သျှမ်းပြည် လင်းခေးခရိုင်၊ မိုးနဲမြို့နယ် အတွင်းတွင် ခြံခင်းပိုင်ရှင်များ မယူရသေးသည့် မြေပဲ နှင့် ပြောင်းဖူးများကို လိုက်လံခိုးယူသည့် သူခိုးများက အုပ်စုလိုက်ရှိနေကြောင်း တိုင်တန်းသော်လည်း သက်ဆိုင်ရာ ဝာာဝန်ရှိသူများက အရေးယူဆောင်ရွက်ခြင်း မရှိကြောင်း စုံစမ်းသိရသည်။
လက်ရှိ အချိန်သည် စိုက်ပျိုးထားသည့် ပြောင်းဖူး နှင့် မြေပဲများ နုတ်ယူရန် အချိန်မကျသေးသည့်အတွက် ခြံခင်းပိုင်ရှင်များ မယူရသေးသည့် ပြောင်းဖူး နှင့် မြေပဲသည် ခိုးယူခြင်းခံရပြီး အချို့ လာရောက်ခိုးသူသည် ထော်လာဂျီ အသေးဖြင့် အုပ်စုလိုက် လိုက်လံခိုးယူမှု ပြုလုပ်နေကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ပုံမှန်ဆို ပြောင်းဖူးတို့၊ မြေပဲတို့က နောက်လထဲမှာ ယူလေ့ရှိကြတာပေါ့၊ တချို့ဆိုရင် သီတင်းကျွတ်လမှ ယူကြတာလည်း ရှိတယ်။ အဲ့ဒါကို သူခိုးတွေက ထော်လာဂျီ (အသေး) နဲ့ တချို့က ဆိုင်ကယ် နဲ့ ဆာလာအိတ် နဲ့ လာခိုးကြတာ။ အုပ်စုလိုက်ဆိုတော့ ပိုင်ရှင်တွေလည်း ခြံစောင့်ဖို့ မသွားရဲဘူး၊ သူခိုးတွေ သောင်းကျန်းတာ တော်တော်ဆိုးတယ်” ဟု မိုးနဲမြို့ခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
လက်ရှိ အချိန်သည် ပြောင်းဖူး ချိုးရန် ၊ မြေပဲနုတ်ရန်အတွက် အချိန်မကျရောက်သေးသည့်အတွက် ပိုင်ရှင်များ မယူသေးခြင်းဖြစ်ကြောင်း ခြံပိုင်ရှင် အမျိုးသားတစ်ဦး ကပြောသည်။
ယင်းကဲ့သို့ သူခိုးများ သောင်းကျန်းခြင်း နှင့် ပတ်သက်ပြီး ခြံခင်းပိုင်ရှင်များမှ မြို့အုပ်ချုပ်ရေးမှူး နှင့် တာဝန်ရှိသူများထံသို့ တိုင်ကြားပြောဆိုခဲ့ပေမဲ့ အရေးယူဆောင်ရွက်ပေးခြင်း မရှိခဲ့ကြောင်းလည်း အထက်ပါ အမျိုးသားက သျှမ်းသံတော်ဆင့်ကို ပြောသည်။
“သူခိုးတွေက အုပ်စုလိုက် ရှိနေတော့ ခြံပိုင်ရှင်တွေ အနေနဲ့ သွားစောင့်ဖို့ ဆိုတာလည်း ကြောက်ရတယ်လေ။ ဝိုင်းရိုက်ခံရရင် ဘယ်လိုလုပ်မလဲ၊ အဲ့ဒါကြောင့် ပြည်သူ့လုံခြုံရေး တာဝန်ရှိသူတွေကို တိုင်တာ၊ ဘာမှလည်း မလုပ်ပေးဘူး၊ မှတ်တမ်းရေးထား သလောက်ပဲ” ဟု အထက်ပါ မိုးနဲမြို့ခံ အမျိုးသားက သျှမ်းသံတော်ဆင့်ကို ပြောသည်။
ပြီးခဲ့သည့် နှစ်ထဲတွင် ပြောင်းခြံစောင့်သည့် ခြံပိုင်ရှင်တစ်ဦးသည် ပြောင်းခိုးရန်လာသည့် သူခိုးအုပ်စု၏ ဝိုင်းဝန်း ရိုက်နှက်ခြင်းကို ခံရပြီး ဒဏ်ရာပြင်းထန်စွာ ရခဲ့သည့်ဖြစ်စဥ် ဖြစ်ခဲ့ဖူးကြောင်းလည်း သိရသည်။
လက်ရှိ ပြောင်းဈေးကာလပေါက်ဈေးသည် ၅၀ ကီလို အိတ်တစ်အိတ်ကို တရုတ်ယွမ်ငွေ (၈၀) ဝန်းကျင် ၊ မြန်မာ ငွေကျပ် ၄၀,၀၀၀ (လေးသောင်း) ဝန်းကျင် ရရှိနေသည့်အတွက် သူခိုးများက ပြောင်းဖူးကို ခိုးယူမှု များနေခြင်းဖြစ်နိုင်ကြောင်းလည်း ခြံခင်းပိုင်ရှင် တစ်ဦး ကပြောသည်။
ထို့အပြင် မိုးနဲမြို့နယ်အတွင်း၌ လောင်းကစားဝိုင်းများ ပေါ်တင်ဖွင့်လှစ်နေသည့်အတွက် ဒေသအတွင်း မျက်နှာစိမ်း ဝင်ရောက်သွားလာမှု များနေပြီး ခိုးယူလုယက်မှုလည်း များနေရခြင်းဖြစ်ကြောင်း ဒေသခံများက ဝေဖန်ပြောဆိုနေကြသည်။
