနိုင်ငံတွင် နိုင်ငံရေး အခြေအနေ မတည်ငြိမ်မှုကြောင့် ကုန်ဈေးနှုန်း အဆမတန် မြင့်တက်ရာ စားဝတ်နေရေး ပိုမိုကျပ်တည်းလာပြီး တိုင်းတစ်ပါးသို့ ထွက်ခွာသွားပြီး အလုပ်လုပ်ကြရသည်။
Leave a Comments